¹ "Kpwa malaika wa kanisa ririro Efeso andika: 'Maneno ga iye agbwiraye nyenyezi fungahe mukonowe wa kulume na enendaye kahi za minara mifungahe ya dhahabu wamba vivi, ² "Namvamanya mahendo genu, kazi zenu mbifu, na uvumirivu wenu, na kpwamba kamuweza kuvumirira atu aovu, ala mudziajeza mvosi mvadzehao mitume bali semvo, namwi mudziamanya kukala ni alongo. ³ Mwavumirira manji kpwa ajili yangu wala kamudzatsoka. ⁴ Ala si hamwenga namwi kpwa ujeri kpwamba mudzigaluza henzo renu ra kpwanza. ⁵ Kumbukani bai muriko hungukirwa ni henzo renu. Tubuni na muhende mambo murigokala muchigahenda kula mwanzo. Musihotubu, nindakudza nimvausire munara wenu. ⁶ Ala muna riri: Mwadzitenga na mahendo ga a-Nikolai, ambago hata mimi sigenzi. ⁷ Iye mwenye sikiro, na asikire maneno anenago Roho kpwa makanisa. Kpwa iye ashindaye, nindamupa hachi ya kurya kula kpwa muhi wa uzima wa milele, uriwo kahi ya paradiso ya Mulungu." ⁸ "Kpwa malaika ariye Smirina, andika: "Gaga ndigo maneno ganenwago ni iye ariye ni mwanzo na mwisho, iye ariyekala yudzefa kisha achifufuka: ⁹ "Namanya mateso genu na umasikini wenu, ala mumatajiri. Namanya ulongo wa mvamvo mvadzehao ni Ayahudi, ala sevyo. Ni hekalu ra shetani. ¹⁰ Musogoheni go murigo kamukure kugona. Lolani! Ibilisi yuhehi kumvenjiza anjine enu chifungoni ili mutsupire majezo, namwi mundateseka kpwa siku kumi. Kalani aminifu mpaka kufa, nami nindamvapa uzima wa milele. ¹¹ Iye ariye na masikiro, na asikire go Roho ambirago makanisa. Iye andiyeshinda, kandawahi kudhurika na chifo cha hiri."" ¹² "Kpwa iye malaika ariye kanisa ra Perigamum, andika: 'Gaga ni maneno ga iye ariye na upanga ukatao kosikosi: ¹³ "Namanya kuko muishiko, na kuko ndiko chihi cha shetani chiriko. Idzaho mudzirigbwirira sawasawa dzina rangu. Namanya kukala kamudzateteleka chi imani kpwangu hata siku za Antipa ariye shahidi wangu na mwaminifu kpwangu, ariye olagbwa kahi yenu, kuko shetani aishiko. ¹⁴ Ala nina mambo machache gamvayugago: Muna mumwenga kahi yenu ariye achere kugbwira mafundisho ga Balamu, iye ariye mufundisha Balak kumvaudzya nyuma ana a Israeli kpwa kumvalakiza kurya nyama zirizolaviwa sadaka kpwa vigango na kukala azinzi. ¹⁵ Hali iyo, anjine kahi yenu mvachere kutua mafundisho ga Anikolai. ¹⁶ Tubuni bai! Musihotubu, nindadza haraka sana, nami nindapigana namvo kpwa upanga uriwo mwangu kanwani. ¹⁷ Iye ariye na masikiro, na asikire gago anenago Roho wa Bwana kpwa makanisa. Kpwa iye andiyeshinda, nindamupa sehemu ya go madzo gadzigofitswa, kisha nindamupa iwe reruhe renye dzina risha ridziro andikpwa kpwenye riro iwe, dzina ambaro kakuna arimanyaye isihokala iye arihocheraye." ¹⁸ "Kpwa malaika ariye kanisa ra Thiyatira andika: ' Gaga ndigo maneno ga Mwana wa Mulungu, ariye na matso here miyale ya moho na magulu here alimasi idzosafishwa: ¹⁹ "Nagamanya mahendo genu: henzo renu na imani yenu na huduma yenu na uvumirivu wenu. Namanya kukala go murigo gahenda karibuni gatsupa go murigo gahenda mwanzo. ²⁰ Ala nina gaga dzulu yenu: Mwamukaribisha Jezebeli kahi yenu, iye adzehaye nabii wa chiche. Kpwa mafundisho ga kpwakpwe, wamvakenga atumishi angu kuhenda zinaa na kurya vyakurya vya sadaka kpwa vigango. ²¹ Nemupa muda kutubu, ala katayari navyo. ²² Lolani! Nindamwika chitandani kpwa makongo, na mvamvo mvazinio naye mvandenjira kahi za mateso, labuda mvatubu kpwa dambize. ²³ Nindamvolaga anae, na makanisa gosi mvandamanya kukala ndimi nitafutaye fikira na mawazo ga rohoni. Nindamupa chila mumwenga wenu sawa na mahendo genu. ²⁴ Ala kpwa anjine enu, yoyosi ariye kagbwira mafundisho gaga na kamanya go gehewago mambo ga ndani ga shetani-kpwenu namvambira, 'Sindamvapa musigo wa kutsupa.' ²⁵ Chivyovyosi, gbwirani murichonacho tototo, mpaka nindihokudza. ²⁶ Iye andiyeshinda na kuhenda mahenzo gangu, hadi mwisho, nindamupa uwezo na mamulaka dzulu ya mataifa. ²⁷ Andamvatawala na mukono wa nguvu, na here vidzungu vya udongo andamvavunza vipande vipande.' ²⁸ Here tu vyo nirivyo hochera kula kpwa Paba, iye pia nindamupa nyenyezi ya kpwanza ya madzacha, ²⁹ Iye ariye na masikiro na asikire go anenago Roho kpwa makanisa."