¹ Nangwe mwali abafu khulwa mabi nende bionono bieng'we; ² ebiamwakenderangamo khale nimuloonda imbeera yomusialo muno, nende Khuloonda omuriki wobunyala owomumiuya, Roho ula okholaanga emirimo ebikha bino mubaana bobukhayi; ³ naye efwe fwesi khwakenderanga akari wabwe khale, mubwekoombi bwemibiri kiefwe, Kori ngolwa khwoseresia elienya liomubiri nende mapaaro, nikhuba nende ebiima bia baana be lirima Kori nga baandu bandi. ⁴ Arali khulwo okhuba mbwe Nasaye nomwichufu wesisa, khulwo bukheeri bwaye bungi obwayarukheera; ⁵ Kata ebikha bila ebiakhwali bafu khulwa Mabi kefwe; yarulamusia alala nende Kirisito; ne khwaonisibwa khubirira mubukosia. ⁶ Narulamusia alala ninaye, narwikhasia alala ninaye musialo sia Roho, mu Kirisito Yeso; ⁷ mbwe muchinyaanga chichayo anyoole khulolesia obungi bwo bukoosia bwaye obubira esikero mubulayi bwaye khwefwe mu Kirisito Yeso. ⁸ Khulwo khuba mwaonisibwa khulwo bukoosia, khubirira mubusubiri; oburarula khweng'we bene, ni esianwa esia Nasaye; ⁹ esirali esie bikhole, omuundu yesi areecha yefumia. ¹⁰ Khulwo khuba efwe khuli mirimo kiaye, khwalongwa mu Kirisito Yeso, mbwe khukhole ebikhole bilayi, ebia Nasaye yakasia khurula khale mbwe khukenderemo. ¹¹ Khulwako mwichulisie mbwe eng'we mwali abanasialo mumubiri, mubikha biabira abalangwa mbwe, abarakhebwa nende sila esialangwa mbwe esikhebo mumubiri, esiakholwa nende amakhono; ¹² mbwe mubikha ebio mwali nimubula Kirisito, nimuli abakeni khuboluya lwa Isirayili, khandi abareende khurula khu malakano kobusubisi, nimurali nende linaaya, khandi nimubula Nasaye musialo: ¹³ Arali bulano mu Kirisito Yeso, eng'we abebikha biabira mwali ale, mwarerwa ambi Khulwa mabaanga ka Kirisito. ¹⁴ Khulwo khuba ye niye omuleembe kwefwe, owarukhola efwe bwesi okhuba silala; nalikulao eliida lia akari eliali liarukabula. ¹⁵ Naye ngolwa yamalao obusuku bula khubirira mumubiri kwaye; obuli elilako liebilagiro ebili mumalako; khulwo khukhola muniye omwene khubirira omuundu muyaakha mulala, narera omuleembe. ¹⁶ Khandi mbwe anyale okhwambania boosi khu Nasaye mumubiri mulala khumusalaba namalire okhwira obusuku khubirira khumusalaba okwo. ¹⁷ Mani niyeecha nabayalira omuleembe eng'we abali ale nende khwabo abali ambi. ¹⁸ Khulwo khuba khubirira muniye, efwe fwesi khuli nende obunyala bwoKhuula khu Sefwe khubirira mu Roho mulala. ¹⁹ Bulano khulwesio, khasi muli abareende Khaba, kose babirangira, arali muli abeebule alala nende abatakatifu, khandi abeyinyuumba ya Nasaye; ²⁰ obombakhwa khumuse kwa barume, nende abanabii, naye Yeso Kirisito nali elikina likhulundu liomukoona. ²¹ Owa muniye esiumbakhe siosi siambanisibwa ebilayi alala nisikhula okhuula okhuba ikhekalu indakatifu mumwami: ²² owa muniye eng'we mwesi mwombakhwa alala okhuba obumenyo bwa Nasaye khubirira mu Roho.