¹ Anangu ahenzwi, namvandikira gaga ili musihende dambi. Ala mumwenga wenu achihenda dambi, hunaye wakili ariye na Paba, Jesu Masihi, ariye na hachi. ² Iye ndiye mugbwizanyi wa dambi zehu, na si kpwa dambi zehu tu, bali urimwengu wosi. ³ Hamanya kukala hudzimumanya, ichikala hagatua malakizoge. ⁴ Iye ambaye ''Namumanya Mulungu'' ala kagbwira malakizoge ni mulongo, na jeri kaimo ndaniye. ⁵ Ala yoyosi agbwiraye nenore, uhenzo wa Mulungu udzikamilika. Kpwa riri hamanya hundaniye: ⁶ Iye ambaye waishi ndani ya Mulungu yamulazimu mwenye aishi here Jesu Masihi arivyoishi. ⁷ Ahenzwi, simwandikira sheria mbisha, bali, sheria ya kapindi ariyolakiza mudziyokala nayo kula mwanzo. Sheria ya kapindi ni neno muriro risikira. ⁸ Ala namvandikira sheria mbisha, ambayo ni ya jeri kahi za Masihi na ndani yenu, kpwa kukala chiza chatsupa, na mulangaza wa jeri kare wang'ala. ⁹ Iye ambaye yu mulangazani ala wamutsukirirwa nduguye yuchere chizani ta vivi. ¹⁰ Iye amuhenzaye nduguye waishi mulangazani na kakuna chitu chochosi cha kumutsukiza. ¹¹ Iye amutsukirirwaye nduguye yuchizani na wenenda chizani, kamanya endako, kpwa kukala chiza chidzimuhenda chipofu. ¹² Namvandikira mwimwi ahenzwi kpwa kukala mwesamehewa dambi kpwa dzinare. ¹³ Namvandikira mwimwi paba zangu kpwa kukala mwamumanya iye hangu kapindi. Namvandikira mwimwi vijana kpwa kukala mudzimushinda hadui. Namvandikira mwimwi ahenzwi atite kpwa mwemumanya Paba. ¹⁴ Nidzimvandikira mwimwi paba zangu kpwa kumumanya iye hangu kapindi. Namvandikira mwimwi vijana kpwa kukala muna nguvu na neno ra Mulungu rakala ndani yenu, na mudzimushinda mwovu. ¹⁵ Musiuhenze urimwengu na vitu virivyomo duniani. Ichikala mutu wauhenza urimwengu, uhenzo kpwa Paba kaumo ndaniye. ¹⁶ Kpwani chila chitu chirichomo urimwenguni-tamaa za mwiri, tamaa ya matso na madzivuno ga uzima- kavikala kpwa Paba bali urimwenguni. ¹⁷ Urimwengu uu na tamaaze zindatsupa. Ala ahendaye mahenzo ga Mulungu andaishi milele. ¹⁸ Ahenzwi, ni nyakati za mwisho. Here murivyosikira kukala mupinga Masihi wadza, hata vivi apinga Masihi hunamvo. Kpwa riri hamanya ni wakati wa mwisho. ¹⁹ Mvelaa kpwehu kpwa kukala si akpwehu. Mvandekala akpwehu mvandesala nasi. Ala mvariho-ombola, iyo ichonyesa kukala si akpwehu. ²⁰ Ala mwimwi mwehakpwa mafuha kula kpwa iye mutakatifu, na mosi mwamanya. ²¹ Simvandikirire kpwa kukala kamumanya ujeri, bali ni kpwa kukala mwaumanya na kpwa kukala ulongo kaula kpwa ujeri. ²² Nani ariye ni mulongo ichikala si iye apingaye kukala Jesu ni Masihi? Mutu iye ni mupinga Masihi, kpwa kukala wamupinga Paba na Mwana. ²³ Kakuna amupingaye Mwana akakala na Paba. Chila amukiriye Mwana na Paba naye anaye. ²⁴ Kpwa mwimwi, chicho murichosikira kula mwanzo, nachisale ndani yenu. Ichikala cho murichosikira hangu mwanzo chisala namwi, mwimwi namwi mundasala ndani ya Mwana na ndani ya Paba. ²⁵ Na ii ndiyo ahadi ariyohupa sisi-uzima wa milele. ²⁶ Nidzimvandikira gaga mwimwi dzulu ya mvamvo ambamvo mvandemutsuha. ²⁷ Kpwa mwimwi, mafuha murigohochera kula kpwakwe gasale ndani yenu, wala kamundamala mutu yoyosi kumufundisha. Ala mafuha gamufundisha chila chitu na ni jeri wala si ulongo, na here vyo gadzivyo mvafundisha, musale ndaniye. ²⁸ Sasa, ahenzwi, salani ndaniye, ili andiho-ombolera hukale na ujasiri wala husisikire waibu mbereze kahi za kudzakpwe. ²⁹ Ichikala mwamanya iye ni mwenye hachi, mwamanya kukala chila ahendaye hachi wevyalwa ni iye .