¹ Bulano akakwana ebihanwa bia Roho, abaheerwa, shindenya mubule okhumanya ta. ² Mumanyire mbu olwa mwali abandu beshialo, mwabukulwa okhulonda ebifwanaani ebilaboolanga kata shinga olwa bemirirwa. ³ Khulwesho ndenya mumanye mbu abulaho omundu ouboolanga muRoho ya Nyasaye ouboolanga mbu Yesu alaamwa, nohomba omundu shianyala okhuboola Yesu nOmwami nalali muRoho Omutsienukhu. ⁴ Bulano khuli nende obwabukhani mubihanwa halali Roho ni mulala. ⁵ Khan di khuli nende obwabukhani halali Omwami mulala. ⁶ Khandi khuli nende obwabukhani mukhukhola emilimo halali Nyasaye mulala oukholanga koosi mubiosi. ⁷ Halali buli shiamulala yaheresibwa obufimbuli bwa Roho khulwa okhukhoonyana. ⁸ Shichira omundu mulala muRoho aheresibwa likhuwa elia amachesi, naye oundi eliobumanyirisi nende Roho mulala uliiya. ⁹ Oundi owobusuubiri muroho mulala ulia, naye oundi eshihanwa shiokhuhonia muroho mulala ulia. ¹⁰ Naye oundi ebikhole biamangalimwa, naye oundi obunabii, naye oundi roho wobumanyirisi, naye oundi okhuhenjeresia tsinimi. ¹¹ Ne koosi kakholwa nende rho mulala ulia nakabulira buli mundu shinga olwa yehuliire. ¹² Shinga na olwa omubiri kuli mulala nende ebiungo ebinji, ne ebiungo biomubiri mulala kuno nibili ebiinji bili mumubiri mulala nendio kali nende Kristo. ¹³ Shichira muroho mulala fwesi khwabatisibwa mumubiri mulala, kata kakhaba khwali abaYahudi nohomba abaYunani. Kakhaba khwali abarumwa nohomba abalakhuule, nefwe fwesi khwanywesibwa roho mulala. ¹⁴ Shichira omubiri shikuli eshiungo shilala tawe, ebinji. ¹⁵ Nikaba eshirenje shilaboola mbu khulwa okhuba esie shiendi omukhono ta, shiendi womubiri ta; shihili shiomubiri tawe. ¹⁶ Ne kakhaba mbu shirwi shiboola mbu esie shiendi imoni ta, bulano shiendi womubiri ta, shishili shiomubiri ta. ¹⁷ Ni kakhaba mbu omubiri kwosi kwakhabeere imoni, okhuhulira khwakhabere hena? kakhaba mbu kwosi kwakhabeere okhuhulira okhuhunyirisia khwakhabeere hena? ¹⁸ Halali Nyasaye abirerire ebiungo bino biosi khumubiri, shinga olwa kamuchamisia. ¹⁹ Nikakhaba mbu biosi biakhabeere eshiungo shilala, omubiri kwakhabere hena? ²⁰ Halali bulano khuli nende ebiinji habutswa omubiri mulala. ²¹ Khandi imoni shiyinyala okhuboolera omukhono mbu shekhenyere tawe, nohomba khandi omurwe khushurenje mbu shekhwenyere ta. ²² Kata kario ebilonje bipaaranga mbu nebiteshere nebieinganga muno. ²³ Ne khandi ebilonje ebia omubiri, ebiakhupaaranga mbu shibili nende oluyali olukali, khuheresie oluyali olukhongo ne khandi ebilonje biefu ebilayi nende obulayi bulano nebilayi okhushira. ²⁴ shichira ebilonje biefu ebilayi shibili nende elienya tawe, halali Nyasaye yakuraa halala omubiri, nende okhushiheresia eshiungo shili nende obuleemu oluyali olukhongo. ²⁵ Mbu kho khulaba nende okhwiyahula mumubiri ta halali mbu ebitonye bibe nende okhuhendanira mulala khu undi. ²⁶ Ne eshiungo shilala nishiba nishinyakhana, ebindi biosi binyakhana halala ninashio, ne eshiungo shilala nishiba nitsatsala, ebindi bitsatsala halala ninashio. ²⁷ Bulano muli omubiri kwa Kristo, mana abasanji mubulala. ²⁸ Khandi Nyasaye arereyo abandi muhekalu, obokhuranga abarume, abakhabiri abanabii, abakhataru abebaali, olunyuma amangalimwa nende ebihanwa bia okkhuhonia, okhukhoonya, obusinjiriri nende tsinimi tsiabukhane. ²⁹ Bosi nabarume? boosi bakholanga amangalimwa? ³⁰ Bosi bali nende ebihanwa biokhuhonia? Ne boosi baboolanga mutsinimi? ne boosi banyala okhukalukhasia. ³¹ Ne murekhwo omwoyo ebihanwa biosi ebili ebilayi.