¹ Manabii a ulongo mvekudza, alimu a ulongo pia nao mvandadza. Mvandadza na nyambo za kuvunza, namvo mvandamukana hata ye bwana wao ariye mvareha. Ao mvandadzibananga enye. ² Anji mvandamutua, na kutsupira kpwao, ujeri undahukanwa. ³ Kpwa ulafi wao mvandamuhumira vii na maneno ga ulongo. Ala, hukumu yao imvarinda muda mure, wala kpwangamizwa kpwao kakurere. ⁴ Kpwa kukala, ichikala Mulungu kamvarichire malaika mvariohenda dambi, bali achimvahirika kuzimu mvafungbwe nyugbwe kahi za shimo ra chiza mpaka siku ya hukumu, ⁵ na ichikala weuricha urimwengu wa kpwanza uchangamika, na achimuricha Nuhu, mubomu wa utakatifu, hamwenga na fungahe anjine arihorichira mafuriko kahi za urimwengu wa dambi. ⁶ na ichikala wetsoma midzi ya Sodoma na Gomora muhaka ichibaki ivu na achimvahukumu chifo here mufano wa go gandigo mvapata enye dambi, ⁷ ala achimukombola mutakatifu Lutu, ariyekala wateswa ni tabia kolo za atu mvasiomutii Mulungu- ⁸ kpwa kukala iye mumwenga mutakatifu, ariyekala achi-ishi hamwenga namvo siku baada ya injine, weungulika sana kahi za rohoye takatifu kpwa kona na kusikira mahendo gao maovu- ⁹ ichikala Bwana wegahenda gosi gaga, be wamanya njira ya kokola atue mvario na ulungu kahi za majezo na njira ya kugbwira atu enye dambi ili mvaweze kuadhibiwa siku ya hukumu. ¹⁰ Uu bai ni ujeri kpwanza kpwa mvaratu mvatsemberao kahi za tamaa mbii za chimwiri na mvadharaulio mamulaka. Kpwa madzivuno, kamvadzuta wala kutetemwa ni miri yao mvanenaho kufuru dzulu ya ana a utukufu. ¹¹ Malaika mvana nguvu na mamulaka ga kutsupa, ala kamvareha hukumu za matusi mbere za Bwana. ¹² Ala mvamva atu mvahere anyama mvasiofikiria, here mvevyalwa mvagbwirwe na kolagbwa. Kamvamumanya ye mvamuhukanaye. Kahi ya kpwangamiza anzao, mvamvo nao mvandangamizwa, ¹³ mvandarihiwa madhara kpwa kuhenda madhara. Mvafikiria kukala ni ufahari kuhenda karamu za urevi na ulafi mwangazani. Mvagaluka kukala mawaa na dosari. Mvatsamirwa mahendo gao ga ulongo wakati mvarya namwi. ¹⁴ Matso gao gatele uzinzi; kamvatosheka na dambi. Nikuashawishi mvasiokala na musimamo mvakenjira dambini, na maroho gao gefundishwa ulafi. Ni atu enye laana! ¹⁵ Mvairicha njira iriyonyoka mvachitua ya kumvatsuha, kutua njira ya Balamu mwana wa Beori, ariyehenza kuhochera mariho kpwa mahendo ga dambi. ¹⁶ Ala achipata kukanywa kpwa njiraze mbii- punda achimunenera kpwa sauti ya chidamu naye achikata achitsuha! ¹⁷ Atu namuna ii mvafananishwa na miho isiyokala na madzi na manina gangamizwago ni peho kali. Hukumu ya ingu ra chiza ramvarinda. ¹⁸ Mvanena na kamvurye. Kpwa tamaa za miri yao, mvashawishi atu mvadzibidishao kudzitenga namvo mvaishio kahi za dambi. ¹⁹ Mvamva-ahidi uhuru, ala mvo enye ni atumwa a ufisadi. Kpwa kukala mutu ni mutumwa kpwa chochosi chimushindacho. ²⁰ Ichikala mvadziepuka ufisadi wa urimwengu kuchirira marifa ga Bwana na mokoli wehu Jesu Masihi na sasa mvadzifungbwa kahize na mvakashinda, iyo hali yao ya mwisho yagaluka kukala mbii kutsupa yo ya kpwanza. ²¹ Indekala baha kpwao kala kamvamanyire kamare njira ya utakatifu kuriko kuimanya kisha kukahala kutua amuri takatifu mvarizo zipewa. ²² Methali ii ni ya jeri kpwao: "Kuro ni ku-uyira mahahikage, na nguluwe adzeojeswa ni kuuya toheni."