¹ Ne bulaano okhulondokhana nende amakhuwa kamwahandichira, bwakhabeere obulahi omusaatsa alatiira khumukhasi tawe. ² Ne kata kario khulwa okhwikalira obuheyi, buli omusaatsa akhoyere okhuba nende omukhasiwe, naye khandi omukhasi akhoyere okhuba nende omusaatsawe. ³ Kho omusatsa shiali nende obunyali khumubiri kukwe ta, khandi omukhasi ario. ⁴ Omukhasi shiali nende obunyali khumubirikwe omwene ta habula omusaatsawe khandi omusaatsa yesi ario shiali nobunyali khumubirikwe omwene ta habula omukhasiwe. ⁵ Muleemananga ta habula nimuba nimuhulirisania okhulekhanakhwo khu shise mbu mwihane khukhusaaya, mana mukalukhe halala khandi mbu setani aleshe okhumuteema khulwa okhubula okhwiruka khwenyu. ⁶ Ne kano emboola butswa shingana oulaka omunwa, ne shendachirisia ta. ⁷ Kho ndekomba mbu embe eshilolero khubasaatsa. Habutswa buli mundu ali nende eshihanwa shie okhurula khuNyasaye. ⁸ Ne emboola bulaano khubalia abalateeshia ta nende abalekhwa, nobulayi khubo okhumenya shingana sie. ⁹ Ne nibaba nibakhaywa okhwiruka bateeshanie shichira okhuteeshania khushira okhuyiitsanga khulwa obwikombi. ¹⁰ Ne khubateeshania endaka kata shiendi sie ta habula Omwami, mbu omukhasi alarula khumusaatsawe ta. ¹¹ Nebutswa naba namulekha, amenye yenyene nohomba amukalushire omusaatsawe, omusaatsa naye alamulekha omukhsiwe ta. ¹² Ne khubandi emboola, nalali Omwami ouboola ta, mbu omusiani wefu yesi yesi naba nali nende omukhasi ulali omusuubirwa nayeniyeyama okhumenya ninaye shialamulonda ta. ¹³ Naye omukhasi ouba nali nende omusaatsa ulali omusuubirwa shialamulekha ta. ¹⁴ Shichira omusaatsa oulali omusuubiri ta atsienulwa khuNyasaye khulwa omukhasiwe; naye omukhasi ulali omusuubiri ta atsienulwa khuNyasaye khulwa omustsawe, nebutswa abaana beenywu bakhabere abeshifwabi, ne bulano nabatsienukhu. ¹⁵ Ne oyo oulali omusuubiri naba natsia, lekha atsie nikali kario, omusiani nohomba omukhana shibali mumbohe yosi yosi ta, habula Nyasaye yakhulanga khumenye mumulembe. ¹⁶ Okhuba eywe omukhasi omanyira shiina niwakhamuhonokosiiye omusaatsawo kata eywe omusaatsa omanyira shiina noba niwakhahonokosiye omukhasiwo. ¹⁷ Habula mbu shinga olwa Omwami yakabira buli mundu khandi Nyasaye olwa yalanga buli mundu neendio akhoyere okhuchenda ario. Khandi neendio endachirisinjia mumakanisa. ¹⁸ Aliho owalangwa niyashebwa? Aleshe okhwikhola shinga omusinde: Aliho owalangwa nali omusinde? Aleshe okhushebwa. ¹⁹ Eshishebo shishili eshindu ta, khandi obusinde shishili eshindu ta habula okhulindanga amalako kaNyasaye. ²⁰ Buli mundu atsiririre ario mumero yiyalimwo olwa yalangwa. ²¹ Walangwa olwa wali noli omusumba? shilili likhuwa ta, noba nonyala okhunyoola obulekhuule, obunyoole orio. ²² Oyo owalangwa nali omulakhuule, niye omusumba waKristo. ²³ Mwakulwa obukusii, mulekhola abasumba ababohe babandu tawe. ²⁴ Baana befu buli mundu atsiririre ario shinga yalangwa nende Nyasaye. ²⁵ Ne bulaano khumakhuwa ka abali abasishira shiendi nelilako liosi liOmwami ta, nekhola obukhalachi bwanje shinga olwa endi omundu omwisikwa khulwa tsimbabasi tsiOmwami khwisie. ²⁶ Esie enduutsi mbu khulwa amatinyu kaliho, nobulayi omundu okhubeetsanga shinga lwa ali. ²⁷ Eywe wabohwa khumukhasiwo? shiolakhaaba okhubololwa ta; ne oulabohwa ta, shiolakhaaba omukhasi ta. ²⁸ Ne noba noteeshia shioba niwonoonere ta. Omukhaana naba nateeshibwa, shiaba niyonoonere ta. Ne abakhola bario balanyoola amatinyu mumibiri chiabo ne nasi ebaleshere. ²⁹ Baana befu eliebaboolera ndielino mbu ebise bititiye mbu okhuula ebise bino abali nabakhasi bekhole shingana ababula. ³⁰ Nabo abalira shinga abalalira ta, abeekhoya shinga abalekhoya ta, abakuulanga shinga ababula emiandu. ³¹ Kata abeekhonyera ebieshialo shinga abalabikhonyera ta okhuba libaa lieshialo shino liwetsangaho. ³² Ne ndakheenya mbu mubule obuhendi bwosi. Uyo oulali nomukhasi ta ahenderanga ebindu biOmwami shinga olwa yakhanyala okhumuchamisia Omwami. ³³ Ne uyo ouli nomukhasi ahenderanga amakhuwa keshialo shinga okhuchamisia omukhasiwe. ³⁴ Ne omukhasiwe yesi abeetsanga niyeekabuule eshikhabiri nende mumwoyo. Ne omukhaana oulateeshibwa ta ahenderanga Omwa mbu abe omutakatifu omwoyo nende iroho yosi nebutswa ouli nomusaatsa ahenderanga akeshialo shinga olwa yakhachamisia omusatsawe. ³⁵ Kano ekaboolanga khulwenyu shikali mbu emubohe ta habula khulwako akakhoyeere khandi mukhalabanirenje Omwami obula ekoyokoyia ta. ³⁶ Ne omundu yesi naba naluutsi mbu shiamukholeranga omwitsawe omusishira akali habwene ta, obwikoombi nibuba nibushirana akhole kayeenya nikaba nikakhoyeere kario, bateeshanie, shibuli obwonooni ta. ³⁷ Ne oyo owa omwoyokwe kuboolere oubula okhuhachirisibwa, ne nali nobunyali okhwiruka okhwenyakhwe, namalire okhurakhwo omwoyo khwikhuwa lino mbu okhulinda omusishirawe, akhola obulayi. ³⁸ Kho outeeshia omusishira akhola obulayi khandi oulamuteeshia ta akhola obulayi muno. ³⁹ Omukhasi abeetsanga omubohe khwilako omusatsawe ashiriho mumwoyo, ne omusatsa olwa aba nafwire, nomulekhule anyala okhuteeshibwa nende omundu yesi owa omwene achama habula mbu khukholerwe muMwami. ⁴⁰ Ne khulwanje enduutsi mbu yakhaba omusaangafu okhushira naba natong'a ario shinga ali ne esuubira mbu siesi endi nende Roho ya Nyasaye.