¹ Kabolekhanga mbu obwilasi buli hakarii wenyu khandi obwilasi bulahulirikhangakhwo khubamahanga tawe, mbu omundu okhuba nende omukhasi wa Samwana. ² Nenyu mwiyitsiala, mana shimubererakhwo ta, mbu oukholere eshikhole ishio arusibwe hakari wenyu. ³ Akatoto nendaba mumubiri ta halali nembaho nuRoho, esie mwene emalire okhumukhalachira oukholere eshikhole esho shingana oubereho. ⁴ Mulira lio Omwami wefwe Yesu Kristo, olwa muba nimwibunjeresia halala nende Roho yanje mubunyali bwOmwami wefwe Yesu Kristo. ⁵ Omulakhuulira shetani omundu wuyo khulwa obusasishi bwomubiri, kho iroho ihonokoshe inyanga yOmwami Yesu. ⁶ Okhwiyiitsiala khwenyu shikhuli okhulayi tawe, shimumanyire mbu limera lititi lisasia omukate omulamba. ⁷ Kario mwitsienule muyinie limera liikhulu mbu munyale okhuba omukate omulamba shinga olwa mwali nimushiiri okhurebwamwo limera, shichira kata Kristo ouli lisabo liefwe amalire okhuyiinyibwa khufwe. ⁸ Khulwesho lekha khukhole omulukha okubulamwo limera likhulu, halali khwimera liobubii nende obwonooni, nebutswa omukaate kubulamwo limera nikwo obutsienukhu nende obwatoto. ⁹ Ndabahandichira mubarwa mbu mulachenda mumukanda mulala nende abelaasi tawe. ¹⁰ Shembooolanga mbu muleshe okhuchenda halala nende abelaasi beshialo shino ta, nohomba nende abekombi, nohomba abanuuli, nohomba abenamiraanga eminyasaye, shichira kano kenya mbu murule mushialo. ¹¹ Halali bulano ebahandichira mbu muleshe okhutsookana nende omundu yesi owilanga omwana wenywe, naba nali omuheyi, omulangukhu, kata omwinamiri webifwanani, kata omunyechi, kata omumeesi, kata omunuuli, kata okhulia muraaliitsanga nende oufwana ario tawe. ¹² Kakhoonya shiina okhubakhalachira balia abali erwanyi? Nenyu abeene shimuyaasinjia abali mukari? ¹³ Halali abali erwanyi, Nyasaye alabayaasia, enywe muinie ouli hakari wenywu.