¹ Ndugu zangu, si mosi murio na mweho wa kukala alimu, kpwa mwamanya kukala sisi hufundishao hundahochera hukumu bomu zaidi. ² Kpwa kukala hosi hakosera kahi za njira nyinji. Ichikala kakuna yoyosi adzikpwalaye kahi za manenoge, be iye mutu ni mukamilifu, waweza kuwendeshato mwiriwe wosi pia. ³ Sasa ichikala havisha lijamu farasi kahi za milomo yao ili mvahuheshimu, pia haweza kpwendesha miri yao yosi. ⁴ Ririkanani meli, idzaho ni bomu ala nikusukumwa ni peho kali, na ikalongozwa ni usukani mutite sana kpwenda kokosi ahenzako nahodha. ⁵ Hali iyo mwenga, lulimi ni chilungo chitite cha miri yehu, ala nikudzilika kpwa mabomu. Ririkanani tsaka bomu riwezavyo kochwa kpwa tsetse za moho. ⁶ Lulimi nalo ni moho, ni urimwengu wa mai udziwoikpwa kahi za vilungo vya miri yehu. Lulimi nikunajisi mwiri muzima, ukawika dzulu ya moho njira ya maisha, kisha nawo ukochwa ni moho wa jehanamu. ⁷ Chila munyama wa vueni, tsongo, na chila chihambalacho na chiumbe cha baharini chatawalwa ni mudamu. ⁸ Ala kakuna mudamu hata mumwenga awezaye kutawala lulimi. Ni ui usiwo hurira, udzalwa ni sumu yolagayo. ⁹ Kutsupira lulimi hamutukuza Bwana na Paba yehu, na kutsupira lulo lulimi hamvalaani atu, ambamvo mveumbwa kpwa mufano wa Mulungu. ¹⁰ Kula kpwa mulomo mumwenga habariki na kulaani. Ndugu zangu, mambo gaga gasihendeke. ¹¹ Je, chisima chimwenga chaweza komboza madzi madzo na ga utsungu? ¹² Ndugu zangu, je, mutini waweza kuvyala zeituni, ama muzabibu ukavyala zeituni? Wala chemichemi ya madzi ga munyu kaiweza komboza madzi ga peho. ¹³ Ni hiye ariye na hekima na ufahamu kahi yenu? Mutu iye naonyese mahendoge madzo kahi za kaziye kpwa unyenyekevu ulao na hekima. ¹⁴ Ala ichikala unao wivu mukali na nia ya ubinafusi moyoni mwako, bai usidzivune na kunena ulongo ku-upanga ujeri. ¹⁵ Ii si hekima ilayo dzulu. Badalaye, ni ya chidunia, si ya chiroho ni ya chipepo. ¹⁶ Kpwa kukala hariho na wivu na tamaa, hana vurugu na chila hendo rovu. ¹⁷ Ala hekima ilayo dzulu, kpwanza ni safi, chisha nikuhenza amani, upore na iriyo tayari kusikiza, idzodzalwa ni mbazi na matunda madzo, bila ubaguzi na jeri. ¹⁸ Na tunda ra hachi ni kunyalwa kahi za amani kpwa mvarehao amani.