¹ Ahenzwi, ni henzo ririrodze adzirohupa Paba kukala nasi hwehewe ana a Mulungu, na vivi ndivyo hurivyo. Kpwa riri, urimwengu kauhutambua kpwa kukala kaumutambuire iye. ² Ahenzwi, sisi vivi hu-ana a Mulungu, na kaidzamanyikana hundivyokala. Hamanya kukala Masihi andiho-onekana, hundahalana naye, kpwa kukala hundamona here arivyo. ³ Na chila mumwenga ariye na kuluhiro riri dzulu ya wakati udzao uriwo-erekezwa kpwakpwe, ni kudzitakasa mwenye here iye arivyo mutakatifu ⁴ Chila mutu endereraye kuhenda dambi, nikuvunza sheria. Kpwa kukala dambi ni uvunzaji wa sheria. ⁵ Mwamanya Masihi weikpwa lwazu ili kuzusa dambi kamare, ala ndaniye kamuna dambi ⁶ Kakuna hata mumwenga akalaye ndaniye na kpwenderera kuhenda dambi. Kakuna mutu hata mumwenga akalaye kahi za dambi ichikala adzimona ama kumufahamu iye Masihi. ⁷ Ahenzwi, musehikeni kukengbwa ni mutu yoyosi. Ahendaye hachi ni mwenye hachi, dzahere vivyo Masihi naye arivyo mwenye hachi. ⁸ Ahendaye dambi ni wa ibilisi kpwa kukala shetani ni muhenda dambi hangu mwanzo. Kpwa riri Mwana wa Mulungu weikpwa lwazu ili aweze kuzibananga kazi za shetani. ⁹ Yoyosi arevyalwa ni Mulungu kenderera kuhenda dambi, kpwa kukala mbeyu ya Mulungu ni kukala ndaniye. Kaweza kpwenderera kuhenda dambi kpwa kukala adzivyalwa ni Mulungu. ¹⁰ Kahi za riri, ana a Mulungu na ana a shetani mvamanyikana. Iye asiyehenda chiricho na hachi, si wa Mulungu, wala iye ambaye kaweza kumuhenza nduguye. ¹¹ Kpwa kukala uu ndiwo umvoro muriwo usikira kula mwanzo, kukala huhenzane sisi kpwa sisi ¹² Si here Kaini ariyelaa kpwa mwovu achimolaga nduguye. Je, chirichomuhenda amolage nduguye ni noni? Kpwa kukala mahendoge iye gekala maovu, ga nduguye gachikala ga hachi. ¹³ Ndugu zangu, musangalazike, urimwengu uchimvatsukirirwa. ¹⁴ Hamanya hudzombola kare chifoni na kpwenjira uzimani, kpwa kukala hahenza ndugu. Yoyosi ariye kana uhenzo nikukala kahi za chifo. ¹⁵ Mutu yoyosi amutsukirirwaye nduguye ni molagi. Na mwamanya kukala uzima wa kare na kare kaukala ndani ya molagi. ¹⁶ Kahi za riri hamanya henzo, kpwa kukala Masihi wewomboza uzimawe kpwehu. Nasi yahufaa kugomboza maisha gehu kpwa kusudi ra ndugu. ¹⁷ Ala, yoyosi ariye na vitu, na wamona nduguye mwenye uhitaji naye akauzuiliya moyowe wa mbazi dzuluye, je, uhenzo wa Mulungu wakaladze ndaniye? ¹⁸ Anangu ahenzwi, husihenze kpwa milomo wala kpwa maneno mahuhu bali kahi za mahendo na ujeri. ¹⁹ Kahi za riri hamanya kukala sisi hukahi za ujeri, na mioyo yehu yathibitisha kahi za iye. ²⁰ Ichikala mioyo yehu yahuhukumu, Mulungu ni mubomu kuriko mioyo yehu, na iye wamanya mambo gosi. ²¹ Ahenzwi, ichikala mioyo yehu kainda-huhukumu, hunawo ujasiri kpwa Mulungu. ²² Na chochosi huvoyacho hundachihochera kula kpwakpwe, kpwa kukala hazigbwira amurize na hahenda mambo gamuhamirago mbereze. ²³ Na ii ndiyo amuriye: Hafaa kpwamini kahi za dzina ra mwanawe Jesu Masihi na kuhenzana sisi kpwa sisi. Dzahere arivyohupa amuriye. ²⁴ Azitiiye amurize ni kukala ndaniye. Na kpwa riri, hamanya kukala wakala ndani yehu, kpwa iye Roho ariyehupa sisi.