¹ Kisha nichona malaika achitima kula mulunguni. Mukononi agbwirira ufunguo wa riro dingbwi risiro na mwisho, na nyugbwe nyire ya chuma. ² Achirigbwira ro joka, ra kapindi, ariye ni ibilisi au pepo, naye achimufunga miaka elifu. ³ Achimutsuha kpwenye riro dingbwi risiro na mwisho. Achirifunga na achirenjiza muhuri dzuluye. Wefungirwa vivi ili asimvakenge mataifa keheri mpaka miaka elifu indihosira. Baada ya haho, lazima arichwe huru kpwa muda muchache. ⁴ Kisha nichona vihi vya enzi. Mvariovisagalira ni mvo mvaropewa mamulaka ga kuhukumu. Nichona pia roho za mvo mvariokala mvakatwa vitswa kpwa kumushuhudia Masihi na kpwa neno ra Mulungu. Kamvawahire kumusujudia iye munyama wala sanamuye na mvekahala kuihochera iyo alama dzulu ya virangu vya nyuso zao au mikononi mwao. Nao mvachifufuka na mvachitawala hamwenga na Masihi kpwa miaka elifu. ⁵ Nyufu zirizosala kazifufukire mpaka miaka elifu irihosira. Uu ndiwo ufufulo wa kpwanza. ⁶ Anabaha na ni mutakatifu mutu yoyosi andiyeshiriki kahi za ufufulo wa kpwanza! Chifo cha hiri kachina nguvu dzulu ya atu mvamva. Mvandakala makuhani a Mulungu na Masihi na mvandatawala naye kpwa miaka elifu. ⁷ Wakati miaka elifu indihosira, pepo andarichirwa kula jela. ⁸ Andakpwenda mvakenga mataifa kahi za pembe zosi nne za dunia-Gogu na Magogu-kumvareha hamwenga kpwa ajili ya viha. Mvandakala anji here mutsanga wa baharini. ⁹ Mvachipanda dzulu ya intsi, kpwenye tambarare mvachizunguluka kambi za atakatifu a Mulungu-mudzi uhenzwao. Ala moho wetima kula mulunguni uchimvangamiza. ¹⁰ Pepo, ariye mvakenga, wetsuhiwa ndani ya zia rakaro moho wa chibiriti, ambamo iye munyama na nabii wa ulongo mvekala mvadzenjizwa. Mvandateswa mutsana na usiku milele. ¹¹ Kisha nichona chihi chibomu cheruhe cha enzi na iye achisagaliraye. Dunia na mbingu zechimbira kure naye, ala kakukalire na hakpwenda. ¹² Nichona mvariofa-abomu na mvario dharauliwa-mvadzema mbere za chihi cha enzi, navyo vitabu vichifugulwa. Kisha chitabu chinjine chichifugulwa-Chitabu cha Uzima. Afu mvachihukumiwa kpwa vyo vireandikpwa mo-vitabuni, sawa na mahendo gao. ¹³ Bahari yeomboza nyufu zirizokala ndaniye. Chifo na kuzimu zichomboza nyufu zirizokala ndaniye, nao afu mvehukumiwa kulingana na mahendo gao. ¹⁴ Chifo na kuzimu zetsuhiwa ndani ya zia ra moho. Chichi ni chifo cha hiri-zia ra moho. ¹⁵ Ichikala dzina ra mutu yoyosi karipatikanire ndani ya Chitabu cha Uzima, wetsuhiwa ndani ya zia ra moho.