¹ "Kpwa malaika ariye kanisa ra Asadi andika: 'Gaga ndigo maneno anenago iye agbwiraye zo Roho fungahe za Mulungu na nyenyezi fungahe. "Nagamanya mahendo genu. Muna dzina ra kpwambwa mumoyo, ala mwefa. ² Lamukani mudzipe nguvu ili mokole cho chichache chiricho moyo ambacho kachikure kufa, kpwa kukala sidzaona mambo genu kukala makamilifu mbere za Mulungu. ³ Kumbukani, cho muricho hochera na kuchisikira. Chiheshimuni, na mutubu. Ala musiholamuka, be nindadza here mwevi, wala kamundamanya uwo wakati nindihokudza. ⁴ Ala muna madzina machache kahi yenu Asadi, ga atu ambamvo kamvadzachafua nguo zao, namvo mvandza tsembera nami, na magbwanda meruhe, kpwa kukala mvasitahili. ⁵ Iye andiyeshinda andavishwa gbwanda reruhe, na sindawahi kufuta dzinare kahi za chitabu cha uzima, nami nindamukiri mbere za Paba, na mbere za malaika akpwakpwe. ⁶ Iye ariye na masikiro, na asikire gago Roho anenago kpwa makanisa." ⁷ "Kpwa malaika wa kanisa ririro Filadelfia andika: 'Gaga ni maneno galanago kpwa iye ariye mutakatifu na mujeri-agbwirira funguo ya Daudi, achifugula kakuna awezaye kufunga, na achifunga kakuna mufuguli. ⁸ ""Namanya mahendo genu. Lolani, Nidzika mbere zenu muyango urio lwazu ambao kakuna awezaye ku-ufunga. Namanya kukala muna nguvu chache muno, ala mudziheshimu neno rangu wala kamudzawahi kurikana dzina rangu. ⁹ Lolani! Nindamvahenda mvamvo mvario a hekalu ra shetani, mvamvo mvadzehao Ayahudi a ulongo-Nindamvahenda mvadze mvashutame mbere zenu, kisha mvandamanya kukala namvahenza. ¹⁰ Kpwa kukala mudzitii amuri zangu, kuvumirira, nindamvatenga wakati wa majezo udzao urimwengu muzima, kumvajeza ao mvaishio duniani. ¹¹ Siku zangu kudza zihehi. Gbwirani murichonacho ili mutu asimvahoke taji zenu. ¹² Andiye shinda nindamuhenda nguzo kahi za hekalu ra Mulungu wangu. Kandawahi kombola keheri, nami nindamwandika dzina ra Mulungu wangu, na dzina ra mudzi wa Mulungu wangu (Jerusalemu mbisha, indiyotima kula mulunguni kpwa Mulungu wangu), na dzina rangu risha. ¹³ Iye ariye na masikiro, asikire go anenago Roho kpwa makanisa." ¹⁴ "Kpwa malaika ariye Laodikia andika: 'Gaga ndigo maneno ga iye Amina, wa kutegemea na shahidi wa jeri, mutawala wa viumbe vyosi vya Mulungu. ¹⁵ "Namvamanya mahendo genu na kukala kamumoho wala peho. Naaza mundekala mumoho ama peho! ¹⁶ Sasa bai, kpwa kukala muloholoho-kamumoho wala kamupeho-Nihehi kumvahahika kula mwangu kanwani. ¹⁷ Kpwa kukala mwamba, 'Mino ni tajiri, nina mali nyinji, wala simala chitu.' Ala kamumanya kukala mwimwi ndimwi achia, musitahilio konerwa mbazi, vipofu na muriohuhu. ¹⁸ Sikizani maaro gangu: Gulani kula kpwangu dhahabu idziyochizwa kahi za moho ili mukale matajiri, na muvishwe magbwanda meruhe ili mufitse aibu ya kukala huhu, na mung'azwe matso ili muweze kona. ¹⁹ Mino nikuchemera na kumwenjiza akili yoyosi nimuhenzaye. Kpwa vivyo, kalani makini na mutubu. ²⁰ Lolani, nidzema muyangoni nabisha. Yoyosi aisikiraye sauti yangu akafugula, nindenjira mwakpwe nyumbani na kurya naye, naye arye nami. ²¹ Andiyeshinda, nindamupa hachi kusagala nami kpwenye chihi cha enzi, dza vivyo mimi nirivyosagala na Paba kahi za chihiche cha enzi. ²² Iye ariye na masikiro, na asikire go anenago Roho kpwa makanisa.""