¹ Obusola nende milwano birula ena mweng'we? Khasi birula mubwekoombi bulwananga mumibiri kieng'we? ² Mwekoomba ne khasi munyoola: mwiira nimudakha mube nabio, ne khasi munyoola: mukhuyana nimusolana, ne khasi muli ninabio, khulwo khuba khasi musabanga. ³ Musaba ne khasi munyoola khulwo khuba musabanga ebimanu, mbwe mubiekhonyere mubwekoombi bweng'we. ⁴ Eng'we bayeyi basaacha nende bakhasi, mukorerwe mbwe obwicha nende sialo ni busku nende Nasaye? Oyo yeesi onaba mwicha nende sialo nomusuku wa Nasaye. ⁵ Opaara mbwe eliandiko liboola bubacha; Roho orumenyeremo yekoombanga mumbalikha? ⁶ Arali Nasaye aberesanianga bukoosia obuyera, khukario eliandiko liboola mbwe, Nasaye akhayanga abeyisunga, naberesia bukoosia abeduduyia. ⁷ Khulwako mweberesanie khu Nasaye. Mukhaye Sietani, ne aneerukha abarulekho. ⁸ Musude ambi nende Nasaye naye anasuda ambi ninang'we. Musaabe makhono keng'we, eng'we abononi; khandi mulabie emioyo kieng'we, eng'we aba mapaaro kabiri. Bibachune, nimulira, nimurusia masika: ⁹ Echinjekho chieng'we chiekalukhane chibe khulira, ne isangaalo yeng'we yekhole obusinyifu. ¹⁰ Mweduduyie mumoni chia Nasaye, naye anabakingula. ¹¹ Murabolanakho amabi, baana befwe. Oyo olomalomanga amabi khumusiani wabwe, namukhalakira, amonyanga lilako, khandi akhalakiringa lilako: Ne nokhalakira lilako, khasi oba oli omukholi welilako arali omukhalaki. ¹² Khuli nende oberesianga malako mulala, oli nende obunyala bwokhuonia nende khusasia: Ewe oli wina okhalakiranga owasio? ¹³ Bulano murekeresie , eng'we babolanga mbwe, inyaanga yino, kose muchuli khunachia mudookho nabulebe, nikhuchiririrayo omwaka, nikhukula nende khukusia nikhunyoola ifuni: ¹⁴ ne mukorerwe akanabao muchuli. Obulamu bwao nisina? Buli sa kori nga linang'ong'o, elichaanga sa bikha bidiidi nilirulao. ¹⁵ Khulwako mukhoya khuboola muri, Nasaye nafukirira, khunamenya, nikhukhola kano, nende kala. ¹⁶ Ne bulano musangalira khwefumia khweng'we, isangaalo nge eyo ni yimaanu. ¹⁷ Khulwako oyo omanyire khukhola malayi, ni khasi akhola, ni bwononi khuniyie.