¹ Yakobo, omukholi wa Nasaye nende owa omwami Yeso Kirisito, khu chimbia ekhumi nende chibiri echiasalaana erwanyi: Makhesio! ² Abakheerwa, mubibukule nge yisangaalo nimukwa mumateemo kabukhaane; ³ nimumanyirisianga lino, mbwe okhuteemwa khwelisubira lieng'we khureera obwesimirisi, ⁴ ne obwesimirisi bweng'we busiirisie omulimo kwabwo, mbwe muliirire muno, kori nga ababula esia mweenya. ⁵ Oyo khweng'we abula makesi, areebe Nasaye, aberesianga baandu boosi mubungi, oburekalira, ne anaberesebwa. ⁶ Arali areebe mubusubiri, oburakanakana, khulwo khuba okanakana ali kori nga liyoombe khumaaachi elirusibwanga nende omuyaka nilisindikhwa eyi nende eyi. ⁷ Naye omuundu oyo arasubirira okhunyoola esiindu siosi khurula khu Mwami. ⁸ Omuundu wa mapaaro kabiri abeyabeyanga mubiindu bioosi. ⁹ Naye ula omukheerwa oli asi asangaalenge khulwo khubeera yakiingulwa: ¹⁰ omuyiinda naye, yeyikhie asi: khulwo khuba achia khurusibwao kori nge simuli esio musino. ¹¹ Khulwo khuba omubasu ngakurulanga nende obubafu busaamba, nikumamula obunyaasi, ne esimuli silakakha, ne oluyaali lwasio lukora, nilwo ngolwa omuyiinda yesi achia okhuuma muchingira chiaye. ¹² Ni weyikhabi ula omuundu owesimirisirianga mateemo: khulwo khuba nateemwa, ananyoola olusiimbi lwobulamu, olwo Mwami yalaka abo abamukheera. ¹³ Omuundu yeesi nateemwa, araboola mbwe ndeemwa nende Nasaye: khulwo khubeera Nasaye khasi anyala khuteemwa nende amabi, khandi ye khasi ateemanga omuundu yeesi khaba. ¹⁴ Arali buli muundu ateemwangwa mukhubukulibwa mubwekoombi bwaye, nakadirisibwa. ¹⁵ Khulwo khuba obwekoombi nibuyeera inda, nibwibula imbi nayo imbi niyakhangala , ireeranga liifwa. ¹⁶ Murakadisibwa baana befwe. ¹⁷ Buli esianwa silayi nende esiulirire birulaanga akulu, nibidikulukha nibiikha khurula khu Nasaye wobulafu, muniye abula okhwekalukhania, kose esinikha sio khwebalula. ¹⁸ Mulienya liaye mwene yaruloonga mulikhuwa lio bwadieri, mbwe khube imbia ye biaamo biamberi eyebiloonge biaye. ¹⁹ Khukario, abakheerwa bange, buli muundu abe omwangu wokhubulira, ne araba omwangu wokhulomaloma, nende oradiirwa nende oburima lwangu: ²⁰ khulwo khuba oburima bwomuundu khasi busirisianga obwadieri bwa Nasaye. ²¹ khukario mure indulo obubi bwoosi, nende obumaanu bubiririire, ne munyoole mubweyocherefu elikhuwa lila eliarakwa, elinyala okhuonia emioyo kieng'we. ²² Ne mube abakholi belikhuwa, abarali ababulira bong'ene, mukhwebacha abene, ²³ khulwo khuba omundu naba owo khubulira sa likhuwa, orali omukholi, afwananisibwa nende oyo owelingeeranga obweni bwaye muyirang'io: ²⁴ khulwo khuba yelingeeranga nabwao, namala yebirira ngolwa afwana mulwangu. ²⁵ Naye oyo olingeeranga mulilako lilungifu eliobulekhule, nachiririramo, orali omubuliri owibirira, arali omukholi womulimo, uno ananyoola yikhabi mubukholi bwaye. ²⁶ Ne niyakhabao Mweng'we ololekha oweyidini, ne khasi yekaliraanga lulimi lwaye, abachaanga omwoyo kwaye mwene, idini yomuundu kori oyo khasi yiyera. ²⁷ Idini indafu, eyirali nende obumaanu imberi wa Nasaye oli Sefwe niyo yino, okhukeendera ababula basamwana alala nende abalekhwa mubidinyu biabwe, nende okhwelinda nende esialo nobula makoondo.