¹ Khulwesio, esie omuboye wo Mwami, basaba mbwe mukeende khulondana nende omulango kwamwalangirwa, ² nende obweduduyi bwoosi nende obwedemberfu, nende okhwefwira, nimwesimirisaniria mulala khuundi mubukheeri: ³ nimwedinya okhulinda obulala bwa Roho mumboye yomuleembe. ⁴ Khuli nende omubiri mulala, nende Roho mulala, kata ngolwa mwalangwa mulinaaya elala eliomulaango kweng'we; ⁵ Omwami mulala, obusubiri bulala, obubatisibwi bulala, ⁶ Nasaye mulala, oli samwana waboosi, oli akulu wakoosi, nende mukoosi, nende mweng'we mwesi. ⁷ Arali khubuli mulala khwefwe yaberesibwa obukoosia khulondana nende esikero siesianwa esia Kirisito. ⁸ Khwelwesio aboola ari, olwayanina akulu, yadiira omuruki, namala naberesia ebianwa khu baandu. ⁹ Bulano niyanina, ni sina nisio arali mbwe khandi yeekha mberi mumbeka chiasi echie sialo? ¹⁰ Oyo oweekha niye khandi omwene oyo owanina akulu khukhira likulu lioosi, mbwe anyale okhusirisia ebiindu bioosi. ¹¹ Ne yaberesia abandi okhuba abarume, nende abandi abanabii, nende abandi abayaali , nende abandi abaayi, nende abandi abekesia, ¹² khulwokhurekekha abatakatifu khulwe mirimo kiobukhalabani, khulwo khumbakha omubiri kwa kirisito: ¹³ okhuba olwa fweesi khuchia okhuula mubulala bwobusubiri, nende mubumanyirisi bwomwana wa Nasaye, okhuula khumuundu mulamba, okhuula khusikero esiamadaara kobwolerefu bwa kirisito: ¹⁴ mbwe efwe khandi khuraba abaana badiidi, abaduumulwa eyi nende ela, nibabukulwa nende buli muyaka kwa mekesio, nande imbalukha ya baandu nikhuloondo echingira chiobubabacha. ¹⁵ Arali khudiire okhulomaloma obwadieri mubukheeri, khunyale khukhula muniye mubiindu bioosi, oli omurwe, niye Kirisito: ¹⁶ owa khuniye omubiri mulaamba kwambanisibwa nikudirana alala Mani nukudirana nende buli sikusu esikhoonya, khulondana nende ikhola yolerere musikero siabuli sikusu, esikhola okhwemeeda khwomubiri okhuula khu khweyumbakha khwako kwene mubukheeri. ¹⁷ Khulwesio mboola kano, ninjingirisia mumwami, mbwe eng'we bulaano , murakeenda kori ngolwa banasialo bakendanga, mubukoyani bwa mapaaro kabwe; ¹⁸ akarebwamo esirima,khandi nibakoyanu mukobulamu bwa Nasaye khubiriri mubulendaafu obuli mukari mwabwe, khulwo khubeera obwoofu bwemioyo kiabwe. ¹⁹ Abafwa linakaasi mani nibeberesania abene okhwelasia, khukhola ekesifwabi koosi, nende obuyaayi. ²⁰ Arali eng'we khasi mweeka Kirisito murio khaba. ²¹ Nikali mbwe mwamubulira khandi mwekesibwa ninaye, Kori ngolwa obwadieri buli mu Kirisito: ²² mwefwalule khurula mumakhuwa keyingeenda yamberi, omuundu wakhale, osasikhanga khulwo khuloonda obwekoombi bwokhubacha; ²³ amapaaro kemioyo kieng'we kakholwe okhuba amayaakha; ²⁴ mwefwale omuundu muyaakha, owalongwa mumbeera ya Nasaye mubulungifu nende obutakatifu bwobwadieri. ²⁵ Khulwako, mwefwalule obubacha mani mubolenire obwadieri bulimuundu nende mumenyeranwa waye; khulwo khuba khuli ebimeka, buli mulala nisimeka siowasie. ²⁶ Mube nende elirima, arali murakhola imbi; eliuba lirakwa nimusiri nende obuchuuni bweng'we; ²⁷ nomba muraberesia Sietani obweyaango. ²⁸ Omwibi areeba khandi; arali nibilayi akhole sinani, nakhola emirimo milayi khu makhono kaye mwene, mani anyoole okhuba nende esiindu esio khukaaba abali nende elienya. ²⁹ Elikhuwa liosi limaanu lirarula muminwa kieng'we, arali amakhuwa malayi akakhoyera ula oli nende elienya, mbwe kaberesie obukoosia khu bala ababulira. ³⁰ Khandi murasinyisia Roho mulafu ula owa Nasaye: owamwarebwakho esibalikho khulwe inyaanga yobununuli. ³¹ Obuchuuni bwoosi, nende lirima, nende businyifu, nende busoolo, nende khunyekana, biruleo akari weng'we, alala nende imbeera yobubi; ³² khandi mube abokhukhonyana eng'we bene khu bene, abokhubonera esisa, nimulekhanira, kori ngolwa Nasaye yabalekhera mu Kirisito.