¹ Aliho khunywe ouli nende likhuwa nowashie? Shialateema okhuyira omuse imberi wabanashialo ta. ² Shimumanyire mbu abatsienukhu nibayaasie eshialo tawe? ni kakhaba mbu eshialo nishiyaasibwe nende nywe, shimunyala okhuyasia amakhuwa amatiti ta. ³ Shimumanyire mbu nakhuyaasie malaika? ne khulashira muno okhuyaasia amakhuwa komubulamu buno? ⁴ Kho kario nimuba mbu munyala okhuyaasia amakhuwa keshialo shino? mubakhola abayaasi balia ababula eshindu muhekalu. ⁵ Emboola yako okhubafimbia omurwe, nohomba shikali kario? mbu hakari wenyu shikhulikhwo nende kata omundu mulala ouli nende amachesi tawe? nohomba kata mulala okhwitsa okhuyaasia abaana babo ta. ⁶ Omundu asitaka owashie khandi imberi wabandi beshialo. ⁷ Bulano khuli nende obuleemu hakari wenyu, neshichira nimuyirana imberi wamalaika shichira shibuli obulayi okhuumisania tawe. ⁸ Halali shibeka nende yako muumisanie nende okhunuula abandu emiandu chiabo kata nende echiabasiani benyu. ⁹ Shimumanyire mbu abonooni shinibalole obwami bwomwikulu ta? mulakatibwa ta, kata abaheyi, kata abokhwinamira ebifwanani ta, nohomba abeelasi, abatamba nende abamanyeko. ¹⁰ Nohomba abeefi, nohomba abobwikombi, nohomba abamanyeko, nohomba abanuuli shibalilola obwami bwa Nyasaye ta. ¹¹ Ne abandi munywe bali beimero eyo, halali mwosibwa, mana muli abatsienukhu mana mulibalirwa obulunjishi muliira liOmwami Yesu nende Roho w Nyasaye wefu. ¹² Amakhuwa koosi namalakhuule khwisie, halali shibili biosi ebikhoyere tawe, ebindu biosi nebilakhuule khusie halali esie shindiitsa okhuba hasi weshindu shiosi shiosi tawe. ¹³ Ebiokhulia nikhulwa indaa, indaa nikhulwa ebiokhulia, halali Nyasaye yetsa okhusasia biosi indaa nende ebiokhulia, shichira omubiri shikuli okwobwilaasi tawe nebutswa okwOmwami naye Omwami khulwa Omubiri. ¹⁴ Naye Nyasaye yamusimulukusia Omwami, khandi yetsa okhusimulukusia fwe khubunyalibwe. ¹⁵ Mumanyirisie mbu emibiri chienywe nebiungo bia Kristo, ne wakhabukula oriena eshiungo shia Kristo mana uungasie nende omwilaasi? shikanyalikha ta. ¹⁶ Nohomba shimumanyire mbu yesi yesi oulimaasibwa nende omwilaasi, nomubiri mulala shichira babiri betsa okhuba omubiri mulala. ¹⁷ Halali ourebwa halala nende Omwami balaba Roho ndala. ¹⁸ Irushe obwilaasi, buli shia imbi yomundu akhola eyili erwanyi womubiri, halali oukhola obwilaasi akhola imbi shibeka nende omubiri kukwe omwene. ¹⁹ Kho karie? Shimumanyirisie mbu emibiri chienywe neihekalu ya Roho Omutsienukhu ouli munywe, owamwaheresibwa nende Nyasaye, nebulano enywe shimuli omwandu kwenyu abeene ta. ²⁰ Shichira enywe mwakulwa obukusi khulwa eshio muchinguule Omwami mumibiri chienyu nende muRoho tsienyu ebili bia Nyasaye.