¹ Khulwe sifune sino, esie Paulo, omuboye wa Yeso Kirisito khulweng'we Abesialo, ² nikaba mbwe mwabulira akobukholi bwobukosia bwa Nasaye obwandaberesibwa khulweng'we; ³ mbwe ndafunulirwao ninjekesibwa akakisibwa ako, Kori ngolwa ndarangirira okhubandikira mumakhuwa madiidi. ⁴ Khulwesio, nimukasoma, munyale okhumanya obumanyirisi bwange mukala akakisibwa aka Kirisito, ⁵ aka mulwibulo lundi khasi kamanyikhana khu baana babaandu, ngolwa bulano kafunulirwe abarume nende abanabii baye batakatifu khubirira mu Roho; ⁶ mbwe abanasialo banyoole okhuba obobulaame alala ninafwe, nende abomubiri mulala, khandi abakabana bebilakwa mu Kirisito khulwe ifanjili: ⁷ esia ndakholwa okhuba omukhalabani, khulondana nende esianwa sio bukoosia bwa Nasaye esiandaberesibwa nende ikhola yobunyala bwaye. ⁸ Esie oli omalirikha khu batakatifu boosi, nesie owa obukoosia buno bwabersibwa mbwe nyale okhuyaala akari wabanasialo obuyiinda bwa Kirisito oburali nende esikero; ⁹ nende okhukhola abaandu boosi babole akobusangirani bwa kala akakisibwa, akokhurula mukhuchaaka khwesialo Kali kakisibwa mu Nasaye, oyo owaloonga ebiindu bioosi khulwa Yeso Kirisito: ¹⁰ nende esifune mbwe bulano oburuki nende obunyala muchimbeka chielikulu binyale khumanya obukesi bwa Nasaye obuli obwa chingeri chinyingi khubirira khu likanisa; ¹¹ khulondana nende elichoomo liobumeri elia yafunana mu Kirisito Yeso Omwami wefwe: ¹² owa muniye khuli nende ichwoni nende obuuliriri muniye. ¹³ Khulwako saba mbwe murafwa emioyo khulondana nende amanyakhano kange khulweng'we, akali oluyaali khweng'we. ¹⁴ Khulwako sigamira Sefwe , ¹⁵ owa khubirira muliira liaye elia obusamwana, olwibulo lwoosi olwomwikulu nende musialo lulangiramwo, ¹⁶ abanyalire, khulwo bungi bwobuyiinda bwoluyaali lwaye, okhwema sirungi mumaani, khubirira mu Roho waye mumuundu womukari. ¹⁷ Kirisito amenye mumioyo kieng'we mubusuubiri nimuba nende esisina nende omuse mubukheeri; ¹⁸ mbwe munyoole okhumanyirisia alala nende abatakatifu boosi Kori ngolwa buli obubambali, nende obuleeyi, nende okhuchia akulu nende asi; ¹⁹ nende okhumanya obukheeri bwa Kirisito, obukhira obumanyirisi Kori ngolwa buli obungi, munyoole khulirira mubwichufu bwosi obwa Nasaye. ²⁰ Bulano afumisiwe ula onyala okhukhola amakhuwa kaukisia lukali khukhira koosi akakhusabanga kose akakhupaara, khulwa maani kakholaanga emirimo mukari mwefwe; ²¹ afumisibwe mulikanisa nende mu Yeso Kirisito okhuula khu chinjibulo chioosi echiobumeri nende bumeri. Amina.