¹ Kata nemba nemboolera mutsinimi tsiabandu nende tsiabamalaika, ne nembula obuheeri, endi butswa shinga omukasa okulanjirira nomba ebisiri ebisaala. Kata nendi ² neshihanwa shiobulakusi nekamanya amabiso koosi nende obumanyi bwosi kata nendi nobusuubiri bwosi obunyala okhusitia ebikulu ne embule obuheeri shendi eshindu ta, ³ Mbu kata nemba nembukula emiandu chianje neheresia abamanani, kata nehana omubiri kwanje kusambwe, nembula obuheeri, shikungasira eshindu ta. ⁴ Obuheeri bwisumirisinjia, bukholanga akeshisa, obuheeri bubula imbalikha, obuheeri shibwiboola ta, shibwichinguula ta. ⁵ Obuheeri shibukhola akalakhoyere ta, shibukhabanga abwakwo obwene ta, shibusinyikhanga ta, shibwitsuliranga amabii akabwakholerwa ta. ⁶ Shibwikhoyera obumayanu ta, halali bwikhoyeranga obwatoto. ⁷ Bwifwira kosi, busuubira kosi, bunaya kosi, buralira mukosi. ⁸ Obuheeri shibukhayungwa ta, ne kata nikhuba nende obulakusi bwitsa okhwakama, kata tsinimi nitsiliho tsiitsa okhuhwaho kata obumanyi nibuliho bwitsa okhwakama. ⁹ Okhuba khumanyire mubuyinjikhanu, khulakula mubuyinjikhanu. ¹⁰ Ne yako akali amachima olwa kaliba nikoolere, amayinjikhanu kalihwaho. ¹¹ Olwa ndali omwana ndaboola shinga omwana, ndamanyirisia shinga omwana, ndapaaranga shinga omwana, ndayiririsinjia shinga omwana ne bulano olwa endi omundu omukhongo endeshere akolwana. ¹² Okhuba bulaano khuboolanga mushilolero, mumaweruweru, ne bulano mumoni namoni leero emanyire mubuyinjikhanu, ndilimanyira elala shinga siesi olwa ndamanyibwa elala. ¹³ Kho akatsirira ngakano mbu obusuubiri, obunayi, obuheeri, nako kataru likhongo khuko eslishira koosi nobuheeri.