¹ Khulwako, baana befwe abakheerwa, abambonera maofu, obusangaafu bwange, nende isiimbi yange, mweeme murio sirungi mu Mwami, eng'we bakheerwa bange. ² Saba Euodia, khandi saba Sintike, mbwe babe nende lipaaro elala mu Mwami. ³ khandi ndakha mbwe ewe wesi, omukholi wobwadieri, okhonye abakhasi abo; khulwo khuba balwanira ifanjili alala ninange, nende kelementi yeesi, alala nende abandi bala boosi abakhola mirimo ninange, abamera kabwe kali musitabo siobulamu. ⁴ Musangalire mu Mwami chinyaanga chioosi; khandi mboola mbwe, musangaale. ⁵ Obwedemberefu weng'we bumanyikhane nende abaandu boosi. Omwami ali ambi. ⁶ Muresaandia khulikhuwa liosi liosi; arali mulaame nende khusaba mubuli likhuwa, alala nende okhukhuba orio, ameenya keng'we kamanyikhane khu Nasaye. ⁷ Ne omuleembe kwa Nasaye, okukhira amakesi koosi, kunaliinda emioyo kieng'we nende mapaaro keng'we mu Kirisito Yeso. ⁸ Elimalirikha, baana befwe, amakhuwa kosi kosi akobwadieri, kosi kosi akali nende siriibwa, kosi kosi akobulungifu, kosi kosi akali amalafu, kosi kosi akakheresia, kosi kosi akali nende ifuma indayi; obulayi bwosi bwosi nibubao, ifuma indayi yosi yosi niyibao, mupaare mumakhuwa ako. ⁹ Amakhuwa akamweeka khurula khwesie nende khukabukula, nende khukabulira nende khukabona khwesie, mukhole kene ako; naye Nasaye womulembe anaba ninang'we. ¹⁰ Sangalira mu Mwami lukali, khulwo khuba bulano mubumalirikhi amapaaro keng'we kalamusibwe khandi khulwesie, kori ngolwa mwali nimudeebisibwa khulondana ninange arali khasi mwanyoola obweyaango. ¹¹ Khasi ndi khuboola kene kano mbwe khulwo khuba ndi nende ameenya khaba; khulwo khubeera ndeeka khuyesibwa nende imbeera yosi yosi eyandi ninayo. ¹² Manyire okhuba mubumanani, khandi manyire okhuba nende ebiindu bingi; mumbeera yosi yosi, nende mumakhuwa kosi kosi, ndeekesebwa khwikura nende okhuba injala, okhuba nende ebiingi nende okhubwerwa. ¹³ Nyala khukhola makhuwa kosi khubirira khuula oumberesianga amaani. ¹⁴ Arali mwakhola bilayi, ngolwa mwasangirana ninange mukhusaanda khwange. ¹⁵ Eng'we mwesi, abene mumanyire, eng'we Abafilipi, mbwe mukhuchaaka khwe ifinjili, kori ngolwa ndarula Makedonia, libulao likanisa lindi eliambana ninange mukhurusia nende khunyoola, arali sa eng'we mweng'ene. ¹⁶ Khulwo khuba kata sa Thesalonike ela, mwanderera obukhoonyi bwameenya kange, ne khandi khasi ni likhabi elala sa khaba. ¹⁷ Khandi khasi bili mbwe ndekoomba esianwa sila, arali ndekoomba ebiamo bili okhwemeeda okhuba ebingi, mububali bweng'we. ¹⁸ Arali ndi nende ebiindu bioosi kata nende khukhirao, khandi njichusibwe lukali; ndanyolere ebiindu biamwarera khubirira khu Epafaradito, esing'ari sia mafura, esisakhiro esifukirirwa, esisangasia Nasaye. ¹⁹ Naye Nasaye wange achia khubaberesia buli siindu esiamudakha khulondana nende obuyiinda bwaye, muluyaali, mukari mwa Kirisito Yeso. ²⁰ Bulano Nasaye Sefwe afumisibwe, bumeri nende bumeri. Amina. ²¹ Mukheserie buli mutakatifu mu Kirisito Yeso. Abaana befwe abali ninasie babakhesia. ²² Abatakatifu boosi babakhesia, okhirakhoo bala abeyinyuumba ya Kayisaari. ²³ Obukoosia bwo Mwami Yeso Kirisito bube alala nende emioyo kieng'we.