¹ Ahenzwi, ii vivi ni barua ya hiri kumvandikira, na zosi ni ukumbusho kumvatangamusha akili zenu ² ili muweze kukumbuka maneno garigonenwa kapindi ni manabii atakatifu na amuri ya Bwana na Mokoli wehu kuchirira mitume. ³ Manyani gaga kpwanza, kukala siku za mwisho kundadza atu a kamvurye. Mvanda akejeli na kpwenderera na matamanio ga kpwao. ⁴ Mvandamba, "Ihiko yo ahadi ya kuuya kpwa Jesu? Hangu paba zehu mvafe, chila chitu chisawa na hangu Mulungu ariho hu-umba." ⁵ Kusudi rao, mvandasahau kukala hangu kare na kare, kpwa neno ra Mulungu tu mbingu na intsi zeumbwa kula kpwa madzi na kutsupira kpwa madzi, ⁶ urimwengu uwo weangamizwa, kpwa mafuriko ga madzi. ⁷ Kpwa neno riro vivyo, mbingu na intsi zitengbwa kpwa ajili ya moho, yaani siku ya hukumu ya kpwangamiza mvasiomwamini Mulungu. ⁸ Neno narisimvatsuluke, ahenzwi, kukala siku mwenga kpwa Mulungu ni here miaka elifu mwenga, na miaka elifu mwenga ni here siku mwenga. ⁹ Bwana kagoigoi kahi za kutimiza ahadize, here anjine mvonavyo kukala wahenda mamboge porepore. Isihokala, ni muvumirivu kpwenu. Kavimuhamira kukala yoyosi kahi yenu angamike, badalaye chila mumwenga wenu atubu. ¹⁰ Hata vivyo, siku ya Bwana indadza here ya mwevi. Mulunguni indatsupa na kululu. Vitu vya asili vindochwa kpwa moho, intsi na chila chitu chirichoko vindochwa. ¹¹ Na kpwa kukala vyosi vivi vindangamizwa kpwa hali iyo, je, mundakala atu aina yani? Ishini kpwa utakatifu na maisha ga chilungu. ¹² Kalani na kuluhiro ili kuharakisha kudza kpwa siku ya Mulungu. Siku iyo, mbingu zindabanangbwa na moho, na virivyomo vindayeyushwa kpwa vukuto ra moho uwo mubomu. ¹³ Ala kulingana na ahadi za kpwakpwe hangojera mbingu mbisha na intsi mbisha, ambako utakatifu undatawala. ¹⁴ Kpwa vivyo bai, Ahenzwi, kpwa kukala mwagatariza gaga mambo, hendani bidii mupatikane bila lawama wala hatia mbere za Mulungu, kpwa amani. ¹⁵ Na pia, muririkane uvumirivu wa Bwana kukala wokofu, here ndugu yehu Paulo arivyo mvandikira, kulingana na hekima ariyoipewa. ¹⁶ Paulo wanena dzulu ya gaga mambo kpwa chila barua ariyoyandika, ambavyo ni vitu murivyo kuvyelewa ni vifu. Apuuzi na mvasiodzelewa mvagatsuha gaga, here mvarivyo mvatengeza maandiko manjine, gandigo mvangamiza enye. ¹⁷ Kpwa vivyo, ahenzwi, kpwa kukala mwino mwamanya kare dzulu ya gaga mambo mbere ya anjine, dzirindeni ili musangamizwe kpwa ulongo wa atu mvasiodzelewa namwi mukatsuha waminifu wenu. ¹⁸ Kulani kahi za neema na maarifa ga Bwana na mokoli wehu Jesu Masihi. Utukufu ukale kpwakpwe vivi na hata siku zosi zidzazo milele. Amina!