¹ Elimalirikha, abakheerwa bange, musangalire mu Mwami. Esie khasi sinyisibwa khulwa khubandikira amakhuwa kala kala, arali kabakhoyera eng'we. ² Mube meeso Khulwe chimbwa, khandi mube meeso Khulwa bakholi bamabi, mube meeso Khulwa bala abekheenga abene. ³ Khulwo khuba efwe khuli abesikhebo, abenamiranga Nasaye mu Roho, nende khwebulisiria Yeso Kirisito, ne khasi khwesika omubiri khaba. ⁴ Katakario esie ndakhesikire mubiri. Omuundu Yeesi napaara mbwe ali nende esifune siokhwesika mubiri, esie khirakhoo lukali. ⁵ Ndakhebwa inyaanga ya munane, ndi omuundu wesialo sia Isiraili, owo lwibulo lwa Benjamini, Mwiburania wa Bayiburania, khumakhuwa kalondana nende khudiira malako, ndi Mufarisaayo. ⁶ Khulondana nende sinani, ndasandia likanisa, khulondana nende obulungifu asi wamalako, khasi ndali nende elibi. ⁷ Arali ebiindu bila ebiali ebie ingaanga khwesie, ndabibala kori ebiakora Khulwo khubeera Kirisito. ⁸ Khandi akulu waako koosi, mbala ebiindu bioosi kori nga ebiakora khulwo khubeera obulayi bubula esikero obwokhumanya Yeso Kirisito, Omwami wange; owo khubeera ye, esie ndakosia ebiindu bioosi, nibibala khuba kori nga mafwi mbwe nyoole Kirisito; ⁹ khandi mbonekhane mukari mwaye nimbula obulungifu bwange mwene obunyolekhana khurula khu malako, arali bula obunyolekhana khurula khu busubiri obuli mu Kirisito, obulungifu bula oburula khu Nasaye, mu busubiri; ¹⁰ mbwe nyoole okhumumanya alala nende obunyala bwokhulamusibwa khwaye, nende obusangirani bwamanyakhano kaye, ningeranisibwa nende okhufwa khwaye; ¹¹ mbwe nyoole okhuula khubulamusibwi bwa bafu mungira yosi yosi. ¹² Ne khasi bili mbwe ndamala okhuula, kose ndamala okhulirira; khaba! Arali ndedinyaanga khulukeendo mbwe nyoole khudiira lila eliakera ndadiirwa nende Kirisito Yeso. ¹³ Baana befwe, khasi ndebona esie omwene mbwe malire khudiira; arali kholanga sa elikhuwa elala; ninjibirira akali inyuma, ne ninwanirira akali imberi; ¹⁴ ndedinya khulukeendo, mbwe nyoole esianwa esiomulaango mukhoongo kwa Nasaye mu Kirisito Yeso. ¹⁵ Khulwesio efwe khumalire okhukhula khupaare akene ako; naye kata nimupaara akandi mulikhuwa liosi liosi, Nasaye anabafunulira eliene elio liosi. ¹⁶ Kata kario, khuchiririre mukala akakhumalire khunyoola.. ¹⁷ Baana befwe, munoonde esie, nimulingeera bala abachiririranga mungeri yakhwababeresia. ¹⁸ Khulwo khuba abangi bali khuchiririra, abo abandababoolera khulondana nende amakhuwa kabwe ebikha bingi, ne bulano baboolera kata nindira masika, mbwe nibasuku bomusalaba kwa Kirisito; ¹⁹ ne obumalirikhi bwabwe nobusasikhi, inda niyo nasaye wabwe, oluyaali lwabwe luli mumatongolo kabwe, baparaanga khulondana nende amakhuwa komusialo ²⁰ Khulwo khuba obwibulwe bwefwe buli mwikulu; khandi khulindiririranga omuonia wefwe khurula bwene eyo, Omwami Yeso Kirisito; ²¹ ochia khukalukhania emibiri kiefwe ekiobudekhere, mbwe kinyoole khufwanana nende omubiri kwaye okwoluyaali, khubunyala bula obwa khunibwo anyala okhura asi waye ebiindu bioosi.