¹ Khaabe okhukhola amalayi nende okhwikomba ebihanwa ebilayi, nebutswa mube nende oburoobi. ² Shichira uyo ouboola mutsinimi tsilamanyikhane shaboolanga khubandu tawe, nebutswa khu Nyasaye, okhuba abulaho kata mulala oumanyirisinjia tawe, kario mutsinimi emboolanga akamabiso. Ulia ourooba aboolera ³ abandu khulwa okhubombakha nende okhuchingula nokhuhotseresia. ⁴ Ye ouboola mutsinimi yeyumbakha omwene; ne ulia ouhaana oburobi akhusia likanisa. ⁵ Ndikoombanga mbu mwesi muboole mutsinimi nebutswa mube abaroobi, okhuba uyo ourooba ayoomba ouboola mutsinimi, okhuba olwa omukaluli abaaho kachire likanisa likaase. ⁶ Ne bulano baana befu, nindakhetsa khunywe nemboolanga mutsinimi, ndakhamukasira shiina, halali ndaboola ninenywe nende obufimbuli nohomba obuchesi, nohomba oburoobi kata nende amechesio? ⁷ Kata ebindu bibula obulamu bikhupa obuyoka, olwika nohomba obukhana, kario mbu olwika lukhupire kata mbu obukhana bukhupirwe. ⁸ Okhuba nikaba olwika shilunyala okhuhulirikha tawe, niwiina ouheera okhutsia mwihe. ⁹ Nendio mbu nikalaboolwa nende olulimi amakhuwa akalahulirikha ta, omundu yesi yakhamanya arie amakhuwa kamuboolanga? Kamuboolanga kaba nikatsitsanga eshikhaya. ¹⁰ Khuli netsinimi tsinyinji mushialo nebutswa lubulaho khutsio olulali neshisina shialwo tawe. ¹¹ Nebutswa nendamanyire eshisina shiolulimi luboolungwa, omundu ouboolanga aba omucheni khusie nasi khandi ndalaba omucheni khuye. ¹² Khandi kario olwa enywe abeene mwikombanga okhuba nebihanwa bia roho okhuula muteeme akamunyala okhuyomba koosi okhwikhonyera ebihaanwa yibo khulwa okhumbakha abeikanisa bosi. ¹³ Khulwesho, omundu ouboolera mutsinimi tsinjeni okhuula asabe aheebwe eshihanwa shiokhukalukhasia akaba naboolanga. ¹⁴ Okhuba nemba nesaba Nyasaye mululimi olucheni, iroho yanje yisabanga toto, nebutswa amapaaro kanje shikasanjiranamwo tawe. ¹⁵ Kho okhuula ekhole shiina? ekhoyere okhusaba nende royo yanje khandi nende amapaaro kanje, ekhoyere okhwimba nende roho yanje, kandi nende amapaaro kanje. ¹⁶ Kho olwa okhupa orio khu Nyasaye muroho yonyene, omundu namundu butswa anyala arie okhusanjirana ninawe khulwa okhuboola mbu, "Amina" khumasaayo kokhupa orio? Shialikhwo nende injira yosi yosi eyokhumanya aka asayanga ta. ¹⁷ Kata amasayoko kokhupa orio khu Nyasaye nikaba amalayi muno, omundu undi uyo shiyoombakhwa ta. ¹⁸ Ekhupiiranga Nyasaye orio mbu esie embooleranga mutsinimi tsinjeni muno okhushira nywe mwesi. ¹⁹ Nebutswa mumukhung'ano kweikanisa nobulayi emboole amakhuwa karano akanyala okhuhulirikha khulwa okhwechesia abandi, okhushira okhuboola amakhuwa ebikhumi munimi tsinjeni. ²⁰ Abaana befu, bulayiririsinjie shingana abaana tawe, nebutswa mube ababula obwonooni shiangana abaana abatiti, nebutswa muyiririsie mumapaaro kenywe shingana abandu bakhulire. ²¹ Kahandikwa mumalako mbu Omwami yaboola ari ndalaboolerana nende abandu bano mutsinimi tsinjeni, khandi muminwa chiabandu abacheni, ne kata kario shibahulira ta, Omwami aboola. ²² Kho bulaano eshihanwa shiokhuboolera mutsinimi tsinjeni neshilolero khu yabo abashiiri okhusuubira, tawe khu yabo abasuubira, nashio eshihanwa shiokhukamba oburume bwamakhuwa aka Nyasaye neshilolero khubasuubira, tawe khubashiri okhusuubira. ²³ Kho nikakhaba mbu, ikanisa yosi ikhung'ana halala mana buli shiamundu achake okhubooba mutsinimi tsinjeni, mana betsemwo abandi abalasoma ta nohomba abalasuubira ta, shibalaboola mbu nywe mulaluushe. ²⁴ Nebutswa nikaba mbu buli mundu akambanga oburume bwamakhuwa ka Nyasaye, mana oushiiri okhusuubira nohomba oundi yesi niyenjiramwo, aleyama habulafu obwonoonibwe khulwa amakhuwa kalahulira akalamukhalachira omwene eshiina. ²⁵ Amapaaroke komukari kalarerwa habulafu, naye alenamia obwenibwe hasi, ne alamwinamira Nyasaye, niyeyamanga mbu, toto mwene Nyasaye ali ninenyu. ²⁶ Kho karie, baana befu? olwa muba nimwitsa halala mukhusaya, buli mulala wenyu abe nolwimbo, oundi nende obwibaali, oundi libisulo okhurula khu Nyasaye, oundi oburume mutsinimi tsinjeni, koosi kamukhola okhuula kabe akobukhonyi bwokhutinyisia likanisa. ²⁷ Nikakhaba ambu omundu aboola mutsinimi tsinjeni, okhuula babe babiri nohomba bataru abeyamirwa okhuboola nibalondana, okhuula abeho oundi oulakalula akaba nikaboolungwa. ²⁸ Nebutswa omundu nalaliho ounyala okhukalula, kho omundu uyo ouboolanga mutsinimi tsinjeni okhuula aholeere mana yeeboolere masirisi ye omwene nende Nyasaye. ²⁹ Abalakusi babiri nohomba bataru abaheresibwe oburume bwa amakhuwa ka Nyasaye bakhoyere okhukamba nabo abandi nibarecheresia okhumanyirisia obulayi akaboolungwa. ³⁰ Nebutswa oundi ouli mumukhung'ano naba nafimbulirwa likhuwa olwa mberi aholere mberio. ³¹ Okhuba mwesi pe munyala okhukamba oburume bwa Nyasaye shiamulala mulala, mana abaliho boosi beeche amakhuwa, nende okhutinyisibwa. ³² Eshihaanwa shiobulakusi okhuula shibe hasi wobunyali bwomulakusi, ³³ Shichira Nyasaye shiali obuchachiro bwobukoyanu ta, habula womulembe, shinga olwakali mutsikanisa tsiosi tsiabaKristo. ³⁴ Ne abakhasi benyu baholere tsi mutsikanisa, okhuba shibafuchirirwa okhuboola ta: halali balachirisibwa okhuba abahuliri shinga olwa lilako liboola. ³⁵ Ne nibakhenya okhumanya liosi bareebe abasaatsa babo ingo okhuba neshifimbwa murwe omukhasi okhuboola mumukhung'ano kweikanisa. ³⁶ Kho karie? Mupaaranga mbu likhuwa lia Nyasaye liachachira khunywe? nohomba mbu nenywe abalietsera? ³⁷ Omundu yesi owilanga omurume, nohomba khuba nende eshihanwa shia Roho, okhuula amanye mbu akemuhandichiranga kano nelilako liOmwami. ³⁸ Ne yesi omundu yesi naba nalamanyirisia ta, alabula obumanyirisi. ³⁹ Khulwesho, abaherwa, mwikoombe okhulakula, nebutswa mulabekaliira balia ababoola mutsinimi ta. ⁴⁰ Habula amakhuwa kosi okhuula kekhole munjira indayi yahabwene.