¹ Kisha nichona ishara injine, bomu na ya kpwangalaza: Neona malaika fungahe ambamvo ndo mapigo ga mwisho, kpwa kukala kuchirira kpwao, koro za Mulungu zindakala zitimira. ² Neona ishara iriyo-onekana here kpwamba ni bahari ya bilauri zirizo tsanganywa na moho ichema pembeni mwa bahari iyo, mvekala mvemire mvariokala ni ashindi mvario mushinda iye munyama na hata suraye na hata hesabuye iriyokala yasema dzinare. Mvekala mvagbwira vinubi mvarivyokala mvapewa ni Mulungu. ³ Mvekala mvachemba wira wa Musa, mutumishi wa Mulungu, na wira wa iye Mwanang'onzi: "Mambogo ni mabomu na ga kpwangalaza, Bwana Mulungu, uriye mubomu. Njirazo ni za hachi na takatifu, Mufalume wa mataifa. ⁴ Andiyericha kukogoha nani Bwana, andiyekosa kukutukuza nani? Kpwa kukala ni uwe tu hacheyo uriye mutakatifu. Mataifa gosi gandakusanyika na kukutukuza mberezo kpwa mahendogo matakatifu gadzigofunulwa." ⁵ Garihotsupa gago, nelola, nichona sehemu iriyo takatifu sana, kahi za hekalu na hema ra ushuhuda, rekala rifugulwa mulunguni. ⁶ Malaika mvo afungahe mvachombola kuno mvagbwira go mapigo mafungahe. Mvekala mvavala nguo safi, na za kung'ala sana mishipi ya dhahabu kuzunguluka vifua vyao. ⁷ Mumwenga kahi za viumbe anne achiapa ao malaika afungahe bilauri za dhahabu zirizokala tele koro za Mulungu, aishiye milele na milele. ⁸ Hekalu redzala mosi munji kula kpwa utukufu wa Mulungu na nguvuze. Kakuna ariyeweza kpwenjira hekaluni mpaka gago mapigo mafungahe garigokala gagbwirwa ni ao malaika gatimire.