¹ Kpwa vivyo, idzaho Masihi weteseka chimwiri, enendani kpwa nia iyo mwenga. Kpwa kukala yoyosi atesekaye kahi za mwiri, wadzitenga na dambi. ² Mazaoge, mutu iye, kpwa maishage gosi kahi za mwiri, kaishi keheri kulingana na kuluhiro ra chidamu, bali kulingana na mahenzo ga Mulungu. ³ Kpwa wakati udziwotsupa, wemvatosha, kpwenu kuhenda matamanio ga a mataifa, ambago atu mvasiomumanya Mulungu nikuhenza kugahenda: Usherati, tamaa mbii, urevi, karamu za urevi na ibada za vigango. ⁴ Mvafikiria kukala ni dzambo jeni sasa kukala kamudziunga namvo keheri kahi za tabia mbii dza zizo, ndiho mva-anena vii. ⁵ Mvandalavya hesabu kpwakpwe iye ariye tayari kuhukumu mvariohai na mvariofa. ⁶ Kpwa ajili iyo, injili yehubiriwa hata kpwa mvariofa, ili, idzaho kare mvehukumiwa kpwa miri here adamu, mvaweze kuishi here Mulungu ahenzavyo chiroho. ⁷ Siku za mwisho zasengera na zihehi. Kpwa vivyo, kalani na akili za kuhurira na chipimo kahi ya fikira za kpwenu kpwa ajili ya mavoyo. ⁸ Zaidi ya gosi, henzanani mwimwi kpwa mwimwi, kpwa kukala henzo rachinga dambi nyinji sana. ⁹ Karibishanani bila malalamiko. ¹⁰ Here chila mumwenga wenu arivyohochera zawadi, zihumireni kusaidiana here mawakili a-aminifu a neema ya Mulungu. ¹¹ Yoyosi andiyenena, na anene maneno galago kpwa Mulungu. Andiye humikira anzie, na ahumikire kpwa nguvu za Mulungu. Hendani gaga ili kpwa njira zosi, Mulungu atukuzwe kpwa dzina ra Jesu Masihi. Utukufu na uweza u kpwa Jesu Masihi milele na milele. Amina. ¹² Ahenzwi, musigone maajabu majezo gamvapatago garigo makali, mukaona kpwamba dzambo musorimanya ridzimvapata. ¹³ Manyani, hata idzaho manji mwagatsupira kpwa mateso ga Masihi, tsamirwani, ili muweze kusherekea na kufurahi wakati utukufuwe undihofunulwa kpwenu. ¹⁴ Ichikala mundahukanwa kpwa sababu ya dzina ra Masihi, be mudzibarikiwa, kpwa kukala Roho wa utukufu na Mulungu yuhamwenga namwi. ¹⁵ Ala mumwenga wenu asiteseke here mwalagi, mwevi, ama muhenda mai. ¹⁶ Ala ichikala yoyosi wateseka here Mukristo, na asiaibike; badalaye, na amutukuze Mulungu kpwa dzina riro. ¹⁷ Kpwa kukala ni wakati wa hukumu kpwanzira na nyumba ya Mulungu. Ichanza nasi, je indakaladze kpwa mvo mvasiotii na kuheshimu injili ya Mulungu? ¹⁸ Na "Ichikala vigumu kpwa atakatifu kokolwa, be indakaladze kpwa mvo enye dambi?" ¹⁹ Kpwa vivyo, mvamvo mvatesekao kpwa ajili ya mahenzo ga Mulungu mvandalavya maroho gao kpwa iye Mulungu mwaminifu kahi za mahendo madzo.