¹ Uu ndiwo ufunulo wa Jesu Masihi Mulungu ariwo mupa ili amvonyese atumishie go garigo ni lazima gombolere karibuni. Wehenda gamanyikane kpwa kumuhuma malaikawe kpwa mutumishiwe Johana, ² ariyeshuhudia dzulu ya neno ra Mulungu na ushuhuda wa Jesu Masihi, mambo gosi arigo gaona. ³ Mubarikiwa ni iye andiyesoma kpwa sauti unabii uu na mvamvo mvandiosikiza maneno ga unabii uu na kutii garigo andikpwa kahi za unabii uu, kpwa kukala wakati uhehi kufika. ⁴ Johana, kpwa makanisa gosi mafungahe Asia: Neema naikale hamwenga namwi na amani kula kpwa iye ariyeko, ariyekalako, na andiyekalako, na kula kpwa roho zizo fungahe zirizo mbere ya chihiche cha enzi, ⁵ na kula kpwa Jesu Masihi, ariye ndiye shahidi mwaminifu, chifugula tumbo kula kpwa mvariofa, na mutawala wa afalume a dunia. Kpwa iye ahuhenzaye na kuhwika huru kula kpwa dambi zehu kuchirira mulatsowe- ⁶ adzihutengezera ufalume, na kuhuhenda makuhani a Pabaye Mulungu-kpwakwe iye nakukale na utukufu na nguvu milele na milele. Amina. ⁷ Lolani, andadza na maingu; chila dzitso rindamona, hamwenga na mvamvo mvariomudunga mafumo. Kabila zosi za dunia mvandaomboleza kpwa ajiliye. ⁸ "Mimi ndimi wa kpwanza na wa mwisho," wanena Bwana Mulungu, "Mimi niriyeko, niriyekalako na nindiyekalako, Mubomu wa vyosi." ⁹ Mimi, Johana-ndugu yenu na niriyeshirika kahi za mateso na ufalume na niriye muvimirivu kahi za Jesu-nekala kahi za chisiwa chehewacho Patimo kpwa ajili ya kuhubiri neno ra Mulungu na ushuhuda dzulu ya Jesu. ¹⁰ Nekala kahi za Roho siku ya Bwana. Nichisikira nyuma yangu sauti bomu here ya tarumbeta. ¹¹ Ichamba, "Gandike gaga ugonago kpwenye chitabu, na ugahume kpwa makanisa gosi mafungahe-kpwa Aefeso, kpwa Asimirina, kpwa Aperigamo, Athietira, Asadi, Afiladelifa na Alaodikia." ¹² Nichigaluka nilole sauti iyo yekala ya ani, nami nirihogaluka nichona minara ya mataa mifungahe ya dhahabu. ¹³ Kahikahi ya minara iyo, wekala adzema mutu here Mwana wa Adamu, avala gbwanda rire ririrokala rimufikira nyayoni na chifuani wekala na ngao ya dhahabu. ¹⁴ Chitswache na nyere zekala ni nyeruhe here pamba-nyeruhe here barafu-na matsoge gekala here miyale ya mulangaza wa moho. ¹⁵ Maguluge gekala here alimasi iriyochizwa kahi za moho, na sautiye yekala here ngurumo ya madzi. ¹⁶ Wekala agbwirira nyenyezi fungahe ganzare ra mukono kulume, na upanga ukatawo kosikosi wekala wombola mulomoni mwakpwe. Usowe weng'ala here dzua kali. ¹⁷ Nirihomona, nichimugbwerera maguluni here lufu. Achinikira mukonowe wa kulume, achinamba, "Usogohe. Mimi ndimi wa kpwanza na wa mwisho ¹⁸ na ndimi ni-ishiye. Nefa, ala lola, naishi milele na milele! Na ndimi niriye na funguo za chifo na kuzimu. ¹⁹ Kpwa vivyo bai, gandike gago udzegona, ugonago sasa na undigo gaona kutsupa gaga. ²⁰ Ala kpwa maana ya ndani ya zo nyenyezi fungahe udzizozona mukono wangu wa kulume, na yo minara mifungahe ya dhahabu: Zo nyenyezi fungahe ni malaika a go makanisa mafungahe, na yo minara mifungahe ni gago makanisa mafungahe."