¹ Kpwa hali iyo mwenga, mwimwi murio akaza atu ni mukale tsini za alume enu. Hendani vivyo hata ichikala alume anjine kamvaheshimu neno ra Mulungu, nikpwenda mvakahamirwa na kpwamini neno bila hata kpwambirwa kuchirira tabia mbidzo za ache ao. ² kpwa kushuhudia heshima zenu, na tabia zirizo safi. ³ Musihenze mapambo ganze. Yaani, kudzisuka nyere, kuvala mikufu ya dhahabu, ama hata kpwa zo nguwo muvalazo. ⁴ Badalaye, mapambo genu nagakale ga utu wa ndani wa mioyoni, kpwa udzo usiwo banangika, wa mioyo na upore na uhurivu, ambawo una thamani mbere za Mulungu. ⁵ Kpwa kukala vivi ndivyo ache a kapindi mvarivyokala na kuluhiro kahi za Mulungu mvekala mvachidzipamba, kpwa kunyenyekea kpwa alume zao. ⁶ Hali iyo, Sara wemuheshimu Abrahamu mulumewe ta achimweha bwana. Mwimwi sasa muana a Sara ichikala mundahenda garigo madzo na pia ichikala kamogoha tabu yoyosi. ⁷ Kpwa hali iyo, alume namwi ishini na ache enu kulingana na maelewano, here kpwa chombo chiricho dhaifu, mwanamuche. Mvapeni heshima here arithi anzenu a neema ya maisha. Hendani vivi ili mavoyo genu gasizuiliwe. ⁸ Mwisho, mosini, kalani na mawazo mamwenga, na konerana mbazi, kuhenzana here ndugu, roho nyembamba, na anyenyekevu. ⁹ Musirihizane mai kpwa mai ama tusi kpwa tusi. Badalaye, endererani kubariki, kpwa sababu iyo, ndiho mwetsagulwa, ili mukarithi baraka. ¹⁰ "Iye ahenzaye maisha na kona siku mbidzo mbereni, ni arichise lulimilwe kula kpwa wovu na milomoye isinene ulongo. ¹¹ Na agaluke kula kpwa mai na ahende madzo. Na atafute amani na aitue. ¹² Matso ga Bwana gona atakatifu, na masikiroge gamvasikira mavoyo gao. Ala uso wa Bwana kauhamwenga na mvo mvahendao mai." ¹³ Andiyeaza kukudhuru nani ichikala wahenda madzo? ¹⁴ Ala hata uchiteseka kpwa utakatifu, be umubarikiwa. Usogohe vitisho vyao. Usiyugike. ¹⁵ Badalaye, mutengeni Jesu Masihi mwenu mioyoni here mutakatifu. Siku zosi, kalani tayari kulavya hesabu kpwa yoyosi dzulu ya kuluhiro muriro naro- ¹⁶ hata vivyo, na upore na wenye heshima. Kalani na dhamira mbidzo ili gosi munenwago here mai atu mvamunenao maishani kahi za Masihi, mva-aibishwe. ¹⁷ Ni baha, ikale kuhenza kpwa Mulungu, muteswe kpwa kuhenda madzo kuriko kpwa kuhenda mai. ¹⁸ Masihi pia weteseka kpwa ajili ya dambi zehu. Iye ariye mutakatifu weteseka kpwa ajili yehu, sisi huriokala enye dambi, ili ahurehe kpwa Mulungu. Acholagbwa kahi za mwiri, bali achihendwa muzima kahi za Roho. ¹⁹ Kpwa Roho, achenda hubiria roho ambazo zi chifungoni kpwa sasa. ²⁰ Kamvatiire wakati uvumirivu wa Mulungu urihokala uchingoja siku za Nuhu, siku za kurijenga safina, na Mulungu achokola achache-mioyo minane-kpwa njira ya madzi. ²¹ ii ndiyo ishara ya ubatizo umvokolao kpwa sasa-sio kpwa kojesa uchafu wa mwiri, bali here chiriro cha dhamira mbidzo kpwa Mulungu-kuchirira ufufulo wa Jesu Masihi. ²² Masihi yu mukono kulume wa Mulungu. Wekpwenda mulunguni. Malaika, mamulaka gosi, na nguvu zosi lazima zikale tsiniye.