¹ Khulwesio muloonde Nasaye kori ngabaana abakheerwa; ² muchiririre mubukheeri, kori ngolwa kirisito yabakheera mani niyerusia okhuba esianwa nende esisakhiro khu Nasaye khulwefwe. ³ Arali obuyirani burarumbulwakho khweng'we kose obumali bwosi bwosi obwokhwekoomba, kori ngolwa bikhoyera abatakatifu; ⁴ kose chisoni, kose amakhuwa kobusiru, kose obuyingani; akene ako khasi kakheresia khaba; arali nibilayi okhukhuba orio. ⁵ Khulwo khubeera nobwadieri eng'we mumuanyire likhuwa lino, mbwe abulao omuyirani kose orali mulafu kose owobwekoombi, oyo niye owinamiranga ebifwanani, oli nende obulaame mubwami bwa Kirisito nende Nasaye. ⁶ Omuundu arababacha nende amakhuwa kabula obukhoonyi; khubeera khulwe sifune sia kene ako, elirima lia Nasaye liichira abaana bobukhayi. ⁷ Khulwesio muraambana ninabo. ⁸ Khulwo khuba mwali musirima khale, arali bulano muli obulafu mumwami; mukeende Kori nga abaana bobulafu, ⁹ khubeera esiamo sio bulafu silimo obulayi bwoosi nende obulungifu nende obwadieri; ¹⁰ mupime okhumanyirisia kala akasangaasia Omwami. ¹¹ Muraambana nende ebikhole ebiraama ebiamo ebiomusirima, arali mubikhye; ¹² khubeera akabakhola mubwekisi, nikechisoni khukarumbula. ¹³ Arali kala koosi akakhayibwa kaanikhibwanga nende obulafu, Khulwo khubeera bulisiindu esibonekhananga nobulafu. Khukene ako abola ari, " singira, ewe okunukha, ¹⁴ olamukhe mubafu, naye Kirisito anakhukhoseria." ¹⁵ Khulwesio mulingere lukali Kori ngolwa mukeenda; murakeenda Kori nga abaandu babula obumanyirisi, arali mukeende Kori ngabali nende obumanyirisi. ¹⁶ Numununula ebikha, khubeera chinyaanga chino nichiobubi. ¹⁷ Khulwako, muraba abasiru, arali mumanyirisie mbwe elienya lia Nasaye nisina. ¹⁸ Khandi muramesibwa nende ifini, eyilimo obukoyani; arali mwichusibwemo Roho; ¹⁹ Nimulomaloma abene khu bene muchisaburi nende chinyiriri nende chinyimbo chiomumwoyo, nimweemba nimusangalira Omwami mumioyo kieng'we; ²⁰ nende khukhubira orio Nasaye Sefwe chinyaanga chioosi mumakhuwa koosi, muliira lio mwami wefwe Yeso Kirisito; ²¹ buli mulala niyeyikhia asi wowasie musiriibwa sia Kirisito. ²² Eng'we abakhasi murie abasaacha beng'we kori nga khumuria Kirisito. ²³ Khulwa khuba omusaacha nomurwe kwo mukhasi waye, Kori ngolwa Kirisito ali murwe kwe likanisa. ²⁴ Arali Kori ngolwa likanisa liaria Kirisito, kario abakhasi bosi barie abasaacha babwe mubuli likhuwa. ²⁵ Eng'we abasaacha, mukheere abakhasi beng'we Kori ngolwa yeso yakheera likanisa,niyerusia khulwa nilio; ²⁶ mbwe anyoole okhulilabia, nende khuliosia nende amaachi mulikhuwa; ²⁷ mbwe anyoole okhwererera likanisa lio luyaali, elibulamo obumali kose likoondo kose lioosi elifwana lirio; arali libe elitakatifu elibula siuku. ²⁸ Kario bikhoyera abasaacha bosi okhukheera abakhasi babwe Kori emibiri kiabwe bene. Ula okheera omukhasi waye yekheraanga omwene. ²⁹ Khulwo khuba abulao omuundu owasiula omubiri kwaye abuundu wosi wosi; arali akulisianga nende khukuliinda, Kori sa ngolwa Kirisito akholeranga likanisa. ³⁰ Khulwo khuba efwe khuli ebibalo biomubiri kwaye. ³¹ Khulwe sifune esio omuundu achia khulekha samwana nende ngina, ne achia okhwambana nende omukhasi waye, ne babiri abo bachia okhuba omubiri mulala. ³² Eliobwekisi elio ni likhoongo; arali esie nomanomanga khu makhuwa ka Kirisito nende likanisa. ³³ Arali omuundu akheere omukhasi waye kori nga ye mwene; ne omukhasi arakhaya okhuria omusaacha waye.