¹ Garihosira gago nichisikira sauti ya muriro mubomu here wa kundi bomu ra atu kulaa mulunguni richamba, "Haleluya! Wokofu, utukufu na nguvu ni za Mulungu wehu. ² Hukumuze ni za jeri na hachi, kpwa kukala adzimuhukumu iye kahaba mubomu ariye ibananga intsi kpwa uzinziwe. Adzirihiza chisasi cha mulatso wa ahenzikazie, kula kpwa mukonowe." ³ Kpwa mara ya hiri mvachamba: "Haleluya! Mosi undamombola milele na milele." ⁴ Mvara atumia ishirini na anne na viumbe anne mvachigbwa mvachimusujudia Mulungu, ariyesagala chihi cha enzi. Mvekala mvachamba, "Amina. Haleluya!" ⁵ Ndiho sauti ichombola kula kpwa cho chihi cha enzi, ichamba, "Mulikeni Mulungu wehu, mwimwi atumishie, mwimwi mumogohao, mwimwi muso-umuhimu na enye nguvu." ⁶ Ndiho nichisikira sauti here ya kundi bomu ra atu, here ngurumo ya madzi manji, na here ngurumo ya chigbwaragbwara ichamba, "Haleluya! kpwa kukala Bwana Mulungu wehu, ni mubomu, na ni mutawala dzulu ya vyosi. ⁷ Hushangilieni na kufurahi kisha humupe utukufu! Kpwa kukala sherehe ya harusi ya Mwanang'onzi ifika, na muharusiwe adzidziika tayari. ⁸ Weruhusiwa kuvalishwa chitani safi na chenye kung'alang'ala" (Chitani safi ni mahendo ga hachi ga atakatifu a Mulungu). ⁹ Malaika achinamba, "Gandike gaga: Mvabarikiwa mvario alikpwa kpwa sherehe ya harusi ya Mwanang'onzi." Pia achinamba, "Gaga ndigo maneno ga jeri ga Mulungu." ¹⁰ Ndiho nirihogbwa chifudifudi maguluni mwakpwe kumusujudia, ala achinamba, "Usihende vivyo! Mimi ni mutumishi munzio na nduguzo mvario na ushuhuda wa Jesu. Musujudie Mulungu, kpwa kukala ushuhuda wa Masihi ndiyo roho ya unabii." ¹¹ Kisha nichona mulunguni kufuguka, niriholola nichona farasi mweruhe. Ariyekala achimwendesha wehewa mwaminifu na jeri. Hukumuye ni ya hachi na kupigana viha. ¹² Matsoge ni here muyale wa moho, na dzulu ya chitswa ana taji nyinji. Anadzina ririro andikpwa dzuluye arimanyaye iye mwenye hacheye. ¹³ Avalishwa vazi rirovikpwa ndani ya mulatso, na dzinare wehewa Neno ra Mulungu. ¹⁴ Majeshi ga mulunguni gemutua dzulu ya farasi eruhe, mvarovishwa chitani chidzo, cheruhe na safi. ¹⁵ Mulomoni mwakpwe kpweombola upanga uriwo na makali ambawo nikpwangamiza mataifa, naye andamvatawala kpwa ndata ya chuma. Wakamula divai kahi za muhambo kutengezera divai ya koro za Mulungu. ¹⁶ Naye adzandikpwa dzina dzulu ya vazire na kahi za pajare: "Mufalume wa afalume na Bwana wa mabwana." ¹⁷ Kisha nichona malaika adzema dzuani. Acheha kpwa sauti bomu tsongo mvosi mvaurukao dzulu, "Nzoni, kusanyikanani hamwenga kpwa sherehe bomu ya Mulungu. ¹⁸ Nzoni murye nyama za afalume, nyama za atu hodari, nyama za atu abomu, nyama za farasi na mvendeshao farasi, na nyama za atu mvosi, mvariohuru na atumwa, mvasokala na umuhimu na enye nguvu." ¹⁹ Nemona yuya munyama na afalume a intsi hamwenga na majeshi gao. Mvekala mvadzidzipanga kpwa mipango ya kupigana viha na iye arekala wendesha farasi hamwenga na jeshire. ²⁰ Iye munyama wegbwirwa hamwenga na nabiiwe wa ulongo ariye-ihenda miujiza mbereze. Kpwa kukala kuchirira miujiza ii weakenga aratu mvariochihochera chapa cha munyama na mvario ipigira mavindi sanamuye. Mvosi airi mvetsuhiwa mvachere moyo kahi za zia ra moho wakao kpwa chibiriti. ²¹ Mvo mvarosala mveolagbwa kpwa upanga uriwo ombola mulomoni mwa yuya mumwenga ariye-endesha farasi. Tsongo mvosi mvachirya nyama zao.