¹ Ndugu zangu, musigbwire imani ya Bwana Jesu Masihi, Bwana wa utukufu kpwa kumvahenzera atu fulani. ² Here mutu fulani achenjira kpwenye mukutano wenu adzivala pehe za dhahabu na mavazi madzo, kisha enjire masikini mwenye mavazi machafu. ³ Ichikala mundamulola iye adzevala nguo mbidzo mwambe, "Tafadhali uwe sagala haha hatu hadzo," ala mumwambe iye muchia, "Uwe sengera weme hara kanda," ama, "Sagala tsini ya magulu gangu," ⁴ je, kamuhukumiana mwimwi enye? Je kamukala a-amuzi enye maazo mai? ⁵ Sikizani, ndugu zangu ahenzwi, je, Mulungu katsagulire atu achia a urimwengu mvakale matajiri kahi za imani na kurithi ufalume wa Mulungu ariwo mva-ahidi mvamuhenzao? ⁶ Ala mudzimvakosera heshima achia! Je, si matajiri mvamutesao mwino? Je, semvo mvamuburutao kumvenjiza mahakamani? ⁷ Je, semvo mvarihukanaro dzina ambaro kpwa riro mweherwa? ⁸ Ichikala mwatimiza sheria kulingana na maandiko, "Muhenze jiraniwo here udzihenzavyo mwenye," bai mwahendato. ⁹ Ala muchimvahenzera baadhi ya atu, mwahenda dambi, na mwahukumiwa ni sheria kukala avunzaji a sheria. ¹⁰ Kpwa kukala yoyosi aheshimuye sheria yosi, hata akosere lumwenga, kisha wakala muvunzaji wa sheria yosi. ¹¹ Kpwa iye mumwenga ariyeamba, "Usizini" ndiye pia weamba, "Usolage." Ichikala kuzini ala wolaga, wakala udzivunza sheria ya Mulungu. ¹² Kpwa vivyo nenani na kuhenda mahendo here atu mvandiohukumiwa kpwa njira ya sheria ya uhuru. ¹³ Kpwa kukala hukumu nikudza hasiho na mbazi kpwa mvasio na mbazi. Mbazi ni kudzitukuza dzulu ya hukumu. ¹⁴ Mutu wapata faida yani, ndugu zangu, achamba ninayo imani kpwa Mulungu, ala kana mahendo madzo? Je, imaniyo yaweza kumokola mutu iye kahi za hukumu ya Mulungu? ¹⁵ Ichikala ndugu wa chilume au wa chiche kana nguo ama chakurya cha chila siku. ¹⁶ Mumwenga wenu amwambe, ''Enda kpwa amani, upate dzoho na wekuhe," bila kumupa chochosi muhimu cha mwiri, faidaye ni noni? ¹⁷ Hali iyo, imani hachaye, bila mahendo idzefa . ¹⁸ Ala mumwenga waweza akamba, "Ichikala we una imani be mino nina mahendo madzo." Nonyesa imaniyo hasiho mahendo, nami nindakonyesa imani yangu kpwa mahendo gangu. ¹⁹ Mwa-amini kukala Mulungu ni mumwenga; mwahendato. Ala hata pepo namvo mva-amini vivyo, namvo nikutetema. ²⁰ Je, wamala umanye, mpumbavu, imani hasiho mahendo madzo idzefa? ²¹ Je, si paba yehu Abrahamu ariyetalwa hachi kpwa mahendo arihomulavya mwanawe Isaka dzulu ya madhabahu? ²² Mwaona, imani haho yehenda kazi hamwenga na mahendoge madzo, na kpwa mahendoge, imaniye ichifikira lengore. ²³ Maandiko getimizwa gambago, "Iburahimu wemwamini Mulungu, naye achitalwa kukala wa hachi." Vivyo, Abrahamu achehewa musena wa Mulungu. ²⁴ Mwaona kukala kpwa mahendo, mutu nikutalwa hachi, si kpwa imani hacheye. ²⁵ Hali iyo, je, Rahabu yuya kahaba katalirwe hachi kpwa mahendo, arihomvakaribisha mvara ajumbe na kumvonyesa njira injine salama? ²⁶ Kpwa kukala, here vyomwiri usihokala na roho udzefa, ndivyo imani hasiho mahendo pia idzefa.