¹ Kisha malaika achinonyesa muho wa madzi ga uzima, madzi gang'alago here bilauri au chilolo. Gekala gachijururika kula kahi za chihi cha enzi cha Mulungu na cha Mwanang'onzi ² kuchirira kahi ya lalo ra mudzi. Kula chila luhande lwa muho hekala na muhi wa uzima, uvyalao aina kumi na mbiri za matunda na nikuvyala matunda chila mwezi. Makodza ga uwo muhi ni ga kulagula mataifa. ³ Kakundakala na laana yoyosi keheri. Chihi cha enzi cha Mulungu na cha Mwanang'onzi chindakala mo ndani ya mudzi, na atumishie mvandamuhumikira. ⁴ Mvandamona usowe, na dzinare rindakala dzulu ya virangu vya nyuso zao. ⁵ Kakundakala na usiku keheri wala kakundakala na haja ya mulangaza wa taa wala mulangaza wa dzua kpwa kukala Bwana Mulungu andamvalangazira. Mvandatawala milele na milele. ⁶ Malaika achinambira, "Maneno gaga nigakpwaminika na ga ujeri. Bwana, Mulungu wa roho za manabii, wemuhuma malaikawe kumvonyesa atumishie chindicho-ombolera vivi karibuni." ⁷ "Lola! Nadza upesi! Anabaha iye agaheshimuye maneno ga unabii wa chitabu chichi." ⁸ Mimi, Johana, ndimi niriyegasikira na kugaona mambo gaga. Nirihogasikira na kugaona, negbwatsi mbere ya magulu ga malaika ili nimusujudie, malaika ariyenonyesa mambo gaga. ⁹ Achinamba, "Usihende vivyo! Mimi ni mutumishi munzio, hamwenga na nduguzo manabii, hamwenga na mvamvo mvagagbwirago maneno ga chitabu chichi. Mwabudu Mulungu!" ¹⁰ Kisha achinambira, "Usigenjize muhuri maneno ga unabii wa chitabu chichi, kpwa kukala wakati uhehi. ¹¹ Iye asiyehachi, enderere kudzi chafua. Ariye muchafu, enderere kukala muchafu. Mwenyehachi na enderere kukala wa hachi. Ariye mutakatifu na enderere kukala mutakatifu." ¹² "Lola! Nadza upesi. Ujira wangu u hamwenga nami, kumuriha chila mumwenga, sawa na mahendoge arigohenda. ¹³ Mimi ndimi Alfa na Omega, wa kpwanza na wa mwisho, mwanzo na mwisho. ¹⁴ Mvanabaha aratu mvafulao nguo ili mvapate hachi ya kurya kula muhi wa uzima na kpwenjira mudzi kuchirira miyangoni mwakpwe. ¹⁵ Nze kuna kuro, atsai, azinzi, olagi, abudu sanamu na chila ahenzaye na ashuhudiaye ulongo. ¹⁶ Mimi, Masihi, nidzimuhuma malaika wangu kumvashuhudia dzulu ya mambo gaga kpwa makanisa. Mimi ndimi muzi wa lukolo lwa Daudi, nyenyezi ya madzacha ing'alayo." ¹⁷ Roho na Bibiharusi mvamba, "Nzoni! iye asikiraye na ambe, "Nzo!" yoyosi ariye na chihu na adze na yoyosi agatamaniye, na agapate madzi ga uzima wa bule. ¹⁸ Namushuhudia chila mutu asikiraye maneno gaga unabii wa chitabu chichi: Yoyosi andiye onjeza kahi ya gago, Mulungu andamonjeza mapigo garigo andikpwa ndani ya chitabu chichi. ¹⁹ Yoyosi andiye hunguza maneno ga chitabu chichi cha unabii, Mulungu andahunguza sehemuye kahi za muhi wa uzima na kahi za mudzi mutakatifu, ambawo habarize zidzandikpwa ndani ya chitabu chichi. ²⁰ Iye ashuhudiaye mambo gaga wamba, "Ndevyo! Nadza upesi." Amina! Nzo, Bwana Jesu! ²¹ Neema ya Bwana Jesu ikale na mvosi. Amina.