¹ Petero, mutume wa Jesu Masihi, kpwa mwimwi atsagulwa a Mulungu muriotawanyika sehemu za Pontio, Galatia, Kapadokia, Asia na Bithunia. ² Paba Mulungu wemvatsagula mwimwi kulingana na kusudi ra kpwakpwe, namwi muhendwa kukala atakatifu ni Roho ili mupate kumuheshimu Jesu Masihi na kusafishwa kpwa mulatso wa kpwakpwe. Neema naikale hamwenga namwi, na amani kpwenu yonjezeke. ³ Navoya Mulungu ariye Paba wa Bwana wehu Jesu Masihi alikpwe! Kahi ya mbazize nyinji, adzihupa kuvyalwa lusha ili huweze kuishi na kuluhiro kuchirira kpwa ufufulo wa Jesu Masihi kula kpwa afu. ⁴ Ili huweze kupata urithi uriwo kaundabanangika, kaundachafuka wala kutsakala. Udzitengbwa mulunguni kpwa ajili yenu. ⁵ Mwarindirwa ni nguvu za Mulungu kuchirira imani kpwa ajili ya wokofu uriwo tayari kufunulwa kpwenu siku za mwisho. ⁶ Kpwa riri, mwatsamirwa muno, idzaho ni kpwa muda uu, na muda muchache, mundalazimika kutsupira wakati mufu wa majezo ga chila aina. ⁷ Ii ni kpwa kuthibitisha imani yenu, ambayo ina thamani kutsupa dhahabu ambayo nikubanangika, idzaho nikujezwa kpwa kuchirira moho. Gaga gahendeka ili imani yenu ipatikane kahi za sifa, utukufu na heshima Jesu Masihi afunulwaho kpwenu. ⁸ Kamudzamona, ala mwamuhenza. Kamumona vivi sasa, ala mwamwamini na mwatsamirwa kpwa furaha ambayo kayelezeka na idzazwa utukufu. ⁹ Vivi mwahochera majibu ga imani yenu, na wokofu wa roho zenu. ¹⁰ Dzulu ya wokofu uu, manabii mvariotabiri dzulu ya neema ambayo yekala idze kpwenu, mvepeleleza sana na mvachipima kpwa makini, ¹¹ kuuzira dzulu ya wakati na mazingira ga dzambo riro, yaani wakati ariwo mvadokezera Roho wa Masihi ariyekala ndani yao ariyemvatabiria dzulu ya mateso gandigomupata Masihi na utukufu undiwo kudza baada ya haho. ¹² Mulungu achimvafunulira kukala kamvakalire mvadzihumikira enye, bali mwimwi, mvarihokala mvachinena dzulu ya mambo garigo sasa mweambirwa ni mvo mvario hubiri injili kpwenu kpwa Roho Mutakatifu ariyehumwa kula mulunguni-mambo garigo malaika mvatamani kugamanya. ¹³ Kpwa vivyo bai, kalani tayari nia zenu na kuchesa. Ikani kuluhiro renu kahi za neema ambayo mundareherwa Jesu Masihi andihofunulwa kpwenu. ¹⁴ Here ana a Mulungu enye kutii, musitue tamaa zenu murizokala nazo wakati kamudzelewa. ¹⁵ Ala here arivyo mutakatifu iye ariye mveha, mwimwi namwi, kalani atakatifu kahi za tabia zenu zosi. ¹⁶ Kpwa kukala yeandikpwa, "Kalani atakatifu, kpwa kukala mimi ni mutakatifu." ¹⁷ Kpwa vivyo muchimweha "Paba" iye ahukumuye bila kuhenzerera yoyosi na kpwa haki kpwa chila mutu kaziye, be ishini kpwa woga kpwa wakati muriwo nawo here ajeni. ¹⁸ Mwamanya kukala kamukombolerwe kpwa fedha na dhahabu zibanangikazo kula kpwa mienendo yenu isiyotsama muriyo irithi kula kpwa akare enu, ¹⁹ isihokala kpwa mulatso wa thamani wa Masihi, here wa ng'onzi asiye doa wala dosari. ²⁰ Masihi wemanyikana kabla misingi ya urimwengu uu, ala sasa adzifunulwa kpwenu siku zizi za mwisho. ²¹ Kuchirira kpwakpwe, mwamwamini Mulungu, iye ariye mufufula kula kpwa afu na achimupa utukufu, ili imani yenu na kuluhiro ikale kpwa Mulungu. ²² Mwehenda mioyo yenu kukala safi kpwa kutii ujeri. Ii yekala ni kpwa henzo ra undugu wa jeri; kpwa vivyo henzanani kpwa ujeri wa roho safi. ²³ Mudzivyalwa keheri, sio kula kpwa mbeyu ibanangikayo bali kpwa mbeyu isiyobanangika, kuchirira kpwa neno riishiro na ridzosala ra Mulungu. ²⁴ Kpwa kukala, "Chila nyama ni here nyasi, na utukufuwe wosi ni here malua ga kondeni. Nyasi zichifa, nago malua gapotoka, ²⁵ ala neno ra Bwana rasala vivyo milele."