¹ Richa aratu mvosi mvario tsini ya nira here atumwa mvahalire mabwana zao here enye heshima zosi. Mvahende vivyo ili dzina ra Mulungu na mafundisho gasihukanwe. ² Atumwa enye mabwana mva-aminio mvasiadharau kpwa kukala mvamvo ni ndugu. Badalaye, mva-ahumikire muno kpwa kukala mabwana mvasaidiwao kazi zao ni aumini na ahenzwi. Fundisha ugatangaze mambo gaga. ³ Idzaho mutu walavya mafundisho ga ulongo na upotofu garigo chinyume na maneno ga ujeri ga Bwana wehu Jesu Masihi na mafundisho ga chilungu, ⁴ mutu iye wadzivuna na kelewa chochosi. Badalaye, kana dhamira mbidzo kahi za vurugu na mabishano dzulu ya maneno. Maneno gaga nikuvyala wivu, ugomvi, mahukano, shauku mbii, ⁵ na vurugu za mara kpwa mara kahi za atu enye akili zirizo vurugbwa. Mvairicha jeri na kpwaza kukala ulungu ni njira ya kukala tajiri. ⁶ Sasa utukufu na kutosheka ni faida bomu. ⁷ kpwa kukala kahudzire na chitu urimwenguni, wala kahuweza kuka na chitu kula urimwenguni. ⁸ Badalaye, hutoshekeni kpwa chakurya na mavazi. ⁹ Sasa, ao mvatamanio kukala na mali nikugbwa kahi za majezo, kahi za muhego. Nikugbwa kahi za upumbavu munji na tamaa mbii, na kahi za chochosi chimvahendacho atu mvazame kahi za mangamizi na ubanangi. ¹⁰ Kpwa kukala kuhenza pesa ndicho chanzo cha aina zosi za wovu. Atu mvario nikutamani vitu vivyo, mvadzipotoshwa kure na imani na mvadzidzenjiza enye kpwa sumazi nyinji. ¹¹ Ala uwe mutu wa Mulungu, gachimbire mambo gaga. Tua hachi, utakatifu, waminifu, uhenzo, uvumirivu na upore. ¹² Piga viha vidzo vya imani. Gbwirira uzima wa kare na kare uriwo eherwa, ambawo weukiri mwenye mbere za mashahidi anji. ¹³ Nakupa amuri zizi mbere za Mulungu, avipaye kuishi vitu vyosi, na mbere ya Jesu Masihi, ariye shuhudia mbere za Pontio Pilato ushuhuda uriwo mudzo, ¹⁴ kutsunza amuri kpwa ukamilifu, hasiho mashaka, mpaka kudza kpwa Bwana wehu Jesu Masihi. ¹⁵ Mulungu andadhihirisha kudzakpwe kpwa wakati wa sawa- Mulungu wa hacheye, mufalume aishiye, Bwana atawalaye. ¹⁶ Hacheye waishi kare na kare na akalaye kahi za mulangaza usiwo sengererwa. Kakuna mutu awezaye kumona wala awezaye kumulola. Kpwakpwe kukale heshima na uweza wa kare na kare. ¹⁷ Mvambe matajiri mvario urimwengu uu mvasidzivune na kpwika kuluhiro rao kahi za utajiri, uriwo sewo wa uhakika. Badalaye, mvamukuluhire Mulungu. Ariye nikuhupa utajiri wosi wa jeri ili hutsamirwe. ¹⁸ Mvambe mvahende madzo, mvatajirike kahi za kazi mbidzo, mvakale akarimu na utayari wakuhumira chirichoko na anjine. ¹⁹ Kahi za njira iyo mvandadzikira musingi mudzo kahi za mambo gadzago, ili mvaweze kugbwira maisha halisi. ²⁰ Timotheo, rinda urichohewa. Dzepushe na majadiliano ga chipumbavu na mabishano gasigo na maana garigo kpwa ulongo ni kpwehewa maarifa. ²¹ Anjine ni kugatangaza gaga, na ndivyo mvachinyume na imani. Neema naikale hamwenga namwi.