¹ Nichipewa mwanzi nihumire here chipimo. Nichambwa, "Lamuka upime hekalu ra Mulungu hamwenga na madhabahuge, na mvosi mva-abuduo ndani ya riro hekalu. ² Ala usipime sehemu za mahakama nze ya hekalu kpwa kukala sehemu iyo ilaviwa kare kpwa Mataifa. Mvandaufyogafyoga mudzi mutakatifu kpwa miezi mirongo minne na miri. ³ Nindamvapa mashahidi angu airi uwezo wa kutabiri kpwa siku 1,260(elifu mwenga, magana mairi na mirongo mihandahu), mvachikala mvavala mavazi ga magunia." ⁴ Mashahidi ao ni iyo mizeituni miri na minara miri ya mataa iriyoidzema mbere za Bwana wa dunia. ⁵ Ichikala kuna yoyosi andiyetsagula kuidhuru, moho undombola mwao makanwani wolage mahadui mvamvo. Yoyosi andiyehenza kumvadhuru lazima olagbwe kpwa njira iyo. ⁶ Mashahidi ao mvana uwezo kufunga anga ili mvula isinye siku zizo mvandizokala mvatabiri. Mvana nguvu kugaluza madzi kukala mulatso na kupiga intsi na pigo rorosi ra laana mvandihohenza. ⁷ Mvandihokala mvamarikiza ushuhuda wao, munyama iye ombolaye kula wina wa ndani andatangaza viha namvo. Andamvashinda na amvolage. ⁸ Miri yao indalala vichochoroni mwa mudzi mubomu (ambawo kpwa ishara wamanyiwa here Sodoma na Misiri) ambako Bwana wao wesulubiwa. ⁹ Kpwa siku tahu na nusu anjine kula kpwa baadhi ya atu, mbari, makabila na mataifa mvandailola miri yao. Kamvandakubali miri iyo izikpwe mbirani. ¹⁰ Mvaishio duniani mvandasherehekea dzulu ya miri yao na kufurahia. Mvandahumirana ta zawadi kpwa kukala manabii mvamvo airi mvetesa sana mvariokala mvaishi duniani. ¹¹ Ala zichitsupa siku tahu na nusu, pumuzi ya uzima kula kpwa Mulungu indamvenjira, namvo mvandema na magulu gao enye. Mvandiomvona mvandenjirwa ni woga mubomu sana. ¹² Kisha mvandasikira sauti bomu kula mulunguni ichimvamba, "Nzoni kuno dzulu!" Kisha mvandenenda kuko dzulu mainguni kahi za ingu, kuno mahadui ao mva-alola. ¹³ Wakati uwo, kundakala na kusumba kpwa dunia kubomu muno, na sehemu kumi ya mudzi uwo undangamika. Atu elifu fungahe mvandafa kpwa kuko kusumba kpwa dunia, na mvandiotia mvandenjirwa ni woga mubomu na kumupa Mulungu utukufu. ¹⁴ Sehemu ya laana ya kpwanza indakala ichira. Ala, lola! sehemu ya laana ya hahu nayo yadza si kapindi. ¹⁵ Kisha malaika wa fungahe achipuliza tarumbetaye, nazo sauti za dzulu zichinena mulunguni zichamba, "Ufalume wa dunia ugaluka kukala ufalume wa Bwana wehu na Mwanawe Masihi, naye andatawala milele na milele." ¹⁶ Kisha mvo atumia mirongo miri na nne, mvasagalao kpwenye vihi vyao vya enzi mbere ya Mulungu, mvachigbwa chinabunabu mvachimwabudu Mulungu. ¹⁷ Mvachamba, "Halavya mumvera kpwako, Bwana Mulungu, uwe uriyeko, na uriyekalako, kpwa kukala udzihala nguvuzo nyinji na udzanza kutawala. ¹⁸ Mataifa mvetsikirwa, ala korozo zifika. Wakati ufika wa afu kuhukumiwa na atumishio kuzawadishwa mvachikalamo manabii na atakatifu a Mulungu, hamwenga na mvosi mvario rogoha dzinaro, mvario kamvatambulikanire na mvario ni abomu. Wakati ufika kpwako kumvangamiza mvaangamizao dunia." ¹⁹ Kisha hekalu ra Mulungu richifugulwa mulunguni na sanduku ra malaganoge na adamu richonewa ndani ya hekalu. Kpwekala na miyale ya mulangaza, ngurumo, kuvunzikavunzika here miriro ya chigbwaragbwara, mutetemo wa intsi, na mvula nyinji ya mawe.