¹ Kho elihereresia, baana befwe, ndielino, khumusaaya nikhimwitsusia mumwami Yesu, mbu, olwa mweechesibwa nineefwe shinga olwa mumanyire okhuchenda nokhumuchamisia Nyasaye, Ne nindio muchendanga, mbu, mumeeteshenje murio. ² Okhuba mumanyire amalako aka khwamulaka khulwa Omwami Yesu shinga olwa Kali. ³ Shichila lino nilio Elia Nyasaye yenya, mbu, amukhole abatathienukhu, mbu, musire obuheyi; ⁴ mbu, buli mundu khwinywe amanye okhuheera omukhasiwe mubuthienukhu nende oluyali. ⁵ Oburakhola mubwilaasi bwobwikombi, shinga abamahanga abaramumanya Nyasaye ta. ⁶ Omundu Yesu aleshe okhuyiira niyonoonelra omwana wabwe mwikhuwa lino; shichila Omwami niye omumali weshikwoli mu yako kosi, shinga olwa khwamuboolera khale nikhumurumbulila. ⁷ Shichila Nyasaye shiyakhulanjira shifwabi ta, habula mubuthienukhu. ⁸ Kho oukhaya kano shiakhayiraa omundu ta, habula Nyasaye oumuheleesia Rohowe omulafu. ⁹ Khumakhuwa akokhuheeranga abaana befwe, libulaho elichira nimuhandichila ta, shichira inywe abeene mwechesibwa nende Nyasaye okhuheerananga: ¹⁰ Okhuba toto mwene, nolwa mubakholelanga abaana beefwe bosi abomuMakedonia bosi. Ne khumuchesiiyia, abaana beefwe mbu, mushiraane muno: ¹¹ Khandi mbu, muchoome okhwichenderesia mubuholerefu, nokhulinda akali akeenywe, nokhukhola emilimo namakhono, shinga olwa khwamulaka, ¹² mbu, muchendenje obulayi imbeli wabali elwanyi, khandi mbu, muleshe okhutamba eshindu ta. ¹³ Ne shikhwenya mbu, mukorwe, bana beefwe, khuka abo abakona tsindoolo ta: mbu, muleshenje okhuberera shinga abandi abo ababula obunayi. ¹⁴ Shichila shinga olwa khasuubira mbu, Yesu yafwa nalamukha, khandi bario abeenabo abakona tsindoolo mbu, Nyasaye aletsa ninabo. ¹⁵ Okhuba kano khwamuboolera khulwa likhuwa lioMwami, mbu ifwe Ababa nikhushiriho mwoyo, abatong'a okhurula khokhwitsa khwoMwami shikhulabaranjirira balia abamala okhukona nahatuutu ta. ¹⁶ Okhuba Omwami omwene aleekha okhurula Mwikulu halala nomulanjisio nomwoyo kwa malaika omukhulundu, nende olwika lwa Nyasaye; nabo abafwira muKristo balaranjirira okhulamukha; ¹⁷ Mana ifwe Ababa nikhushiriho mwoyo khwalaakana ninabo halala mumaleesi, okhwakaana noMwami mulwanga; mana khurio khulabeetsanga noMwami tsinyanga tsiosi. ¹⁸ Kho mulemanie emioyo nende amakhuwa kano.