¹ Nichilola, nichimona iye Mwanang'onzi wemire dzulu ya Murima Sayuni hamwenga na anzie laki mwenga, mirongo minne na nne elifu (144,000) mvariokala na maandishi ga dzinare na Pabaye nyusoni mwao viranguni. ² Nichisikira sauti kula mulunguni iriyosikirika here ngurumo ya madzi manji na chigbwaragwara. Sauti niriyoisikira pia yekala here sauti za vinubi. ³ Mvachemba wira musha mbere za chihi cha enzi na mvo viumbe anne hamwenga na mvara vilongozi atumia. Kakuna ariyeweza kuwelewa o wira wala kudzifundisha isihokala ao laki mwenga, mirongo minne na nne elifu (144,000) mvariokala mvakombolwa kula duniani. ⁴ Mvamvo ni mvara ambao kamvawahire kudzenjiza najisi ya ache, mvedzitenga na mahendo ga zinaa. Mvamvo ndio mvamutuao iye Mwanang'onzi chila endaho. Ao mvekombolwa kula kpwa adamu anjine here matunda ga kpwanza ga Mulungu na kpwa Mwanang'onzi. ⁵ Kamvawahire kunena ulongo; kamvalaumika. ⁶ Nichimona malaika munjine wauruka kpwenye hewa, ariyekala na injili ya uzima ili aihubiriye mvario duniani-kpwa chila taifa, mbari, luga, na atu. ⁷ Achinena kpwa sauti ya dzulu, "Mogoheni Mulungu na mumupe utukufu. Kpwa kukala masaage ga hukumu gafika. Mwabuduni, iye ariyeumba mbingu na intsi, bahari na mazia gosi ga madzi." ⁸ Malaika munjine-wa hiri-achituira, achamba, "Idzegbwa, Babeli idzegbwa, Babeli iriyo bomu, iriyo akenga mataifa kunwa chileo cha zinaa." ⁹ Malaika munjine-wa hahu-achituira achinena kpwa sauti bomu achamba, "Yoyosi amwabuduye munyama na suraye andaikpwa alama chiranguni hakpwe ama mukononi mwakpwe, ¹⁰ andaneswa naye chileo cha hasira ya Mulungu, chileo ambacho chalaviwa bila kutsanganywa kahi ya chikombeche cha koro. Mutu iye andiyenwa chileo chicho andatsupira mateso ga moho wa chibiriti mbere ya malaika a Mulungu atakatifu na mbere za iye Mwanang'onzi. ¹¹ Mosi undiwo ombola haho undenda dzulu milele, kamvandaoya mutsana wala usiku-ao mvamwabuduo munyama na suraye, na yoyosi andiyepata alama ya dzinare. ¹² Mwambwa bai, mupate kuvumirira atakatifu a Mulungu. ao mvandiotii amuri za Mulungu na imani yao kahi za Jesu." ¹³ Nichisikira sauti kula Mulunguni ichamba, "Andika gano: Mvanabaha mvafao kahi za Bwana." "Ndio," Roho ndivyo ambavyo, "Ili mvakaweze koyezwa kula kpwa kazi zao, kpwa mahendo gao gandamvatua enye." ¹⁴ Nichilola, nichona ingu reruhe. Ariyekala yusegere dzulu ya riro ingu achikala ni here Mwana wa Adamu. Wekala yuvala ngao ya dhahabu chitswani na upanga mukali sana mukononi mwakpwe. ¹⁵ Kisha malaika munjine achombola kula hekaluni na kunena kpwa sauti bomu sana achimweha iye ariyekala yusegere dzulu ya ingu: "Hala upangawo wanze kuvuna. Kpwa kukala wakati wa mavuno ufika, mavuno ga duniani gadziva." ¹⁶ Kisha iye ariyekala yusegere dzulu ya ingu achizungulusha upangawe dzulu ya intsi, achivuna. ¹⁷ Malaika munjine achombola kula kpwa hekalu mulunguni; iye naye achikala ana upanga mukali. ¹⁸ Munjine naye achombola kula kpwa go madhabahu ga uvumba, iye wekala na mamulaka dzulu ya wo moho. Achimweha kpwa sauti bomu iye ariyekala na upanga, "Hala uwo upangawo mukali, kisha ugakusanye, go matagaa ga mizabibu ya dunia, kpwa kukala zabibu zao sasa zidziva." ¹⁹ Naye malaika achizungulusha upangawe duniani achivuna zabibu za duniani. Achizitsuha kahi ya pipa bomu ra divai ya koro za Mulungu. ²⁰ Tsudziro ra divai richibundwabundwa nze ya mudzi, nawo mulatso uchimwagika kula kpwa riro pipa chasi cha chimo cha hatamu ya farasi, kpwa chipimo cha "sitadia" elifu mwenga, magana mahandahu (1,600).