¹ Simioni Petero, muhumwa na mutume wa Jesu Masihi, achimvandikira ao mvariohochera imani iyo mwenga here huriyoihochera, imani kahi za utakatifu wa Mulungu na mokoli wehu Jesu Masihi. ² Neema na amani nayonjezeke kahi za maarifa ga Mulungu na Bwana wehu Jesu. ³ Kpwa nguvu zizi za chilungu, gosi kahi za maisha na ulungu hevipewa kutsupira kumumanya iye ariyehweha kahi za utakatifu wa kpwakpwe. ⁴ Kuchirira gago, wehupa ahadi mbidzo na bomu, ili mukale mundaweza kukala kahi za mvandiogavya ulungu, baada ya kudzitenga na ulagai wa urimwengu urehewao ni tamaa mbii. ⁵ Kpwa sababu ii bai, hendani gosi ili monjeze udzo kahi za imani yenu, na kpwa gago madzo onjezani ufahamu, ⁶ na kpwa ufahamu monjeze kudzirinda, na kpwa kudzirinda monjeze uvumirivu, na kpwa uvumirivu monjeze ulungu, ⁷ kpwa ulungu monjeze henzo ra chindugu, na kpwa henzo ra chindugu monjeze henzo. ⁸ Ichikala gaga gosi mundakala nago, na gakule ndani yenu, gandamvachinga kukala tasa ama musivyale matunda kahi za ufahamu wa Bwana wehu Jesu Masihi. ⁹ Ala yoyosi adzehungukirwa ni mambo gaga be ni chipofu, kpwa kusahau kukala yusafiwa kula kpwa dambize za kapindi. ¹⁰ Kpwa vivyo ndugu, hendani gosi ku-uhenda mweho wenu na utsaguzi wenu kukala wa uhakika, kpwa kukala muchihenda gaga, be kamundadzikpwala. ¹¹ Kpwa hali ii, mundatimizirwa ahadi zenu za kpwenjira kahi za ufalume wa milele wa Bwana wehu Jesu Masihi. ¹² Kpwa vivyo nindakala tayari kumvakumbusha mambo gaga, idzaho mwagamanya kare, na idzaho muna nguvu kahi za ujeri muriwo nawo. ¹³ Nafikiri ni sawa kabisa kpwangu, siku zosi nirizohamwenga namwi kumvatangamusha kpwa njira ii ya kumvakumbukiza. ¹⁴ Kpwa kukala namanya karibuni sindakala hamwenga namwi, Bwana wehu Jesu Masihi adzinifunulira gago. ¹⁵ Nindahenda niwezavyo, kona kpwamba nindihomvaricha, mundakala muchikumbuka mambo gaga. ¹⁶ Kpwa kukala kahutuire mambo chilachu ga uvumbuzi hurihomvambira dzulu ya nguvu na kudza kpwa Bwana wehu Jesu Masihi, ala sisi be hekala mashahidi a matso kpwa kazize bomu. ¹⁷ Kpwa kukala wehochera heshima na utukufu kula kpwa Mulungu Paba, sauti irihoteremuka kpwa utukufu, ichamba, "Yuyu ndiye mwanangu Muhenzwi, kpwa kuchirira iye, naridhika." ¹⁸ Sisi enye heisikira iyo sauti ichiteremuka kula mulunguni hurihokala huhosi dzulu ya murima uwo mutakatifu. ¹⁹ Kpwa kukala hunaro neno ra unabii ririrohendwa kukala ra uhakika zaidi, ambaro indakalato muchirisikiza kpwa umakini mukale here taa rakaro kpwenye chiza mpaka ho kundihocha na nyenyezi ya madzacha indihong'ala mwenu mioyoni. ²⁰ Konjezera gago, ni lazima mwelewe kukala kakuna unabii wa neno ulawo kpwa utafusiri wa mutu. ²¹ Kpwa kukala kakuna unabii uriwo rehewa kpwa kuhenza kpwa mutu, bali atu mvenena galago kpwa Mulungu mvario enjira kahi za Roho Mutakatifu.