¹ Akemetakhwo baana befu, yaanze muleshe okhuba nende eshileka, shinga olwa abapapa befu babusiribwa mwileesi, khandi, khandi nibakhalasia inyanza; ² ne bosi babatisibwa halala nende Musa mumaleesi nende mumnyanza. ³ Mana bosi nibalia inyama ndala eya roho. ⁴ Khandi bosi nibanywa eshinywebwa shia roho, eshiabanywa khulwanda lwabalondakhwo, ne olwanda olo lwali Kristo. ⁵ Ne Nyasaye shiyachamisibwa ninabo boosi tawe, neshiachira boosi nibasukunwa mushitsimi. ⁶ Ne kano koosi neshilolero khufwe, eshifune mbu khuleshe obwikoombi bwebindu ebibii, shinga olwa boosi bekomba. ⁷ Kata shimulekholera ebifwanani shinga olwa abandi khubo bakhola mana nikaaandikwa, abandu bekhala hasi nibalia nibanywa mana nibasinjira nibatsia okhubaya. ⁸ Shikhulakhola akobwilaasi, shinga olwa yabo bakhola tawe, mana khunyanga ndala bwafwa ebikhumira amakhumi kataru nende amakhumi kabiri. ⁹ Khuleshe okhuteema Kristo shinga olwa balala bamuteema, mana nibamululwa netsinzokha. ¹⁰ Shimulabulula tawe, shinga olwa balala khubo babuulula mana nibamululwa nende omumululi. ¹¹ Bulaano kano koosi kekholekha khubo shinga eshilolero, ne kaandikwa khulwefu mbu kabe elieko, khufwe abeshihesi shieshialo shiosi shirulamwo. ¹² Ne uyo oupaaranga mbu asinjire tiiri ahenje nebutswa yetsukhana nakwa. ¹³ Khushiri okhuba nende amatemo okhuyomba yako akali akakhasootso khumundu ta, nebutswa Nyasaye nomusuubirwa oulanyala okhulekha oteemwe okhuyomba obunyalibwo, ne alahaana injira yokhuhokosheramwo okhurula mumatemo, kachire obe ounyala okhwifwira. ¹⁴ Khulwa yako baana befu, mwiyinie khukhunamira ebifwanani. ¹⁵ Emboola shinga oubolera abandu abachesi; mukhalache akemboola abeene. ¹⁶ Eshikombe shiefu shietsikhabi shishiri nishio eshiobusanjirani bwamatsayi ka Kristo? Ne omukate okwakhufinakanga shikuli nikwo obusanjirani bwomubiri kwa Kristo? ¹⁷ Okhuba khuli abanji omukate mulala omubiri mulala, fwesi khusanjirana khumukate mulala kulia. ¹⁸ Lole! abaIsiraeli abali mumubiri, shibali nibo abalitsanga eshihanirwe khumusango kwokhubwaali? ¹⁹ Kho emboola shiina? mbu eshindu shiomusango okumalirwa ebifwanani nishio eshindu toto? Kata mbu eshifwanani nishio eshindu toto? ²⁰ Kho emboola mbu, ebindu biabaMahanga bahaana omusango, bahana khubishieno, khu Nyasaye tawe: ne shindakhenya mbu mube nobusanjirani nende ebishieno tawe. ²¹ Shimunyala okhunywa mushikombe shiOmwami khandi mushikombe shia shetani, shionyala okhulia khumesa yOmwami khandi olie khumesa ya shetani tawe. ²² Khwenyanga okhukhola Omwami atiirwe neimbalikha noho? khupaaranga mbu khuli namani okhumuyomba noho? ²³ Ni toto mbu endi nende obulakhule bwokhukhola ebindu biosi, nebutswa buli shindu shishili eshilayi tawe: ni tooto endi nobulakhule bwokhukhola ebindu biosi, nebutswa buli shindu shishili shiobukhonyi ta. ²⁴ Shimulekhabira akamukasira abeene ta, habula khabenje akakasira abashienyu. ²⁵ Muli abalekhuule okhulia shiosi shiosi eshikusibuungwa khushiiro, nimulareeba amarebo ta mbu muleshe okhwonoonia amapaaro kenywe. ²⁶ Shinga olwa amahandiko kaboola mbu, "eshialo shiosi nende ebilimwo ne biOmwami." ²⁷ Omundu oulasuubira ta naba nakhwinjisia okhulia eshiokhulia, nofuchirira okhutsia olie eshiokhulia shiosi eshia akhurenjeshere, ne shiolareberesia likhuwa liosi, khulwa okhwenya okhumanya. ²⁸ Nebutswa omundu undi nakhuboolera mbu, "Ebiokhulia bino nebihaanirwe omusango khubifwanani," kho shiolalia tawe khulwa oukhuboolere nende okhulekha okhwonoona amapaaro komwoyo kwo. ²⁹ Ne shikali khulwa amapaaro koko wenyene ta halali khulwa abandi: kho shichira shina obulakhule bwanje bwokhukhola liosi elia ndenya bwikalirwa nende amapaaro komwoyo kwomundu undi? ³⁰ Esie nembe nekhupira Nyasaye orio khulwa ebiokhulia bianje, eshiakhachira omundu yesi nianzinjirira khulwa ebiekhupiire orio nishiina? ³¹ Kata noba nolia nohomba nonywa nohomba liosi liokhola, khola khulwa okhumuchinguula Nyasaye. ³² Mumenye obulamu obulayi nimulesichirasia abaYahudi nomba Abamahanga nomba abaKristo. ³³ Khole butswa shinga olwa ekholanga, endeemanga okhuchamisia buli mundu mumakhuwa koosi akekholanga, nindalekhabira omwene akanjamisia ta, nebutswa nekhabanga akachamisia abandu boosi kho mbu banyale okhuhonibwa.