¹ Kisha nichona mbingu mbisha na dunia mbisha, kpwa kukala mbingu ya kpwanza na dunia ya kpwanza zekala zitsupa kare na bahari nayo kayonekanire keheri. ² Newona mudzi mutakatifu, Jerusalemu mbisha, ichitimatsi kula mulunguni kpwa Mulungu, uriwo andazwa here bibi harusi adziyepambwa kpwa ajili ya mulumewe. ³ Nichisikira sauti bomu kula kpwenye chihi cha enzi ichamba, "Lola! Makalo ga Mulungu ga hamwenga na adamu, naye andaishi hamwenga namvo. Mvandakala atue na Mulungu mwenye andaishi namvo na andakala Mulungu wao. ⁴ Andafuta chila tsozi kula kpwa matso gao na kahandakala na chifo keheri au kuomboleza au kurira au mavune. Mambo ga kapindi gatsupa. ⁵ Iye ariye wekala asegere dzulu ya chihi cha enzi weamba, "Lola! Nahenda mambo gosi kukala masha." Achamba, "Andika riri kpwa kukala maneno gaga ni ga uhakika na jeri." ⁶ Achinamba, "Mambo gaga gatimira! Mimi ndimi Alfa na Omega, ndimi mwanzo na mwisho. Kpwa iye ariye na chihu ninda mupa chinwadzi bule kula kpwa chemi chemi za madzi ga uzima. ⁷ Iye mushindi andagarithi mambo gaga, nami nindakala Mulunguwe, naye andakala mwanangu. ⁸ Ala kpwa mvo-oga, mvasio amini, mvatsukizao, olagi, azinzi, atsai, mva-abuduo sanamu, na alongo osi, hatu hao indakala ndani ya zia ra moho wa chibiriti wochao. Chicho ndicho chifo cha hiri." ⁹ Mumwenga kahi za malaika mvo afungahe achidza kpwangu, iye ariyekala na mabakuli mafungahe garigodzala mapigo mafungahe ga mwisho, achinamba, "Nzo hano. Nami nindakonyesa ye bibi harusi, muche wa iye Mwanang'onzi." ¹⁰ Kisha achinihala kahi za Roho mpaka kpwenye murima mubomu na mure achinonyesa wo mudzi mutakatifu, Jerusalemu, uchitimishwa kula mulunguni kpwa Mulungu. ¹¹ Jerusalemu yekala na utukufu wa Mulungu, mulangazawe wekala here mufano wa iwe ra thamani, here iwe ring'alaro mufano wa chilolo chiricho safi cha yaspi. ¹² Wekala na ukuta mubomu, mure wenye miyango kumi na miri, hamwenga na malaika kumi na airi miyangoni. Dzulu ya miyango hekala hadzandikpwa madzina ga mbari kumi na mbiri za ana a Israeli. ¹³ Upande wa mombolero ga dzuwa hekala na miyango mihahu, upande wa vurini miyango mihahu, upande wa mwakani miyango mihahu, na upande wa kutswani kpwa dzua, miyango mihahu. ¹⁴ Ukuta wa mudzi wekala na misingi kumi na miri, na dzuluye geandikpwa madzina kumi na mairi ga mitume kumi na eri a Mwanang'onzi. ¹⁵ Iye ariye sumurira nami wekala na chipimo cha ndata iriyotengezwa kpwa dhahabu kpwa ajili ya kupima mudzi, miyangoye na ukutawe. ¹⁶ Mudzi wejengbwa chi miraba; urewe wekala sawa na walamuwe. Weupima mudzi kpwa chicho chipimo cha ndata, vipimo elifu kumi na mbiri (12,000) kpwa ure, (urewe, upanawe na chimoche vyehalana). ¹⁷ Achiupima pia ukutawe, uzihowe wekala dira gana mwenga, mirongo minne na nne (144) kpwa vipimo vya chidamu (ambavyo pia ni vipimo vya chimalaika.) ¹⁸ Ukuta wekala ujengbwa kpwa mawe madzo ga kung'ala here yaspi nawo mudzi kpwa dhahabu safi, ing'alayo here chilolo. ¹⁹ Misingi ya ukuta yekala ipambwa kpwa chila aina ya dziwe ra thamani ra kpwanza rekala yaspi, ra hiri rekala yakuti samawi ra hahu rekala kalikedoni, ra nne zumaridi, ²⁰ ra tsano rekala saridoniki, ra tandahu rekala akiki, na ra fungahe rekala kirisolitho, ra nane rekala zabarajadi, ra chenda rekala yakuti ya manjano, ra kumi rekala ra kirisipraso ra kumi na mwenga rekala hiakinitho, ra kumi na mbiri rekala amethisito. ²¹ Iyo miyango kumi na miri yekala lulu tuhu kumi na mbiri; na chila muyango wetengezwa kula kpwa iyo lulu mwenga. Vichochoro vya mudzi vyekala vya dhahabu safi, yonekanayo here chilolo safi. ²² Sonere hekalu rorosi ndani ya mudzi kpwa kukala Bwana Mulungu, ambaye watawala dzulu ya vyosi, na Mwanang'onzi ndiye hekalure. ²³ Mudzi kaumalire dzua au mwezi kulangazirwa kpwa kukala utukufu wa Mulungu weng'ala dzuluye na taare ni Mwanang'onzi. ²⁴ Mataifa mvandahumira mulangaza wa mudzi uwo. Afalume a dunia mvandareha utukufu wao ndaniye. ²⁵ Miyangoye kaindafungbwa mutsana, wala kakundakala na usiku kuko. ²⁶ Mvandareha utukufu na heshima za mataifa ndaniye. ²⁷ Na kakuna najisi wala chichafu chindichoenjira ndaniye wala yoyosi ambaye wehenda dzambo rorosi rakutsukiza au ra ulongo, ala ni mvaratu ambamvo madzina gao geandikpwa kahi za Chitabu cha Uzima cha Mwanang'onzi.