¹ Baana befwe, muraba abekesia bangi, nimumanyanga mbwe khulinyoola obukhalaki bukhoongo lukai. ² Khulwo khuba khwegumulanga fweesi mumakhuwa mangi, naye omuundu yeesi naranyala okhwegumula mulikhwa, oyo nomuundu mukololofu, onyala khwikalira omubiri kwoosi. ³ Lola, khurechanga ebichuma mumunwa kweifarasi, mbwe inyale khwedemberesia, nikhumala khuimirira wosi. ⁴ Lola echimeli chiosi, kata mubukhongo bwachio, chiekesibwanga nende ingara indiidi, okhuchia owomuwirusi yenya yichie. ⁵ Kata lulimi nisiindu sidiidi, ne siebulisirianga ebiindu bikhongo. Lola kori ngolwa muliro mudidi kwambianga likhuwa likhongo! ⁶ Ne olulimi nimuliro, esialo siobwononi: nilwo ngolwa luli mumibiri kiefwe, mbwe lumaliyianga omubiri kwoosi, khandi lwambianga omubiri kwoosi muliro; lwambia omuliro kwa jekhanamu. ⁷ Chimbia chiosi echie chisolo, nende echiamayoni, nende echiechinjukha nende ebiindu bioosi munyaanja, binyala khlongoyaala, khandi bilongoyisibwanga nende abaandu: ⁸ ne olulimi nalwo, abulao onyala khululongoyisia, nibubi burarukikha, lwechulamo obufwisi bwira. ⁹ Khufumianga Nasaye oli Sefwe ninalwo, khandi khuchubanga abaandu balongwa mufwani ya Nasaye ninalwo. ¹⁰ Mumunwa mulala okwo kurulangamo chikhabi nende ebichubo. Baana befwe kano khasi kakhoyera okhuba kario khaba. ¹¹ Binyalikhana isebere ndala irusie ebikha bilala amachi kanyunyula nende malulu? ¹² Binyalikha baana befwe, omusaala kwebiamo bilayi okhwama mabwa? Kose musabibu khwama ebiamo bilulu? Kario kubulao omwalo kunyala khukhulikusia amaachi keyichumbi nende amalayi. ¹³ Niwina omuundu mukesi mweng'we owarebwamo obumanyirisi? ¹⁴ Arali nimuli nende obululu bweyimbalikha nende amayingani mumioyo kieng'we,, muresunga, khandi murebacha khulondana nende obwadieri. ¹⁵ Amakesi kano khasi karula akulu khaba,arali ni kesialo, akesinamuundu, nende obusitani. 1 ¹⁶ Khulwo khuba oweyimbalikha nende buyingani bili, awo khuliwo obukayani nende buli ikhola imbi. ¹⁷ Ne kala makesi karula akulu mberi ni malafu khandi ni komuleemba, kobweyocherefu, khandi karekeresianga amakhuwa ka baandu bandi, kechulamo esisa nende ebiamo bilayi, kabula injaulo khandi kabula obwekaadi. ¹⁸ Esiamo sio bulungifu sirakwanga mumuleembe nende bala abareranga omuleembe.