¹ Bulano mwiche eng'we bayiinda, mulire nimwayula khulweminyakhano kiicha okhubachiakho. ² Emiandu kieng'we kianyasikha, ebiefwalo bieng'we bialiwa nende chimbungi. ³ Idakhabu yeng'we nende ifisa bialibwa nende chimberebende: ne chimberebenda echio chakhabe obuloli khweng'we, khandi chiakhalie mibiri kieng'we kori nga wakholola muliro. Mwabusia emiandwa alala khulwechinyaanga chimalirikha. ⁴ Lingeera, emirungo kia bakholi baaka mumikuunda kieng'we ekiamwakhayirakho mukhunyula, kili khuliraanga: ne amaliro kabala abaaka kolere mumarwi ko Mwami wa mayie. ⁵ Mwamenya musialo mukhwesangaasia, mubwelaasi; nimukhomesia emioyo kieng'we, kkhulwe inyaanga yokhusinja. ⁶ Mwasitaaka nende khwira abaandu balungifu; ne khasi yabakayira khaba. ⁷ Kario mwesimirisie, abakheerwa, okhuula okhwicha khwomwami. Lola kori ngomulimi alindanga ebiamo bilayi birula muloba, khandi abiesirimirisirianga, okhuula kori ngolwanyoola ifula yamberi nende eyimalirikha. ⁸ Mube abesimirifu; mukasie emioyo kieng"we: khulwo khuba okhwicha khwo Mwami khusudanga ambi. ⁹ Murayirimbana abene khu bene baana befwe, muroola mwayasibwa: Lola , omukhalaki yemere khumuliango ¹⁰ Baana befwe, mubukule abanabii, abalomaloma muliira lio Mwami khulwe silolero mukhusaando nende mubwesimirisi. ¹¹ Lola , khubabala khuba abasangaafu abesimirisia. Mwabulira obwesimirisi bwa Ayubu, khandi mwakhabona okhumalirikha khwo Mwami; mbwe omwami niwokhwelalikhira, khandi ni wesisa singi. ¹² Arali akulu webiindu bioosi, beana befwe, murechubanga khaba, khulwo mwikulu kose khulwo musialo, kose khulwe sichubo siosi siosi.khole ee ibe ee; ne khaba yeng'we ibe khaba, muroola mwengira musikhalako. ¹³ Aliwo khokho mweng'we onyakhana? Asabe. Alikhoo muchachayafu? Yembe chinyimbo. ¹⁴ Khulikho nende omulwaye mweng'we? Ne alange abakhulundu beikanisa; bamulamire, nibamubakha mafura muliira lio Mwami: ¹⁵ Ne amasaayo kelisuubira kanaonia omulwaye, ne omwami anamukingula; kata niyakhola echimbi, analekherwa. ¹⁶ Mubolanire amadinyu keng'we, mani musayirane, munyoole okhuona. amasaayo komuundu mulungifu kali nende maani lukali. ¹⁷ Eliya yali omuundu weyikhola kori ngeefwe, ne yasaaya mubukakifu mbwe ifula irakwa khaba: ne khasi yamala yakwa khulwemiaka kidaru nende miosi kisasaba. ¹⁸ Ne khandi yasaya, ne likulu nilimala niliana ifula, ne liloba niliana ebiamo bialio. ¹⁹ Baana befwe, mulala khweng'we nareremukha okhurula khubwadieri, ne omundu amukalusia, ²⁰ amanye mbwe oyo okalusie omwononi khurula khungira chiaye chiobukori anaonia omwoyo khurula mukhufwa, ne anafunikha ebionono bingi.