¹ Ishara bomu ichonekana mulunguni: mwanamuche ariyekala yuvalishwa dzua, mwezi uchikala tsini ya maguluge na chiremba cha nyenyezi kumi na mbiri chitswani mwakpwe. ² Wekala ana lutsunga, kisha wekala warira kpwa utsungu wa kudzifugula. ³ Kisha ishara injine ichonekana mulunguni: Joka bomu renye vitswa vifungahe na pembe kumi, ariyekala ana viremba vifungahe chitswani mwakpwe. ⁴ Muchirawe uchishera sehemu tahu ya nyenyezi mulunguni achizibgwagatsi duniani. Joka richema mbere ya iye mwanamuche ariyekala yuhehi kudzifugula, ili andihodzifugula, amolage iye mwana. ⁵ Achidzifugula mwana wa chilume, ambaye andetawala mataifa gosi kpwa ukali. Ala mwanawe achihokpwa achihirikpwa mbere za Mulungu kpwenye chihiche cha enzi, ⁶ naye mwanamuche achichimbira achenda jangbwani, Mulungu arikokala adzimutengezera hatu ili atunzwe kpwa siku 1,260 (Elifu mwenga, magana mairi na mirongo tandahu) ⁷ Sasa, kpwekala na viha mulunguni. Mikaili na malaikae mvachipigana na riro joka, joka naro na malaikae mvachudzya mukono. ⁸ Ala joka richishindwa nguvu. Ndiho kuchikala kakuna keheri nafasiye mulunguni hamwenga na malaikae. ⁹ Joka riro bomu- joka riro ra kapindi ririroehewa Ibilisi ama Shetani, akengaye urimwengu muzima-wetsuhiwatsi urimwenguni, iye hamwenga na malaikae. ¹⁰ Chisha nichisikira sauti bomu sana mulunguni: Ichamba, "Sasa wokofu ufika na nguvu na ufalume wa Mulungu wehu, na mamulaka ga Masihi. Kpwa kukala mushitaki wa ndugu zehu yutsuhiwatsi, iye ariyekala achimvashitaki kpwa Mulungu usiku na mutsana. ¹¹ Mvemushinda kpwa mulatso wa Mwanang'onzi na kpwa neno ra ushuhuda wao, kpwa kukala kamvahenzere maisha gao hata kufa. ¹² Kpwa vivyo, furahini mosi murio mulunguni! Ala shaka rao mvario duniani na baharini, kpwa kukala Ibilisi yutsuhiwatsi kpwenu! Yudzalwa ni koro na wamanya kukala ana muda muchache muno! ¹³ Joka ririhogundua kukala ritsuhiwa duniani, richimutua iye mwanamuche ariyekala yuvyala mwana wa chilume. ¹⁴ Ala ye mwanamuche achikala yupewa mamvamva ga tai achikala ana uwezo wa kupuruka kpwenda sehemu ambayo Mulungu wekala yudzimutengezera ko jangbwani. Kuko ndiko arikotunzwa sikuze zosi-kure na riro joka. ¹⁵ Joka richimwaga madzi mulomoni here muho ili madzi gaweze kumuhosa iye mwanamuche. ¹⁶ Ala dunia ichimusaidia. Dunia ichifugula mulomowe ichimiza madzi gosi ga uwo muho wa madzi garigokala gombola kanwani mwa riro joka. ¹⁷ Kisha ro joka richimutsukirirwa iye mwanamuche naye achenda pigana na chizaziche chosi, mvosi mvatiio amuri za Mulungu na ku-urinda ushuhuda wa Jesu. ¹⁸ Kisha joka richenda ema kpwenye mutsanga wa bahari ufuoni.