¹ Kpwa vivyo, dzitengeni na mai gosi, ulongo wosi, unafiki, husuda, na masingizirano gosi. ² Here ana atsanga, tamanini maziya masafi ga chiroho, ili kuchirira gago, mukaweze kukula kahi za wokofu, ³ ichikala mudzimujeza Bwana mukamona ni mwenye mbazi. ⁴ Nzoni kpwakpwe iye ariye ni dziwe ri-ishiro ambaro rekahalwa ni ajenzi, ala ndiro ririrotsagulwa ni Mulungu here dziwe ra thamani kpwakpwe. ⁵ Mwimwi namwi muhere mawe gaishigo ambago gajengerwa nyumba takatifu ili ikale hekalu takatifu rilavyaro sadaka takatifu ikubaliwayo ni Mulungu kutsupira kpwa Jesu Masihi. ⁶ Neno ra Mulungu ramba vivi: "Lolani, namvaikira Sayuni dziwe ra pembeni, ririrotsagulwa na ra thamani. Yoyosi andiye mwamini, kanda-aibika." ⁷ Thamani bai, ni kpwenu mwimwi mwaminio. Ala kpwa mvamvo mvasioamini, "Dziwe ririrokahalwa ni ajenzi, ridzigaluka kukala dziwe bomu ra pembeni," ⁸ na "Dziwe rimvahendaro mvadzikpwale na kugbwa." Mvarikpwala kpwa kukala mvenda chinyume na neno. ⁹ Ala mwimwi mu atu mvariotsagulwa, kundi ra makuhani ga chifalume a taifa takatifu, kundi ra atu a Mulungu, ili muweze kutangaza mahendo madzo ga Mulungu ariyemveha kula kpwa chiza ili mudze kahi za mulangazawe wa ajabu. ¹⁰ Ho mwanzo mwekala kamukundi ra atu a Mulungu, ala sasa mu atu a Mulungu. Kamupatire mbazi za Mulungu, ala sasa munazo. ¹¹ Ahenzwi, namvarai here achizi a njira na asafiri, mudzitenge na tamaa za miri, ambayo yapingana na mioyo yenu. ¹² Mahendo genu kahi za mataifa nagakale ga heshima, ili mvachimusengenya here ahenzi a dambi, mvakale mashahidi ao enye a mahendo madzo na mvalavye utukufu kpwa Mulungu siku andihokudza. ¹³ Heshimuni na kutii mamulaka gosi ga chidamu kpwa ajili ya Bwana. Muheshimuni mufalume here mubomu ¹⁴ na atawala, mvahumwao kuadhibu akosaji na kumvalika mvahendao madzo. ¹⁵ Kpwa kukala gago ndo mahenzo ga Mulungu, kukala kahi za kuhenda madzo, wanyamazisha ajinga kpwa maneno gao. ¹⁶ Here atu muriohuru, musihumire uhuru wenu kudzihehera kpwa maovu genu, bali mukale here atumishi a Mulungu. ¹⁷ Heshimuni chila mutu. Henzanani mwimwi kpwa mwimwi. Mogoheni Mulungu. Heshimuni mufalume. ¹⁸ Atumishi, kalani tsini ya mabwana zenu kpwa heshima zosi. Musikale na heshima kpwa adzo hacheye, bali hata mvo mvario na maroho mai. ¹⁹ Kpwa kukala yasitahili nguma kukala, kpwa kukala wamuheshimu Mulungu, mutu avumirire matsungu gosi wakati wa kuteswa bila kukosera. ²⁰ Kpwani una nguma yani uchikala uhenda dambi be uvumirire adhabu? Ala uchikala uhenda madzo kisha uteswe kpwa adhabu, be wasitahili nguma kula kpwa Mulungu. ²¹ Kpwa kukala, ni kpwa gago ndiho mwetsagulwa, kpwa kukala Masihi pia weteseka dzulu yenu. Achiricha mufano mudzo kpwenu kutua hatua za kpwakpwe. ²² "Kahendere dambi, wala kanenere ulongo kanwani mwakpwe." ²³ Ariho hukanwa, kaudzirye tusi. Ariho teseka, kalaanire mutu, badalaye, achidzomboza mwenye kpwa iye ahukumuye kpwa hachi. ²⁴ Iye mwenye wetsukula dambi zehu mwirini dzulu ya musalaba ili hufe kpwa dambi ala huishi kpwa ajili ya utakatifu. Kpwa kupigbwakpwe, mudzipata kuhola. ²⁵ Mosini mwekala mwahangaika here ng'onzi zirizo angamika, ala sasa mudzuya kpwa murisa na mwemerezi wa mioyo yenu.