¹ Nichisikira sauti bomu icheha kula kpwa riro hekalu ichimvambira mvo malaika afungahe, "Enendani mukamwage dzulu ya intsi go mabakuli mafungahe ga koro za Mulungu." ² Malaika wa kpwanza achenda achimwaga bakulire dzulu za intsi; vironda vii na vyenye maumivu makali vichombola mirini mwa mvo mvarokala na alama ya iye munyama, mvamvo mvario-abudu sanamuye. ³ Malaika wa hiri naye achimwaga bakulire ndani ya bahari. Bahari ichigaluka mulatso, here mulatso wa lufu, na chila chiricho-ishi baharini chichifa. ⁴ Malaika wa hahu achimwaga bakulire kahi za miho na kahi za chemichemi za madzi, zichigaluka milatso. ⁵ Nichimusikira iye malaika wa madzi achamba, "Uwe umutakatifu-uriyeho na uriyekalako, u mutakatifu-kpwa kukala udzichiza hukumu dzulu ya vitu vivi. ⁶ Kpwa kukala mvemwaga mulatso wa atu atakatifu a Mulungu na manabii, udzimvapa mulatso kunwa; ndiwo mvasitahiliwo." ⁷ Nichisikira madhabahu gachijibu, "Ndevyo! Bwana Mulungu wa vyosi, hukumu za kpwako ni za jeri na takatifu." ⁸ Malaika wanne achimwaga bakulire dzulu ya dzua, naro richipewa ruhusa kocha atu na moho. ⁹ Mveochwa ni teri kali, namvo mvachirikufuru dzina ra Mulungu, ariye na uwezo dzulu ya mapigo gago. Kamvatubire dambi wala kumutukuza. ¹⁰ Malaika wa tsano achimwaga bakulire dzulu ya chihi cha Munyama, nacho chiza chichiufinika ufalumewe. Mvesaga meno kpwa maumivu makali. ¹¹ Mvachimukufuru Mulungu wa mulunguni kpwa go maumivu gao na vironda, na bado mvekahala kutubu dambi zao. ¹² Malaika wa tandahu achimwaga bakulire kahi za muho mubomu, Furati. Madzige gachomeswa ili kutengezera njira afalume mvandiokudza kula mashariki. ¹³ Nichona roho tahu chafu zirizo-onekana here vyulwa vyombolavyo kanwani mwa rira joka, yuya munyama, na yuya nabii wa ulongo. ¹⁴ Kpwa kukala ni zira roho za pepo zihendazo miujiza. Mvekala mvenda kpwa afalume a dunia nzima ili mva-akusanye hamwenga kpwa viha kahi za siku bomu ya Mulungu mubomu wa vyosi. ¹⁵ ("Lolani! Nadza here mwevi! Anabaha iye achesaye kurinda, atunzaye mavazige ili asiweze kpwendanze huhu atu mvakamona halize za waibu.") ¹⁶ Mvachiareha hamwenga hatu hehewaho Amagedoni chi-Ebrania. ¹⁷ Malaika wa fungahe achimwaga bakulire angani. Kisha sauti bomu ichombola kula hekaluni na hatakatifu kpwenye chihi cha enzi, ichamba, "Visira!" ¹⁸ Kpwekala na ngenge za mulangaza wa radi, ngurumo, misindo ya radi na tetemeko ra kutisha-tetemo bomu ra intsi ambaro karidzangbwe kombolera duniani hangu adamu mvakaleho duniani, vivyo ni tetemo bomu muno. ¹⁹ Mudzi mubomu wegavika kahi za sehemu tahu na midzi ya mataifa ichigbwa. Kisha Mulungu achikumbuka Babeli bomu, naye achiupa mudzi uwo chikombe chirichodzala divai kula kpwa koroze kali. ²⁰ Chila chisiwa chichangamika, na mirima kayonekanire keheri. ²¹ Mvula bomu ya mawe, iriyokala na uziho wa talanta, ichinya kula mulunguni dzulu za atu, nao mvachimukufuru Mulungu kpwa mapigo ga mvula ya mawe kpwa kukala riratu pigo rekala rii sana.