¹ Garihotsupa gaga, nemona malaika munjine achitimatsi kula mulunguni. Iye wekala na mamulaka mabomu, na intsi yelangazwa kpwa utukufuwe. ² Achirira kpwa sauti bomu, achamba, "Udzegbwa, udzegbwa wo mudzi mubomu Babeli! Udzikala makalo ga mapepo, jela ya chila roho chafu, jela ya chila tsongo muchafu, jela ya chila munyama muchafu na atsukizaye. ³ Kpwa kukala mataifa gosi gadzenwa divai ya tamaa ya usheratiwe. Afalume a intsi mvadzizinga naye. Ahenzi biashara a intsi mvakala matajiri kpwa nguvu za maishage ga anasa." ⁴ Kisha nichisikira sauti nyinjine kula mulunguni ichamba, "Kulaeni kpwakpwe, atu angu, musidze mukashiriki kahi za dambize, mukahochera mapigo gamulengago gogosi. ⁵ Dambize zirundikana hehi zifike mulunguni, naye Mulungu yugakumbuka mahendoge mai. ⁶ Muriheni naye here arivyo mvariha anjine, kamuriheni mara mbiri ya go arigohenda; kahi za chikombe aricho tsanganya, iye mutsanganyireni mara mbiri. ⁷ Here arivyo dzitukuza iye mwenye, na achi-ishi kahi za anasa, mupeni mateso sawasawa hamwenga na sumazi. Kpwa kukala nikpwamba moyoni mwakpwe, "Nisegere here malikia; Mino si gungu, wala sindaona maombolezo.' ⁸ Kpwa vivyo kpwa siku mwenga mapigoge gandadza: chifo, maombolezo, na nzala. Andaochwa moho, kpwa kukala Bwana Mulungu ni mubomu, na ndiye hakimuwe." ⁹ Afalume a intsi mvariozini na kutsanganyikirwa hamwenga naye mvandarira na komboleza mvandihowona mosi wa kushakpwe. ¹⁰ Mvandema kure naye kpwa woga wa maumivuge mvachamba, "Shaka, shaka kpwa mudzi mubomu, Babeli, mudzi wa nguvu! Kpwa kahi za risaa rimwenga, hukumuyo ifika." ¹¹ Ahenzi biashara a intsi, mvarira na kuomboleza, kpwa kukala kakuna hata mumwenga agulaye vituvye keheri- ¹² mali za dhahabu, fedha, mawe ga thamani, lulu, kitani mbidzo, zambarau, hairi, tune, aina zosi za mihi ya kungu mbidzo, chila chombo cha pembe, chila chombo chiricho tengezwa kpwa mihi ya thamani, shaba, chuma, mawe. ¹³ mudalasini, vilungo, uvumba, manemane, ubani, divai, mafuha, unga mudzo, ngano, ng'ombe na ng'onzi, farasi na magari na ahumwa, na roho za atu. ¹⁴ Matunda urigo ga-aza kpwa nguvuzo gadzuka kula kpwako. Anasazo zosi na mapambo gadzangamika, kagandapatikana keheri. ¹⁵ Akuzaji a vitu vivi mvariopata utajiri kpwa mahenzoge mvandema kure naye kpwa woga wa maumivuge, mvachirira na kuomboleza kpwa sauti. ¹⁶ Mvandamba, "Shaka, shaka ra mudzi wo mubomu uriwovikpwa kitani mbidzo, zambarau, na tune, na kupambwa kpwa dhahabu, na vitu vya thamani na lulu!" ¹⁷ Ndani ya risaa rimwenga utajiri wosi udzangamika." Chila nahodha we meli, chila baharia, na chila aishiye kpwa kukuluhira bahari wema kanda. ¹⁸ Mverira mvarihowona mosi wa kushakpwe. Mvachamba, "Ni mudzi hiwo uhalanao na mudzi uno mubomu?" ¹⁹ Mvetsuha vumbi dzulu ya vitswa vyao, na kurira, mvachombolwa ni matsozi na komboleza, "Shaka, shaka mudzi mubomu ambawo atu osi mvariokala na meli zao baharini mvekala matajiri kula kpwa malize. Ndani ya risaa rimwenga udzangamizwa." ²⁰ "Furahini dzuluye, mulunguni na mwimwi atakatifu na mitume na manabii, kpwa kukala Mulungu adzireha hukumu yenu dzuluye." ²¹ Malaika mubomu achihala iwe here dziwe bomu ra kusagira achiritsuha baharini, achamba, "Kpwa njira ii, Babeli, ura mudzi mubomu, undatsuhiwatsi kpwa ukatili na kaundonekana keheri. ²² Sauti ya vinanda, anamuziki, apiga firimbi, na tarumbeta kamvandasikirika keheri kpwenu. Wala fundi wa aina yoyosi kandonekana kpwenu. Wala sauti ya chinu kaindasikirika keheri kpwenu. ²³ Mulangaza wa taa kaundang'ala ndaniyo keheri. Sauti za bwanaharusi na bibiharusi kazindasikirwa keheri ndaniyo, kpwa kukala ahenzi biasharao mvekala abomu a intsi, na mataifa mvachikengbwa kpwa utsaiwo. ²⁴ Ndaniye mulatso wa manabii na atakatifu a Mulungu wepatikana, na mulatso wa osi mvarolagbwa dzulu ya intsi."