¹ Khulwesio nikhwakhabakhoo okhudinyisia khwosi khwosi mu Kirisito, nikhwakhabakhoo khulemisibwa khwosi khwosi okhwo bukheeri, nikhwakhabakhoo obusangirani bwosi bwosi obwa Roho, nikhwakhabakhoo okhwelalikhira khwosi khwosi alala nende esisa, ² muusirisie obusangaafu bwange, mbwe mube nende elichoomo elala, abali nende obukheeri bulala, nende Roho mulala, mulipaaro elala. ³ Murakhola esindu siosi siosi mungeri yokhukerana kose mukhwelaya; arali mukhole mukhweduduya, buli mulala abone owasie okhuba okhoyeera okhumukhira yemwene. ⁴ Buli muundu aralingera sa amakhuwa Kaye mwene, arali buli muundu alingere amakhuwa kabaandu bandi. ⁵ Mube nende amapaaro komukari mweng'we akali mukari mwa Kirisito Yeso yeesi; ⁶ owomukhuchaaka yali nende imbeera ya Nasaye, naye khasi yabona okhwakana nende Nasaye okhuba esiindu siokhwandirakho; ⁷ arali yekhola okhuba Kori obula oluyaali, naba Kori abaandu; ⁸ khandi Kori ngolwa yabonekhana nali nende ifwani yomuundu, yeduduya naba owokhuria okhuula khuliifwa, lila eliifwa elio musalaba. ⁹ Khulwesio khandi Nasaye yamukingula lukali, namuberesia eliira likhira ameera koosi; ¹⁰ mbwe khubirira muliira lia Yeso Kirisito buli likhumbo lisigame, khu biindu bio mwikulu, nende ebio musialo, nende ebili asi we sialo; ¹¹ ne buli lulimi lweyame mbwe YESO KIRISITO NOMWAMI, khulwo luyaali lwa Nasaye Sefwe. ¹² Bulano abakheerwa bange, Kori ngolwa muria echinyaanga chioosi, ne khasi ni mubikha ebiandaliwo sa, arali okhirakhoo nimbulao, musirisie obuonia bweng'we abene mungeri yokhuria nende khurengerekha. ¹³ khulwo khuba ye niye Nasaye okholanga emirimo mukari mweng'we, mukhudakha khweng'we nende okhukhola khweng'we, mukhusirisia elichoomo liaye lilayi. ¹⁴ Mukhole amakhuwa koosi mukhurekanyirisia kose mukhukerana, ¹⁵ munyoole okhuba abaana ba Nasaye ababula esiuku, kose obubacha, ababula elibi lio khubolwakho akari wolwibulo lwobukhayi, olwakora; abeng'we mubonekhananga okhuba Kori obulafu musialo, ¹⁶ nimudiira elikhuwa liobulamu; mbwe esie nyoole esifune siokhubona oluyaali inyaanga ya Kirisito, mbwe khasi nderukha echimbiro chiebikhaya kose khasi ndesandia khulwe bikhaya. ¹⁷ Ne kata ninjukhibwa kori nga esianwa khumusaango nende obukhalabani bwobusubiri bweng'we, ndi musangaafu; khandi sangaala alala ninang'we mweesi. ¹⁸ Nang'we mwesi musangaale murio, khandi musangaale alala ninasie. ¹⁹ Arali esie subira mu Mwami Yeso okhuruma Timoteo yeeche oweng'we ambi ano, mbwe esie nyoole okhudinyisibwa ngolwa njia khumanya kori ngolwa muli. ²⁰ Khulwo khuba esie mbula omuundu uundi oli nende amapaaro kafwanana nende akange, onalingeera imbeera yeng'we mubwadieri. ²¹ Khulwo khubeera abaandu boosi bali khukoonya ebiindu biabwe abene, ne khasi bakoonya ebiindu bia kirisito khaba. ²² Arali eng'we mumanyire ifuma yaye, mbwe yakhakhola emirimo Khulwe ifanjili ala ninange, kori ngomwana nende samwana. ²³ Khulwesio, subira khumuruma ambi ano, kori ngolwa njia khubona akaachia khunyoola. ²⁴ Arali subira mu Mwami mbwe njia okhwicha esie mwene ambi ano. ²⁵ Arali mbwene mbwe bikhoyera okhubarumira Epafaradito, omusiani wefwe, omukholi wemirimo alala ninange, omusikari alala ninange; khandi nomurume weng'we nende omukhalabani wameenya kange. ²⁶ Khulwo khuba yali nende amaofu ninang'we mwesi, naberera lukali, khubeera mwabulira mbwe yali omulwaye. ²⁷ Khulwo khuba nobwadieri yali omulwaye lukali, kata yali ambi okhufwa; arali Nasaye yamwelalikhira; ne khandi khasi niye sa yeng'ene, arali kata nende esie siesi; mbwe ndaraba nende esibeera akulu wesibeera. ²⁸ Khulwesio kholere esinani lukali okhumuruma, mbwe nimunamubona khandi,munyoole khusangaala, nange nyoole khududuyia esibeera siange. ²⁹ khulwesio, mumwingisie mu Mwami, mubusangaafu bwoosi, muberesie siriibwa abaandu bali kori niye. ³⁰ Khulwo khuba yali ambi okhufwa Khulwo khubeera emirimo kia Kirisito, khandi yara obulamu bwaye mumasira mbwe anyoole khusirisia kala akali nikarolelere mubukhalabani bweng'we khwesie.