¹ Usimuchemere mutumia. Bali, mwenjize moyo here ndiye Pabayo. Umvenjize moyo vijana a chilume here nduguzo. ² Umvenjize moyo anache atumia here mamezo na anache vijana here nduguzo achiche kpwa usafi wosi. ³ Heshimuni magungu, aratu mvario magungu jeri. ⁴ Ala ichikala gungu wevyala ana au adzukulu, ariche kpwanza mvadzifundishe konyesa heshima kpwa atu a nyumba zao enye. Mvariche mva-arihe avyazi ao madzo, kpwa kukala vivi ni vidzo mbere za Mulungu. ⁵ Ala gungu jeri ni yuyatu ariyerichwa hacheye naye ni kpwika kuluhirore kpwa Mulungu. Siku zosi nikudumu kahi za sadaka na mavoyo usiku na mutsana, ⁶ hata vivyo, mwanamuche yuyatu aishiye kahi za anasa ni mufadzi hata idzaho waishi. ⁷ Mvalakize mambo gaga ili kpwamba mvasilaumiwe. ⁸ Ala ichikala mutu kandamvatunza nduguze, hasa mvario nyumbani mwakpwe, be adzi-ikana imani na ni mui kuriko mutu asiye imani. ⁹ Mwanamuche andikishwaye kpwenye orodha ya magungu bai ni ariye na umuri usiwo hunguka miaka mirongo mihandahu na akale ni muche wa Mulume mumwenga. ¹⁰ Ni ariye wamanyikana kpwa mahendo madzo, ichikala wamvajali ahoho, au ni mukarimu kpwa ajeni, au adzojesa magulu ga aumini, au adzimvasaidia mvario mvadzikala mvachiteswa au adzidzomboza kpwa kazi yoyosi mbidzo. ¹¹ Ala kpwa mvaratu magungu vijana, kahala kumvandikisha kpwenye orodha ya magungu. Kpwa kukala mvachenjira kahi za tamaa za chimwiri kura kudzomboza kpwao kpwa Masihi vindaricha, mvandahenza kuhalwa. ¹² Kpwa njira ii, nikpwenjira kpwenye hatia kpwa kuvunza kudzomboza kpwao mvarikokala mvadzidzomboza mwanzo. ¹³ Na pia nikpwenjira kpwenye mazoera ga ukaha. Ao nikuzunguluka nyumba kpwa nyumba isitoshe, ni kukala ni akaha lakini pia nikukala asengenyaji na enye kpwenjirira mambo ga anjine. Mvamvo ni kunena mambo mvasigomalwa kuganena. ¹⁴ Kpwa vivyo mimi namala anache vijana mvahalwe, mvavyale, mvemerere nyumba zao ili mvasimupe hadui nafasi ya kuhushitaki kpwa kuhenda dambi. ¹⁵ Kpwa kukala, anjine mvadzimugalukira shetani. ¹⁶ Ichikala mwanamuche yoyosi aminiye ana magungu, bai amvasaidie ili kanisa risiremerwe, ili riweze kumvasaidia mvara mvario ni magungu jeri. ¹⁷ Atumia mvario atawala adzo mvatalwe kukala akuheshimiwa mara mbiri, hasa mvario mvadzishuhulisha na kufundisha neno ra Mulungu. ¹⁸ Kpwa kukala maandiko gamba, "Usimufumbe ng'ombe mulomo aryaho nafaka" na "Muhenzikazi wasitahili mushaharawe." ¹⁹ Usihochere mashitaka dzulu ya mutumia isihokala kuna mashahidi airi ama ahahu. ²⁰ Mvaonye mvakosao mbere za atu osi ili anjine mvasereo hanjine mvandogoha. ²¹ Nakulakiza, halahala mbere za Mulungu na mbere za Masihi Jesu na malaika ateule kukala ugatsunze malakizo gaga bila ubaguzi wowosi na kukala usihende dzambo rorosi kpwa ubaguzi. ²² Usimwikire mutu yoyosi mikono kpwa upesi. Usishiriki dambi ya mutu munjine. Dzitunze mwenye ukale musafi. ²³ Usinwe madzi hacheye, badalaye anwa muvinyo vichache kpwa ajili ya tumbo na makongo ga mara kpwa mara. ²⁴ Dambi za atu anjine nikumanyikana lwazu, na nikumvatanguliya hukumuni ala dambi nyinjine nikudza chimala. ²⁵ Vivyo, kahi za kazi mbidzo, nikumanyikana lwazu ala pia zinjine kazifitsika.