¹ Esie shiendi omulakhuule? Esie shiendi omurume? Esie shindalola Yesu Omwami wefwe? Ne nenyu shimuli ebiamo biemilimo chianje mumwami? ² Kata khubandi nendali omurume ta, nebutswa endi omurume khumywe: Shichira enywe muli eshibalikho eshioburume bwanje mumwami. ³ Obwiteetsi bwanje imberi wa balia abanalire ni buno, ⁴ Shikhuli nobwihango okhulia nokhunywa khulwa emilimo chiefu ta? ⁵ Kho shikhuli nobulakhuule okhutsia tsinjendo tsiefu nabakhasi abaKristo shinga olwa abarume nende abasiani babo Omwami nende kata Petero batsiitsanga ninabo ta? ⁶ Nomba nesie nende Barinaba fwenyene abakhoyere okhukhola emilimo mbu kho khunyoole eshiakhulia? ⁷ Yakhaba omusikari shiina ounyala okhwirunjira omwene khubiarumushira mwihe? katayakhaba omulimi shiina oulaliakhwo ebiamo ebirula mumukundakwe kwemitsabibu? Nomba yakhaba omwayi shiina oulanyala okhunywakhwo amabeere akarula mubiayobie? ⁸ Shekhoyere okhwilolera ebilolero biabulinyanga tawe, shichira kata amalako kosi kaboolanga amakhuwa malala yako. ⁹ Khusoomanga mumalako ka Musa mbu, olaboohanga ing'ombe omunwa olwa iba nihulanga ingano ta. Kho Nyasaye ahenderangakhwo akeing'ombe noho? ¹⁰ Olwa Nyasaye yaboola ario shiyachoomanga okhuboola khufwe? kali kario mbu, kahandikwa khulwefu. Omundu ulimanga nende oufunanga bekhoyeera okhukhola emilimo chiabo nibanayanga mbu bali nomukabo khu ebiabachesa yibo. ¹¹ Efwe khwarachire munywe imwo yeshiroho, nelikhuwa likhongo nikhuba nikhufuna akemibiri khunywe. ¹² Ni kakhaba abandi bali habwene okhunyoola ebindu bino khunywe, efwe nefu shikhuli habwene kata okhuyombakhwo yabo? kata kario efwe shikhwarumushira obunyali ibo tawe. Habula khwifwira mumakhuwa koosi mbu khuleshe okhura eshicherasio khumakhuwa amalayi ka Kristo. ¹³ Enywe shimumanyire abandu abakhalabananga muhekalu banyoola ebiokhulia biabo muhekalu. ¹⁴ Munjira ndala iyo, Omwami yara lilako mbu yabo abakambanga injili okhuula banyoole ebia balia okhurula khu njili eyo. ¹⁵ Nebutswa esie eshiri okhwikhonyerakhwo obunyali yibo ne kata shehaandikanga kano mbu kho mukholere akenyekha tawe. Bwakhaba obulayi ndafwa okhuyomba yako. Abulaho ounyala okhukalukhasia okhwiyitsiala khwanje khuno okhuba okhukhaya ta. ¹⁶ Shiendi nende obunyali bwokhwiyitsiala butswa shichira engambanga injili tawe: kata kario endi hasi wamalako okhuyaala injili, nebutswa bwakhaba obubii okhushira nikaba mbu sheyala injili ta. ¹⁷ Kalaba mbu ekholanga emilimo chianje khulwa okhwenya khwanje, ndakhalirire okhurungwa nebutswa echikholanga shinga omusinjiriri wachio shichira nemilimo echia Nyasaye yabesia okhukhola. ¹⁸ Kho bulaano omurungo kwanje ni shiina? Omurungo kwanje nobulekhuule bwokhukamba amakhuwa amalayi obularungwa, nende okhulekha okhubaanza akekhoyere okhunyoola khulwa emilimo chianje chienjili iyo. ¹⁹ Kata nendi omulakhule oulali omusumba womundu yesi ta, ndikholanga okhuba omusumba wabandu boosi kho mbu enyoole abaandu abaanji muno. ²⁰ Nekhalabananga muba Yahudi ndikholanga shinga omuyahudi kho mbu enyoole AbaYahudi nikhalabananga mubarukungwa namalako aka Musa, nindakholanga shinga oulalangwa namalako yako, kata omwene nindarukwa namalako yako ta, kho mbu enyoole yabo abarukungwa namalako yako. ²¹ Khubalia abali erwanyi wamalako, ndekhola ouli erwanyi wamalako, nebutswa shiandali erwanyi wamalako khuNyasaye tawe esie mwene,halali hasi wamalako kaKristo, ndakhola endio mbu khenyale okhunyoola abali erwanyi wamalako. ²² Khubateshere nindikhola omuteshere ,mbu khenyale okhubanyoola abateshere, ndekholekha amakhuwa koosi khubaandu,mbu munjira tsiosi enyale okhubahonia abaandu. ²³ Ekholanga kano koosi, Khulwa injili khu mbu, enyale okhusaanga mutsikhabi tsiabo. ²⁴ Shimumanyire mbu mutsimbiro aberushi abaanji bapishananga, nebutswa mulala yenyene niye ounyoolanga eshihanwa? kho mwesi mwesi mwirusie murio mbu munyalirwe okhunyoola eshihanwa ishio. ²⁵ Buli omwirushi yanasinjia amalako amatinyu, kho mbu afwalwe olusimbi lwebimuli bimera butswa lwangu,nebutswa efwe khwirukhanga khurio khulwa olusimbi olulimenya obushia nobushia ²⁶ Nikokachiranga esie nindirukha shirunji okhuula mumukoye okwokhumaliramwo etsimbiro, khandi Niko akachiranga esie endi shinga omukhupani oulasananga ebifuusi bie mumuya butswa. ²⁷ Habula endinyinjia omubiri kwanje nebifuusi nekuruchira elala, kho mbu Nyasaye aleshe okhurusia mumbiro tsino olwa esie omwene emba nemalire okhulanga abaandi mutsimbiro tsino.