¹ Baana befwe, muraba nende obusuubiri bwo Mwami wefwe Yeso Kirisito, Omwami wo luyaali nende okhuboona abaandu bandi. ² khulwo khuba omundu oli nende ingila ye yifisa, muchingubo chindayi niyakheecha mumukhung'no kwengwe, naye oundi, mumanani yeecha mungubo chiarandukha; ³ nimudeeba oyo owefwalire chingubo chindayi, mumuboolera muri, ikhala ano abuundu alayi, naye omumanani mumuboolera muri, yema ale, kose ikhala ano mumakulu kange: ⁴ abwene ao khasi mulimo okhuboona, khandi simwekholere okhuba abakhalaki mumapaaro mabii? ⁵ Rekeresie, eng'we bakheerwa bange, Nasaye khasi yalobola abamanani bomusialo muno okhuba abayiinda bobusubiri, nende abalaamirwa obwami bwayalaka bala abamukheera? ⁶ Eng'we mwalekeresia bamanani! Abayiinda sinibo ababafwinyanga, nibabayira imberi webisaala biobukhalaki? ⁷ Khasi nibo bala abalekeresia eliira lilayi eliamwalangwamo? ⁸ Nimusirisia elilako lioluyaali khulondana nende eliandiiko, mbwe onakheera owasio kori ngolwa wekheera ewe mwene, onaba okhola ebilayi: ⁹ ne nimuli nende okhuboona baandu, mukhola bwononi, ne mubalwa nende elilako kori nga bafunaki ba malako ¹⁰ Khulwako oyo oliinda lilako lioosi, nakhaywa musimeka silala, aba afunake lioosi. ¹¹ Khulwo khuba oyo owaboola ari, orakhola buyeyi, niye owaboola ari, oreeba. khukario niwakhakhaya khuyeya, niwira, oba wekhelere omufunaki walilako. ¹² Bulano lomaloma nokhola orio, kori nga bala abakhakhalakirwe nende lilako liobulekhule. ¹³ Khulwo khuba yakhakhalake narali nende esisa, khubala abareekesia sisa, esisa siekingulanga akulu wa sikhalako. ¹⁴ Bikhonya sina, bakheerwa bange, omundu naboola ari, ali nende lisuubira, nabula bikhole, lisuubira liakhamukhonya? ¹⁵ Nikaba mbwe omusiani kose mukhana weng'we abasiekenye, alimubudakhi bwebiakhulia biabulinyaanga, ¹⁶ naye mulala khweng'we ababoolera ari, muchie mumuleembe, mudundumisibwe mani mwichusibwe; ne khasi mubaberesia ebienyekhana khulwomubiri, bikhonya sina? ¹⁷ Kata kario lisuubira, nilibula bikhole, liafwa liongene. ¹⁸ Naye omuundu undi anyala yaboola ari, ewe oli nende lisuubira, nange esie ndi nende bikhole: njekesie lisuubira liao elibula bikhole, nange ndakhwekesia lisuubira mubikhole biange. ¹⁹ Ewe osubirira mbwe Nasaye aliwo mulala; okhola bilayi: kata ebikhieno biosi bisubiranga, nibirengerekha. ²⁰ Wenya khumanya ewemuundu mukhaya mbwe lisuubira elibula bikhole liafwa? ²¹ Khasi niko kakera sefwe Ibraimu yabalirwa obwadieri khubirira mubikhole, ngolwa yaana omwana waye Isaaka ngesisakhiro khubwali? ²² Olola kori ngolwa lisuubira liakhola mirimo alala nende bikhole, ne khubirira mubikhole lisuubira lioleresebwa? ²³ Ne eliandiko liolerera eliboola mbwe , Ibraimu yasubirira, mani nabalirwa obulungifu: nalangwa omwicha wa Nasaye,. ²⁴ Olola bulano mbwe khubirira mubikhole, omuundu abalirwanga obwadieri, arali khasi ni lisubira liong'ene ²⁵ Mumbeera yene eyo, khasi niyo eya Rahabu mudamba ula yabalirwa obwadieri khubirira mubikhole, ngolwa yali nanyolere abarumwa, nabasebula khubirira ingira yindi? ²⁶ Kori ngolwomubiri kuli mufu nikubula omwoyo, elisuubira liosi nilibula bikhole liafwa.