¹ Namvarai atumia kahi zenu, mimi, ambaye ni mutumia munzenu na shahidi wa mateso garigo mupata Masihi, na nimumwenga kahi za mvandiopata fungu kahi za utukufu ambawo undafunulwa: ² Kalani arisa adzo a ng'onzi za Mulungu ambamvo mvatsini ya urinzi wenu, muahumikirao here arisa-si kpwamba ni lazima, lakini kpwa kukala mwahenza, here Mulungu andemvahenda mumvahumikire-si kpwa faida ya aibu bali kpwa faida mbidzo muirindayo. ³ Musidzihende mabwana dzulu yao. Bali, kalani mifano midzo kpwao. ⁴ Halafu andihofunulwa iye murisa mubomu, mundavishwa taji isiyotsakala ya utukufu. ⁵ Hali iyo mwenga, vijana, mvaheshimuni avyere. Mosini, valani unyenyekevu na muhumikirane. Kpwa kukala Mulungu kenzi madzivuno, ala wamvapa neema mvario anyenyekevu. ⁶ Kpwa vivyo, nyenyekeani tsini ya mukono mubomu wa Mulungu ili naye amvenule wakati wenu uchifika. ⁷ Mwikireni iye mahitaji genu gosi, kpwa kukala wamvashuhulikira. ⁸ Kalani makini, kalani matso. Hadui wenu shetani wazunguluka here simba angurumaye, atafutaye mutu amurye. ⁹ Emani mupigane naye. Dzipeni nguvu kahi za imani. Mwamanya kukala ndugu zenu kahi za huduma mvavumirira mateso sawa namwi. ¹⁰ Baada ya kuteseka kpwa muda, iye Mulungu wa neema zosi, ariyemveha kpwa utukufu wa kpwakpwe wa milele kahi za Masihi, andamvakamilisha, amvathibitishe, amvape nguvu, na amvenule. ¹¹ Wakpwe iye ni uweza wa milele na milele. Amina. ¹² Namutambua Silivano here ndugu mwaminifu, na nemvandikira mwimwi kpwa ufuhi dzuluye. Namvasihi na namvashuhudia mwimwi kukala nirigo mvandikira ni neema ya ujeri ya Mulungu. Emani imara kahi za neema iyo. ¹³ Munzenu muche mutsagulwa ariyehaha Babiloni, ariyetsagulwa hamwenga namwi, wamvalamusa. Mariko, naye mwanangu, wamvalamusa. ¹⁴ Lamusanani kpwa busu ra uhenzo. Amani naikale hamwenga namwi mosi muriokahi za Masihi.