¹ Mumwenga kahi za mvo malaika afungahe ariyekala mugbwiri wa go mabakuli mafungahe achidza achinamba, "Nzo, nindakonyesa hukumu ya iye kahaba mubomu aishiye dzulu ya madzi manji, ² ariye afalume a intsi mvadzizinga naye, na kpwa divai ya uzinziwe, mvaishio dzulu ya ntsi, mvedzirevywa." ³ Chisha iye malaika achinihala kahi za Roho mpaka nyikani, nichimona mwanamuche yusegere dzulu ya munyama mutune mwenye madzina ga kufuru tele. Munyama iye wekala ana vitswa vifungahe na pembe kumi. ⁴ Mwanamuche wevikpwa nguo za zambarau na tune na wekala apambwa kpwa dhahabu, mawe ga thamani, na lulu. Mikononi, agbwira chikombe cha dhahabu chirichodzala vitu vya matsukizo ga uchafu wa usheratiwe. ⁵ Dzulu chimangoni ridzandikpwa dzina ra siri, "Babeli mubomu, mame wa makahaba na vitu vya matsukizo ga intsi." ⁶ Nichimona kukala mwanamuche iye wekala yurea kpwa milatso ya atakatifu a Mulungu na milatso ya mvarofa kpwa ajili ya Jesu. Nirihomona, nekala na kpwangalazika kubomu. ⁷ Ala malaika achinuza, "Kpwa noni wangalazika? Nindakpwelezera ngano ya mwanamuche na munyama ariye amutsukula, iye munyama mwenye vitswa fungahe na zira pembe kumi. ⁸ Munyama udzemona weishi, ala kako keheri vivi, na yuhehi kukpwera kombola kula kpwa shimo risiro na mwisho. Kisha andenderera kpwangamiza. Mvamvo mvaishio dzulu ya intsi, mvamvo mvario madzina gao kagandikirwe kpwenye chitabu cha uzima hangu kpwikpwa musingi kpwa urimwengu-mvandangalazika mvandihomona iye munyama kpwa kukala wekalako, vivi kako, ala yuhehi kudza. ⁹ Ii yamala akili iriyo na hekima. Vyo-vitswa fungahe ni virima fungahe ambavyo mwanamuche iye yusegerere. ¹⁰ Pia ni afalume fungahe. Afalume atsano mvadzegbwa, mumwenga yuhaho na munjine kadzadza, ala andihokudza, lazima asale kpwa muda mufuhi. ¹¹ Munyama ariyekalako, ala sasa kako, iye pia ni mufalume wa nane. Ala ni mumwenga wa aratu afalume afungahe, na waratira kpwangamizwa. ¹² Zira pembe kumi udzizozona ni afalume kumi mvario kamvadzangbwe kuhochera ufalume, ala mvandahochera mamulaka here afalume kpwa saa mwenga hamwenga na munyama. ¹³ Mvamva mvana akili mwenga, na mvalavya nguvu zao na mamulaka kpwa iye munyama. ¹⁴ Mvandaminyana kahi yao na Mwanang'onzi. Ala Mwanang'onzi andamvashinda kpwa kukala ni Bwana wa mabwana na Mufalume wa afalume-na mvarionaye ndimvo mvarioehewa, mvariotsagulwa, na mvario aminifu." ¹⁵ Iye malaika achinamba, "Garatu madzi udzigogona, haho adzihosagala yuya kahaba, ni atu, mikutano ya atu, mataifa na makabila. ¹⁶ Zira pembe kumi udzizozona-mvamvo na iye munyama mvandamutsukirirwa yuyatu kahaba. Mvandamuhenda kukala mupweke na huhu, mvandamurya mwiriwe, na mvandawocha na moho. ¹⁷ Kpwa kukala Mulungu adzika mioyoni mwao kuhenda kusudire kpwa makubaliano ga kumupa munyama nguvu zao kumutawala mpaka maneno ga Mulungu gandihotimira. ¹⁸ Yuya mwanamuche udziyemona ni mudzi uratu mubomu uriwo na nguvu za kutawala afalume a intsi."