¹ Kisha nichona munyama wombola kula baharini. Wekala ana pembe kumi na vitswa vifungahe. Kahikahi ya pembe za kpwakpwe, wekala na viremba kumi, na chila chitswa chekala china dzina ra kumukufuru Mulungu. ² Munyama iye niremona wekala mufano wa tsui. Nyayoze zekala here ni za dubu, na mulomowe here wa simba. Joka, achimupa nguvuze, chihiche, na uwezowe wa kutawala. ³ Chitswache chimwenga munyama iye cheonekana here chenye chironda chibomu; ambacho chekala chihola bado tu kufyu. Dunia nzima yemutua kpwa kpwangalazika. ⁴ Joka riro pia mveriabudu, kpwa kukala rekala rimupa mamulaka iye munyama. Mvachimwabudu hata iye munyama na mvachitua kunena kumulika mvachamba, "Nani ariye here munyama? Nani awezaye kupigana naye?" ⁵ Munyama achipewa kanwa ambaro rekala raweza kunena maneno ga madzivuno na ga kufuru. Weruhusiwa kuhumira mamulakage kpwa miezi mirongo minne na miri. ⁶ Kpwa vivyo munyama aching'aza kanwa kunena maneno ga kufuru dzulu ya Mulungu, achimukufuru dzinare hamwenga na eneo arirokala, na mvosi mvario mulunguni. ⁷ Iye munyama achipewa ruhusa ya kupigana na atu atakatifu a Mulungu na kumvashinda. Pia, wepewa mamulaka dzulu ya kabila zosi, atu, mbari na mataifa. ⁸ Mvosi mvaishio duniani mvandamwabudu, chila mumwenga ambaye dzinare karandikirwe kahi za chitabu cha uzima, chiricho ni cha Mwanang'onzi ariyetsinzwa kula hangu musingi wa urimwengu. ⁹ Ichikala kuna yoyosi ariye na masikiro, na asikire. ¹⁰ Kala kuna yoyosi wa kuhalwa mateka, matekani andenenda. Kala kuna yoyosi wa kolagbwa kpwa upanga, be kpwa upanga andolagbwa. Uu ni mweho wa uvumirivu na imani kpwa atakatifu a Mulungu. ¹¹ Kisha nichona munyama munjine areombola duniani. Iye wekala ana pembe mbiri here Mwanang'onzi, na wekala wanena here joka. ¹² Wehumira mamulaka gosi here iye munyama wa kpwanza mbereze, na achihenda dunia na atu mvosi mvarioishi duniani kumwabudu iye munyama wa kpwanza-iye ariyekala na kufyu bomu ra chironda. ¹³ Achihenda ishara nyinji bomu za miujiza. Weweza hata kpwamuru moho kula mulunguni uchitima hadi duniani mbere za atu. ¹⁴ Na kpwa ishara zizo achipewa nguvu kpwa niaba ya iye munyama, wemvakenga sana mvariokala mvachi-ishi duniani, achimvamba mvatengeze chigango cha iye munyama-iye ariyekala na kufyu ra upanga, ala bado waishi. ¹⁵ Wepewa ruhusa kuchenjiza pumuzi chicho chigango ili chiweze kunena na kumvahenda osi mvariokahala kumwabudu munyama mvolagbwe. ¹⁶ Achilazimisha chila mutu pia, mvario anyonge na enye nguvu, matajiri na masikini, mvariohuru na atumwa, kuhochera alama mikono ya kulume ama viranguni. ¹⁷ Yekala vigumu kpwa yoyosi kugula wala kukuza hasiho na iyo alama ya munyama, yaani hesabu itimizayo dzinare. ¹⁸ Haha hamala hekima. Kala kuna yoyosi ariye na ufahamu, apige hesabu iyo ya munyama. Kpwa kukala ni hesabu ya chidamu. Hesabuye ni tandahu, tandahu, tandahu (Magana mahandahu, mirongo mihandahu, na tandahu yaani, 666)